Luka 13 - The Holy Bible In Alur (Lur) Revised Orthography

Lokri Kadi Rwinyo

¹ Nie i nindo maeni nini dhanu moko nuti m’uyero ire pi Jugalilaya, ma Pilato ribo rimbgi ku lam migi.

² Eloko lembe ewacu igi kumae, Wuwacu nyo Jugalilaya maeni gi judubo ma sagu Jugalilaya ceke? kum gisendri ku gin maeni?

³ Awacu iwu kumae, Ungo: ento, tek wuloko cwinywu ngo, wun ceke wubirwinyo kumeno.

⁴ Kadi juapar wi abora maeno, ma ot ma wiu m’i Siloam upodho i wigi, enegogi de, wuwacu nyo gi judubo ma sagu dhanu ceke m’ubedo i Yerusalemi?

⁵ Awacu iwu kumae, Ungo: ento, tek wuloko cwinywu ngo, wun ceke wubirwinyo kumeno.

Lembabola pi Yend Ulam M’ucego Nyinge Ngo

⁶ Man eyero lembabola maeni kumae; Ng’atu moko bedo kud ulam m’epidho i podho pare mir ulok; e ebino yenyo nyinge i wie, enwang’u de ngo.

⁷ Man ewacu ni jatipodho mir ulok kumae, Nen, rundi adek maeni abino yenyo nying ulam wi yend ulam maeni, e anwang’u ngo; ng’ole piny; ecamu ng’om mananu de nedi?

⁸ Man eloko lembe ewacu ire kumae, Rwoth, weke kumeno rundi maeni bende, ma fodi abikofuro ng’om i there, abiketho weyo de:

⁹ man tek ecego nyinge macen, ber; ento tek ecego ngo, ibing’ole piny.

Jukeyo Kum Dhaku ma Won Abala i Ceng’ Sabatu

¹⁰ Nwang’u ebeponjo i kacokri acel i ceng’ sabatu.

¹¹ Nen, dhaku nuti m’ubedo ku tipo mi mulima rundi apar wi abora; edole ngur, ecopo twinjre malu ngo.

¹² E ka Yesu nene, e elwong’e, ewacu ire kumae, Dhaku, ibedo agonya ni mulima peri.

¹³ Man eketho cinge i kume: e eni eni erieire atira, man eyungo Mungu.

¹⁴ E jadit mi kacokri, ma lembe ton i ie kum Yesu keyo kum i ceng’ sabatu, eloko lembe ewacu ni udul dhanu kumae, Ceng’ abusiel nuti ma maku dhanu tim ie tic: ka kumeno wubin i maeno man jukei kumwu, i ceng’ sabatu re ngo.

¹⁵ Ento Rwoth uloko lembe ewacu ire kumae, Wu weg ambili, wun kubeng’wu kubeng’wu ng’atuman gonyo dhiang’ pare kadi kana pare kud i dwol, epeye ba pi de ngo?

¹⁶ Man emaku ngo nia dhaku mae, m’e nyar Ibrahim, ma Jok utwie, rundi apar wi abora, ugonjre kud i twic maeni i ceng’ sabatu?

¹⁷ Kan eyero gin maeni, lewic umaku jupiem pare ceke: anyong’a nego udul dhanu ceke kum gin ceke mi dwong’ m’utimbre ni kume.

Lembabola pi Nying Atingli

¹⁸ Ka kumeno ewacu kumae, Ker pa Mungu e calu ang’o? man abipore kud ang’o?

¹⁹ E calu nying atingli, ma ng’atu moko gamu, ebolo i podho pare ma dhe; edongo de, man edoko ni yen; winyo m’i polo de gigonjo wi jange.

Lembabola pi Thobi

²⁰ Ewacu kendo kumae, Abiporo ker pa Mungu kud ang’o?

²¹ E calu thobi, ma dhaku gamu elutho i mogo asisa adek, maram thobi rome ko ceke.

Dhugola ma Diny

²² Ecidho i yo pare cil i adhura ku pacu, ku ponjo, m’ewotho ko Yerusalem.

²³ Ng’atu acel uwacu ire kumae, Rwoth, ju ma giboth gi noki? man ewacu ire kumae,

²⁴ Ponj mondo ku dhugola ma diny: kum dupa, awacu iwu, biponjo mondo i ie, e gibicopo ngo,

²⁵ ka won ot uai malu, eciko dhugola de, man wumaku cungo woko, wudwong’o dhugola de, wuwacu kumae, Rwoth, yab iwa; man ebidwoko lembe ebiwacu iwu kumae, Ang’eyo wu ngo kadok ka ma wuai i ie de;

²⁶ wubilund maku wacu kumae, Wacamu wamadhu i weng’i, iponjo de i gengi mwa;

²⁷ e ebiwacu kumae, Awacu iwu, Ang’eyo ka ma wuai i ie ngo; wuai cen kud i vuta, wun ceke ma wu jutic mi camuco.

²⁸ E ywak ku kayu lak bibedo nuti, ka wubineno Ibrahim, Isak, man Yakobo, ku jubila ceke, i ker pa Mungu, wun e ma jubayuwu woko.

²⁹ Gibiai yo nyangu ku yo reto, man yor ariwa ma malu ku yor ariwa ma piny, e gibibedo piny i ker pa Mungu.

³⁰ Man nen, moko m’udong’ cen bitelo yo, moko de m’utelo yo bidong’ cen.

Yesu Ywak pi Yerusalem

³¹ I saa maeno Jufarisayo moko bino, wacu ire kumae, Ai kakeni, ci kamange: kum Herode yenyo enegi.

³² Man ewacu igi kumae, Ci yer ni kaki maeno, Nen, awodho pajogi man akeyo kum tin kud urwo, i ceng’ mir adege de adoko ndhu cu.

³³ Ento akoacidh be i yo para tin kud urwo ku nyiceng’maca: kum ecopre ngo nia jabila rwiny woko kud i Yerusalem.

³⁴ E Yerusalem, Yerusalem, m’unego jubila pa Mungu, man m’ucanyu ju ma juoro i bang’e ku kidi! ayenyo wang’ udul acok nyithindho peri karacelo, cil calu min gweno coko nyithindhe the bombe, ere wuyenyo ngo!

³⁵ Nen, ot peri dong’ iri ni uvuru: man awacu iwu kumae, Wubinena ngo, cil ma wubiwacu kumae, Mugisa ni ng’atu m’ubino ku nying Rwoth.