Lembrieko 8 - The Holy Bible In Alur (Lur) Revised Orthography

Bero ku Bedo mi Nja mi Rieko

¹ Rieko bekok ungo, Man ng’eyothelembe bewodho dwande ngo?

² Ecungo wi ka ma malu dhu yo, I akarayo;

³ Ng’et dhugang’, i kamondo mir adhura, Ekok ma tek, i kamondo mi dhugola:

⁴ Alwong’o i beng’wu, E dhanu; Man dwanda en e ni wot dhanu.

⁵ E wu ju ma cobo, wung’ei rieko; Man, wu jukusegu, wubed kud adunde mi ng’eyothelembe.

⁶ Wuwinji, kum abiyero gin ma ber; Man abialu dendhoga pi gin m’atira.

⁷ Kum dhoga biweco lemandha; Man dubo en e ginmajudagu ni dendhoga.

⁸ Lembe ceke mi dhoga en e bedopwe; Gin moko m’ugondre mbe i igi kadi ma kite mbe de.

⁹ Ging’eiri ceke ni ng’atu ma ng’eyo thelembe, Man atira ni ju m’unwang’u ng’eyong’ec.

¹⁰ Jol ponji para, mola ma tar re ungo; Man ng’eyong’ec ma sagu mola ma kwar ma jufoyo.

¹¹ Kum rieko e ber ma sagu kidi ma kwar mi ruko; Man gin ceke ma jucopo yenyo pore kude ngo.

¹² An a rieko aketho rieko ni kabedo para, Man ayenyo ng’eyong’ec ku riu,

¹³ Lworo Yehova en e dagu dubo: Adagu kuhaya, man tingri, ku yo mi dubo, Man dhok ma kite mbe.

¹⁴ Lembapora ku ng’eyong’ec ma cu en e para: An a ng’eyothelembe; abedo ku tego.

¹⁵ Ju m’ubimo gibimo ni kuma, Man judongomawijo gipoko lembe pwe.

¹⁶ Judongomawijo gibimo ni kuma, Man weg yung, cil jupoklembe ceke m’i ng’om.

¹⁷ Amaru ju m’umara; Man ju m’uyenya ngili ngili gibinwang’a.

¹⁸ Lonyo ku yung ni i bang’a; Eyo, piny ma nindo man bedopwe.

¹⁹ Nyinga e ber ma sagu mola ma kwar, eyo, ma sagu mola ma kwar ma leng’; Man kuloka para e ber ma sagu mola ma tar ma jufoyo.

²⁰ Awotho i yo mi bedopwe, I die yo mi pokolembe;

²¹ Kara aketh ju m’umara gibed ku piny ni aba, Man kara apong’ kakanpiny migi.

²² Yehova bedo kuda i thekri mi yo pare, Ku kwong’a ni tic pare ma con.

²³ Jukana ugambre rondo ku rondo, ugambre i thangambere, Ma fodi ng’om kubedo nuti ngo.

²⁴ Kinde ma pi ma thuth umbe, nwang’u junyola, Kinde ma wang’pi moko mbe m’upong’ ku pi.

²⁵ Ma fodi gudi kucwiny ungo, Jular junyola ni ungulu gudi;

²⁶ Kinde ma fok’etimo ng’om ungo, kadi pothi, Kadi thekri mir utur mi ng’om.

²⁷ Kinde m’eketho polo cungo, nwang’u ani keca: Kinde m’etwodo wang’ pi ma thuth,

²⁸ Kinde m’eketho afuru moko malu, Kinde m’edwoko kulo mi pi ma thuth tek,

²⁹ Kinde m’eguro kieu mi nam, Kara pi kud ukadh lembang’ola pare, Kinde m’eporo thepiny mi ng’om;

³⁰ I nindo maeca wanuti wakude, calu jabodho ma dit; Man an a anyong’a pare ku ba rupiny ku ba rupiny, Ma anyong’a nega i wang’e thiri thiri.

³¹ Ma anyong’a nega i ka mi ng’om ma dhanu copo bedo i ie; Man anyong’a para ni ba wot dhanu.

³² Ka kumeno kawono, wota, wuwinja; Kum ju m’uworo yo para gi jumugisa,

³³ Wuwinj ponji, man wubed riek, Man kud wukwere.

³⁴ Mugisa kwany ng’atu m’uwinja, M’ebekio ku ba rupiny i dhugang’ para. M’ebekuro ku kum mbegi mi dhugola para.

³⁵ Kum ng’atu ma tek enwang’a nwang’u enwang’u kwo, Man ebinwang’u bero ba Yehova.

³⁶ Ento ng’atu m’udubo i kuma nwang’u etimo ng’eyong’ec pare gire rac: Dhanu ceke m’udaga gimaru tho.