Lembrieko 7 - The Holy Bible In Alur (Lur) Revised Orthography

Abidhe pa Won Asara

¹ Woda, wor lembe para, Man ikan lembang’ola para i beng’i.

² Wor lembang’ola para man ikwo; Man ponji para calu nying weng’i.

³ Twigi wi lweti; Kieugi wi ban mir adundeni.

⁴ Wac ni rieko kumae, In i nyamira; Man ilwong’ ng’eyothelembe ya wat kudi:

⁵ Kara gigwoki ni dhaku ma nyawirok, Ni nyawirok ma dhoge mit kum lem mananu.

⁶ Kum aneno yo woko Ku kind wang’ot para;

⁷ Man aneno kind ju ma cobo, Ang’io kind awobi, Jalawobi ma ng’eyothelembe mbe kude,

⁸ Ubekadhu kud i gengi ceng’ni gui pare; Man ekwanyu yo mi ot pare,

⁹ Uthieno, kinde ma piny ni mbia mbia, Diewor ma ling’ man i mudho.

¹⁰ Man, nen, dhaku rombo kude M’ekendo jamb asara, m’ebedo kud adunde mi riu,

¹¹ (Ekok man en e udhuku; Tiende bedo i ot pare ngo:

¹² Eni eni, eni i yo, eni eni, eni i gengi, Man ekanu adhi ku ba gui ceke.)

¹³ Kum kumeno emake, man ecwio limbe, Man ewacu ma lewic umbe i wang’e kumae:

¹⁴ Lam mi lam mi kwiocwiny ni i bang’a; Tin aculo lembang’ola para.

¹⁵ Ka kumeno awok woko kara waromb kudi, Ayenyo weng’i mumbe, man an weng’i.

¹⁶ Apedho kavuto para ku jambruko ma ber, Ku bongu ma ju thondhe mi Misiri.

¹⁷ Avong’o kavuto para Kud udok ma ng’wice ng’ar, man yath ma jwa jwa, man apoka yen ma lim lim.

¹⁸ Bin, wek waduira cil kugweno ku mer; Wek waketh anyong’a negwa giwa ku mer.

¹⁹ Kum ng’atu ma nico mbe pacu; Ecidho i woth ma bor:

²⁰ Ecidho kud usau sente; Ebidwogo pacu cing’ dwi.

²¹ Eketho eyio ire ni kum wec pare dupa ma mit; Esage ku wec pare ma mit mananu mi dendhoge

²² Elubo ng’eye ndhu ndhu nica, Calu koni dhiang’ ma cidho i kathum, Kadi calu ng’atu acel ma i kol ucidho ba ponji pa jakasegu;

²³ Cil ma athero cobo cwinye; Calu winyo ringo pio bang’ uwic, Man eng’eyo ngo nia en e pi kwo pare.

²⁴ Ka kumeno kawono, wota, wuwinja, Man wuketh cwinywu kum lembe m’i dhoga.

²⁵ Kud iyi adundeni nen ba yo pare; Kud ikier i yo pare.

²⁶ Kum eredho dupa ku lero i kumgi: Eyo, ju m’enego gin udul ma dit.

²⁷ Ot pare ni yo bang’ liel. Ma loro piny ba kusika mi tho.