Lembrieko 4 - The Holy Bible In Alur (Lur) Revised Orthography

Kony mi Rieko

¹ Wuwinji, wota, ponji pa wego, Man wuketh cwinywu kara wung’ei ng’eyothelembe:

² Kum amio iwu ponji ma ber; Kud wuwek cik para.

³ Kum an a wod vwa, A ng’ic man a jamer kende i wang’ ma.

⁴ Man eponja, man ewacu ira kumae: Wek adundeni mok kum lembe para: Wor lembang’ola para, man ibed kwo;

⁵ Nwang’ rieko, nwang’ ng’eyothelembe; Wii kud uwil, kadok aloka de kud ilokri cen kum lembe m’i dhoga;

⁶ Kud iweke, man ebigwoki; Mare, man ebikuri.

⁷ Rieko en e gin m’usagu; ka kumeno nwang’ rieko; Eyo, karacelo ku gin ceke m’igamu gam ng’eyothelembe.

⁸ Dode, e ebidodi; Ebiyungi, tek imoko i kume.

⁹ Ebimio ruko mi bero i wii; Ebimio iri jamkermiwic mi dwong’.

¹⁰ Winji, E woda, man ijol lembayera para; Man nindo mi kwo peri bibedo dupa

¹¹ Aponji i yo mi rieko; Atelo wii i yo m’atira.

¹² Kinde m’icidho, dakutielo peri bibedo arida ngo; Man tek iringo, ibikier ungo.

¹³ Mak ponji ki; kud iwek ecidhi: Gwoke; kum en e kwo peri.

¹⁴ Kud imond i yo pa jadubo. Man kud iwoth i yo mi dhanu ma rac.

¹⁵ Rob ku cen, kud ikadh kud i vute; Lokri cen kud i bang’e, man ikadhi.

¹⁶ Kum ginindo ngo, tek gitimo rac ungo; E nindo lal i wang’gi, tek gikuketho jumoko podho ngo.

¹⁷ Kum gicamu kwen mi dubo, Man gimadhu pigulok mi rop.

¹⁸ Ento yo mi ju ma pwe calu der mi rupiny, Ma cikusagre asaga ku rieny cil kum ceng’ ma cu.

¹⁹ Yo pa jadubo en e calu mudho: Ging’eyo ngo gin ma bologi.

²⁰ Woda, keth cwinyi kum lembe para; Leng’ ithi ni wec para.

²¹ Kud iyi giai i weng’i; Gwokgi i dier adundeni.

²² Kum gi kwo ni ju m’unwang’ugi, Man gi tego ni ring’kumgi ceke.

²³ Gwok adundeni kud amora ceke; Kum lembe mi kwo ai i ie.

²⁴ Cor dhok mi kier cen kud i kumi, Man icor dendhok ma kite mbe cen kud i kumi.

²⁵ Keth weng’i nen yor i weng’i, Man wek biendweng’i nen atira weng’i.

²⁶ Ii pid cu pi yo mi tiendi, Man wek yo peri ceke cungi.

²⁷ Kud ilokri yo ku cing’ ma yor acwic kadi yor acam: Kab tiendi kum lem ma rac.