Lembrieko 31 - The Holy Bible In Alur (Lur) Revised Orthography

Ponji ni Ubimo

¹ Lembe p’ubimo ma Lemuel ma min uponje ko.

² Ang’o, woda? man ang’o, E nyathin ma nico m’i ia? Man ang’o, E nyathin ma nico mi lembang’ola para?

³ Kud imi tego peri ni mon, Kadi yo peri de ni ju ma nyotho ju m’ubimo.

⁴ E ber ungo ni ju m’ubimo, E Lemuel, e ber ungo ni ju m’ubimo ya gimadh pigulok; Kadi ni judongomawijo niwacu kumae, Giramadha ma lake tek ni kani?

⁵ Gimaru madhu, man wigi wil kum cik, Man gimaru loko lembapoka mi nyithindho mi can ceke.

⁶ Mi giramadha ma lake tek ni ng’atu ma ni ceng’ni nyothre, Man pigulok ni ju ma cwinygi cot:

⁷ Wek emadhi, man wie wil kum canpiny pare, Man kud epoi kum ruvwa pare kendo.

⁸ Al dhogi ni adhura, Kum lembe mi dhanu ceke ma juwekogi kendgi.

⁹ Al dhogi, pok lembe pwe, Man tim lembapoka ni jucan ku jucanpiny.

Foc pi Dhaku ma Ber

¹⁰ Ng’a ma copo nwang’u dhaku ma beri? Kum wel pinje sagu jambruko mi kidi ma kwar.

¹¹ Adunde cware gene, Man can kuloka binege ngo.

¹² Etime ber rac re ngo Nindo ceke mi kwo pare.

¹³ Eyenyo yuk rombe man atutu, Man etimo tic ku cinge ku berocwinye.

¹⁴ En e calu combo mi jukuloka; Egamu kwen pare ku bor.

¹⁵ Eceu kinde ma fodi piny kuru ngo, Man emio cemo ni juode, Man tic ni bong’ pare.

¹⁶ Epido pi podho, man eng’iewe; Epidho podho mir ulok ku nying’ ma cinge cego.

¹⁷ Etwio piere ku tego, Man edwoko bote tek.

¹⁸ Eneno gin m’engiewo kulokane nuti; Thala pare tho ngo ku diewor.

¹⁹ Eketho cinge kum jambcwic, Man cinge maku yend jambcwic.

²⁰ Erieyo cinge kum jucan; Eyo, erieyo cinge kum jucanpiny.

²¹ Elworo pei ungo kum juode; Kum juode ceke gironjri ku kendi ma kwar ngbo.

²² Etimo girapedha ire gire; Kendi pare bongu ma nwang’ ma nwe nwe man m’uluga.

²³ Jung’eyo cware ku dhugang’, Kinde m’ebedo ku judongo mi ng’om.

²⁴ Etimo kendi ku bongu ma nwang’ man elokogi, Man emio foto mi pier ni jukuloka.

²⁵ Tego ku dwong’ en e kendi pare; Man eng’iero kum nindo m’ubebino.

²⁶ Ealu dhoge ku rieko; Man cik mi bedober ni i lebe.

²⁷ Eneno woth mi juode cu, Man ecamu kwen mi nyap ungo.

²⁸ Nyithindho pare ai, man gilwong’e jamugisa; Cware bende, man epake, ewacu kumae:

²⁹ Nyig dhanu dupa gitimo cu, Ento isagugi ceke.

³⁰ Bero en e awondi, man leng’wang’ kulokane mbe; Ento dhaku ma lworo Yehova, jubipake.

³¹ Mi ire kum nying’ mi cinge; Man wek tic pare pake i dhugang’.