Lembrieko 11 - The Holy Bible In Alur (Lur) Revised Orthography

¹ Mukero mi ndra en e ginmajudagu ni Yehova; Ento mukero ma cu en e mutoro pare.

² Kinde ma kuhaya bino, lewic lund bino; Ento rieko bedo ku ju ma mol.

³ Bedocu mi ju m’atira bitelo wigi; Ento lem ma kite mbe mi weg abombi binyothogi.

⁴ Piny kulokane mbe i ceng’ mi kwinyo; Ento bedopwe bodhojo ni tho.

⁵ Bedopwe pa ng’atu ma cu binyutho ire yo; Ento jadubo bipodho ku dubo pare gire.

⁶ Bedopwe mi ju m’atira bibodhogi; Ento jubimaku jutim ndra ku kier migi gigi.

⁷ Kinde ma jadubo tho, genogen pare nyothre; Man genogen mi kier nyothre.

⁸ Ng’atu ma pwe both kud i can; Man jadubo bino kakare.

⁹ Ng’atu ma ayi Mungu mbe i kume nyotho jadhugola pare ku dhoge; Ento ng’atu ma pwe biboth ni kum ng’eyong’ec.

¹⁰ Kinde ma lembe bedo miero ni ju ma pwe, anyong’a nego adhura; Man kinde ma judubo rwinyo, woi bedo nuti.

¹¹ Judodo adhura ni kum mugisa mi ju m’atira; Ento jung’ielo adhura ku dhu judubo.

¹² Ng’atu ma cayu jadhugola pare nwang’u rieko mbe kude; Ento ng’atu ma won ng’eyothelembe bedo ling’.

¹³ Ng’atu ma wotho ku lembe kun ku kun etuco wi lembamung’a; Ento ng’atu mi cwiny mi bedo mandha nyono lembe.

¹⁴ Ka ma telowic mi rieko mbe, dhanu podho; Ento lembe bedo ber ni kum udul juporlembe.

¹⁵ Ng’atu ma bedo mukwatu pa jawirok bitur ma rac; Ento ng’atu ma dagu mukwatu bedo museme.

¹⁶ Dhaku mi bero nwang’u yung; Man dhanu ma jurop nwang’u piny.

¹⁷ Ng’atu ma won kisa timo ber kum ng’eyong’ec pare gire; Ento ng’atu ma pire rac sendo ring’kume gire.

¹⁸ Jadubo nwang’u sukulia mir awondi; Ento ng’atu ma coyo bedopwe sukulia pare en e andha.

¹⁹ Ng’atu m’umoko kum bedopwe tundo kum kwo; Man ng’atu m’ulubo tok lem ma rac nwang’u etime ni tho pare gire.

²⁰ Ju ma kit adundegi mbe gi ginmajudagu ni Yehova; Ento wadi ju ma gi cu i yo migi gin anyong’a pare.

²¹ Kadok cing’ ribre ku cing’, ng’atu ma rac bibedo mbe send ungo; Ento kodhi ju ma pwe biboth.

²² Calu gwilo mi mola ma kwar i um kul, E dhaku ma kume leng’ ma riu umbe kude bedo kumeca.

²³ Yeny ma ju ma pwe yenyo en e gin ma ber kende; Ento genogen mi judubo en e kwinyo.

²⁴ Gin moko nuti ma kethre man ecikumedre asu; Man gin moko nuti ma cero gin m’umaku piny ento ekelo canpiny kende.

²⁵ Ng’eyong’ec ma mio piny bicwe; Man ng’atu ma kwoyo pi jubikwoyo pi i wie gire bende.

²⁶ Ng’atu ma cero cam, dhanu bilame; Ento mugisa bibedo wi ng’atu ma loke.

²⁷ Ng’atu ma yenyo bero kud amora nwang’u eyenyo mer; Ento ng’atu ma yenyo lembe ma rac, ebiwok i wie.

²⁸ Ng’atu m’ugeno piny pare ebipodho; Ento lembe mi ju ma pwe bibedo miero calu uboko ma numu.

²⁹ Ng’atu ma sendo ot pare gire bibedo ku yamu ni aba; Man ng’atu ma kite mbe bibedo jatic ni won adunde mi rieko.

³⁰ Nying’ ng’atu ma pwe en e yen mi kwo; Man ng’atu ma riek ketho dhanu both.

³¹ Nen, jubiculo wang’ lembe ni ng’atu ma pwe i ng’om; Jubiculo wang’ lembe pa ng’atu ma rac ku jadubo ma sagu dit!