Lembanyutha 8 - The Holy Bible In Alur (Lur) Revised Orthography

Ayi mir Abirone man Tabu mi Mola ma Kwar mir Udok ma Ng’wice Ng’ar

¹ Man kan ealu ayi mir abirone, piny uling’ ti i polo i kinde mi ng’et saa acel.

² Man aneno malaika abiro m’ucungo wang’ Mungu; man jumio igi agwara abiro.

³ Man malaika mange bino cungo nyim pemblam, m’ebedo ku tabu mi mola ma kwar mir udok ma ng’wice ng’ar; man jumio ire udok ma ng’wice ng’ar dupa, kara emede ku rwo mi jumaleng’ ceke wi pemblam mi mola ma kwar, ma ni i nyim komker.

⁴ Man yiro mir udok ma ng’wice ng’ame, karacelo ku rwo mi jumaleng’, uidho malu i wang’ Mungu kud i cing’ malaika.

⁵ Man malaika ting’o tabu mir udok ma ng’wice ng’ar; man epong’e ku mac mi pemblam, man ebole wi ng’om: e m’ulubo maeno morpolo, ku dwal, man lukoth, ku digidi de.

Agwara

⁶ Man malaika abiro ma weg agwara giyikri gigi mi kudho agwara.

⁷ Man malaika ma kwong’ane kudho agwara, m’ulubo maeno pei ku mac, m’ujebre ku rimo, man jubologi wi ng’om: man theng ng’om mir adege wang’ pet, man mir adege mi yedhi de wang’ pet, man lum ceke ma numu wang’ pet.

⁸ Man malaika mir arionde kudho agwara, e calu got ma dit ma mac ubewang’u jubolo i nam: man theng nam mir adege doko ni rimo;

⁹ man theng yedi mir adege m’i nam utho, cil gin ma gi weg kwo; man theng combo mir adege nyothre.

¹⁰ Man malaika mir adege kudho agwara, e cero ma dit uai kud i polo podho, m’ubewang’ va ridhro, man epodho wi theng kulo mir adege, man wi pi ma dhenyni;

¹¹ man nying’ cerone julwong’o Yendadra: man theng pi mir adege doko ni yendadra; man dhanu dupa tho ku pige, kum judwokogi kec.

¹² Man malaika mir ang’wende kudho agwara, e jugoyo theng ceng’ mir adege, ku theng dwi mir adege, man theng cero mir adege; kara theng piny mir adege yuthi, man rupiny kud ubed nuti ni theng piny mir adege, man diewor de kumeca.

¹³ E aneno, man awinjo acur acel, m’eberingo i kor polo, m’ebewacu ku dwal ma dit kumae, Can, can, can, ni ju m’ubedo wi ng’om, kum dwal mange mir agwara mi malaika adek, ma gibikudho agwara macen.