Lembanyutha 14 - The Holy Bible In Alur (Lur) Revised Orthography

Wer mi Dhanu rubanga 144

¹ E aneno, man nen, Nyathi Rombo cungo wi got Sayuni, ku dhanu rubanga dak acel ku pier ang’wen wi ang’wen, ma nyinge, ku nying Won de, ugore ternyimgi.

² Man awinjo dwal m’uai i polo, pami dwand pi dupa, man calu dwand morpolo ma dit: man dwalne m’awinjo ubedo calu jubodho m’ubegoyo adungu migi:

³ man giwero calu en e wer ma nyen i wang’ komker, man i wang’ yedi ang’wen ma kwo ku judongo: man ng’atu moko mbe ma copo ng’eyo weje ndhu dhanu rubanga dak acel ku pier ang’wen wi ang’wen, ma gi ju ma jung’iewogi kud i ng’om.

⁴ Joni gi ju ma gicido ngo ku mon; kum gi ju ma sumba. Joni gi ju ma gilubo Nyathi Rombo ku ba ka m’ecidho i ie ceke. Joni jung’iewogi kud i kind dhanu, ya gibed ni landu mwoka ni Mungu man ni Nyathi Rombo.

⁵ Man junwang’u ndra ngo i dhoggi: lembe de mbe i wigi.

Lembayera mi Malaika Adek

⁶ Man aneno malaika mange m’uberingo i kor polo, m’e won lembanyong’a ma nja m’eyero ni ju m’ubedo wi ng’om, man ni thek ceke ku suru ku dhok man dhanu;

⁷ man ewacu ku dwal ma dit, Wulwor Mungu, man wumie dwong’: kum saa mi pokolembe pare wok: man wurwo ni ng’atu m’ucwio polo ku ng’om ku nam ku kulo ma dhenyni bende.

⁸ Man mange, malaika mir arionde, m’ulubo ng’eye, ewacu kumae, Babeli ma dit, upodho, upodho m’eketho thek ceke gimadhu pigulok mi kwinyo mi tarwang’ pare.

⁹ Man malaika mange, mir adege, ulubo ng’eigi, m’ewacu ku dwal ma dit kumae, Tek ng’atu moko rwo ni yedi kud ayine de, man ejolo kiedo ternyime kadi i cinge,

¹⁰ en bende ebimadhu kum pigulok mi kwinyo pa Mungu, m’ubedo ayika m’ajeba ngo i kikombe mi ng’ecwiny pare; man jubimie ndiba ma ku mac man muganga i wang’ malaika maleng’, man i wang’ Nyathi Rombo:

¹¹ man yiro mi ndiba migi idho malu rondo ku rondo; man yom umbe igi dieceng’ ku diewor, gi ju m’urwo ni yedi kud ayine de, ku ju m’ujolo kiedo mi nyinge.

¹² Keni en e twiocwiny mi jumaleng’, gi ju ma giworo lembang’ola pa Mungu, ku yioyic pa Yesu.

¹³ Man awinjo dwal m’uai i polo wacu kumae, Kieu kumae, Mugisa ni ju m’utho m’utho i Rwoth ugambre kawono: eyo, Tipo wacu, kara giyom ni tic migi ma gimuli kudo; kum tic migi lubogi.

Mwoka mi Ng’om

¹⁴ E aneno, man nen, afuru ma tar; man aneno ng’atu m’ubedo wi afurune calu wod dhanu, ma jamkermiwic mi mola ma kwar ni i wie, man uligu ma bith ni i cinge.

¹⁵ Man malaika mange ai i hekalu, ekok ku dwande ma dit ni ng’atu m’ubedo wi afuru kumae, Or uligu peri, man inyar: kum saa mi nyar uwok; kum mwoka mi ng’om ucek hai.

¹⁶ Man ng’atu m’ubedo wi afuru bolo uligu pare i ng’om; man ng’om unyare.

¹⁷ Man malaika mange ai i hekalu m’i polo, en bende e won uligu ma bith.

¹⁸ Malaika mange ai kud i pemblam, en e ng’atu ma won tego kum mac; man elwong’o ku dwal ma dit ni ng’atu ma won uligu ma bith, ewacu kumae, Or uligu peri ma bith, man icok njuru nying ulok m’i ng’om; kum nyinge poicek.

¹⁹ Man malaika bolo uligu pare i ng’om, man ecoko nying ulok m’i ng’om, man ebole i pany pigulok, pany ma dit mi pigulok, mi kwinyo pa Mungu.

²⁰ Man pany pigulok juyoke woko ng’ei adhura, man rimo ai kud i pany pigulok, cil ni utwindi mi riuni, cil ungolo dak ang’wen.