Lembanyutha 13 - The Holy Bible In Alur (Lur) Revised Orthography

Yedi Ario

¹ Man ecungo wi kwio ma dhu nam. Man aneno yedi ai i nam, ma tunge apar wie ke abiro, man jamkermiwic apar ni wi tunge, man nying’ mir acidi ni i wie.

² Man yedine m’aneno ayine pamir ayi ng’u, man tiende pa tiend wai, dhoge ke pami dhu umvor: man ng’ec umio tego pare ire, ku komker pare, ku ng’ol ma dit.

³ Man aneno wie acel calu juthume ni tho; man rem mi tho pare kei: man i ng’om ngung’ uwang’ lii kum yedine;

⁴ man girwo ni ng’ec, kum emio ng’ol pare ni yedi; man girwo ni yedine, giwacu kumae, Ng’a ma calu yedi maeni? man ng’a ma copo kiedo lwiny kude?

⁵ man jumio ire dhok ma yero gin ma dit ku lembacidi; jumio ng’ol de ire m’etim ko tic pare dwi pier ang’wen wi ario.

⁶ Man eng’amu dhoge mi lembacidi kum Mungu, m’ecid ko nyinge, ku hema pare, cil ju m’ubedo i polo.

⁷ Man jumio ire ya etim lwiny ku jumaleng’, eloi kogi de: man jumio ire ng’ol wi suru kubang’gi kubang’gi ku dhanu man dhok man thek.

⁸ Man dhanu ceke m’ubedo wi ng’om birwo ire, ma nying’gi kugore ngo i kitabu mi kwo pa Nyathi Rombo ma juthumo ugambre i thek ma ng’om uthekre ko.

⁹ Ng’atu ma tek ithe nuti, dong’ ewinji.

¹⁰ Tek ng’atu moko en e jathebkol, e ecidho i kol: tek ng’atu moko binego ku palamularu, en de jubikonege be ku palamularu. Twiocwiny ku yioyic mi jumaleng’ ni keni.

¹¹ Man aneno yedi mange ai i ng’om uidho malu; tunge ario calu pa nyathi rombo, man eweco calu ng’ec.

¹² Man etimo ku ng’ol ceke pa yedi ma kwong’ane i wang’ yedine. Man eketho ng’om ku ju m’ubedo i ie de girwo ni yedi ma kwong’ane, ma rem mi tho pare kei.

¹³ Man etimo giranyutha ma dit, kara eketh cil mac uai i polo ulor i ng’om i wang’ dhanu.

¹⁴ Man ebombo ju m’ubedo wi ng’om ni kum giranyutha ma jumio ire etim i wang’ yedi; m’ewacu ko ni ju m’ubedo wi ng’om, ya gitim ayi yedi m’ubedo ku rem ma jutong’e ko ku palamularu man ebedo kwo.

¹⁵ Man jumio ire y a eyui lietho ire, cil ni ayi yedine, kara ayi yedine weci, kara dhanu ceke de ma girwo ngo ni ayi yedine juneggi.

¹⁶ Man eketho ceke, ma thindho ku ma dongo, man julonyo ku jucan, man paker ku jumiru, ya juthei kiedo i cing’gi ma yor acwic, kadi i ternyimgi;

¹⁷ man kara ng’atu moko bed umbe ma copo ng’iewo gin moko ire kadi ma loko gin moko, ndhu ng’atu ma kiedo ni i kume, en e nying’ yedine kadi wel mi nyinge.

¹⁸ Maeni rieko. Ng’atu ma won ng’eyong’ec, dong’ ekwan wel yedine; kum en e wel ng’atu moko: man wel pare en e dak abusiel ku pier abusiel wi abusiel.