Jupoklembe 21 - The Holy Bible In Alur (Lur) Revised Orthography

Mon ni Jubenyamini

¹ Nie dhanu mir Israel gikwong’o kwong’ i Mizpa, giwacu kumae, Ng’atu moko mbe i kindwa ma bimio nyare ugom Benyamin.

² Man dhanu gibino Beth-el, e gibedo keca cil uthieno i wang’ Mungu, man giting’o dwandgi malu, e giywak ku can.

³ Man giwacu kumae, E Yehova, Mungu mir Israel, nedi maeni timbre i Israel, ma nia suru acel urem i Israel tini?

⁴ Man etimbre urwone, nia dhanu giai malu pir kugweno, man giguro pemblam keca, man githiero lam m’awang’a ku lam mi kwiocwiny.

⁵ Man nyithindho mir Israel giwacu kumae, Ng’a ma nuti i kind suru ceke mir Israel m’uidho malu ngo i cokri ba Yehova? Kum nwang’u gitimo kwong’ ma dit pi ng’atu m’uidho malu ngo ba Yehova i Mizpa, giwacu kumae, Jubinege andha.

⁶ Man nyithindho mir Israel ewinygi lokre kum Benyamin m’umingi, man giwacu kumae, Suru acel ukabre woko ku kum Israel tin.

⁷ Wabitimo nenedi ma wan wang’ ko mon ni ju m’udong’, kum wakwong’o ku Yehova nia wabimio nyigwa ngo igi ugomgi?

⁸ E giwacu kumae, Ng’a m’i kind suru mir Israel m’uidho malu ngo i wang’ Yehova i Mizpa? Man, nen, ng’atu moko mbe m’ubino ba gonjo kud i Yabec-gilead i cokri.

⁹ Kum ka jukwanu dhanu, nen, ju m’ubedo i Yabec-gilead moko mbe ma nuti keca.

¹⁰ Man udul gioro dhanu rubanga apar wi ario m’i kind ju ma ratego, man ging’olo igi, giwacu kumae, Wucidh wugoi ju m’ubedo Yabec-gilead ku lak palamularu, ku mon man nyithindho.

¹¹ Man maeni en e gin ma wubitimo: wubinyotho co kot kubang’gi kubang’gi, man mon de kubang’gi kubang’gi m’udaru vuto ku co.

¹² E ginwang’u nyir ma sumba dak ang’wen, ma fodi gikung’eyo co ngo ku vuto kudo, i kind ju m’ubedo i Yabec-gilead; man gikelogi i gonjo ba Cilo, ma en e i ng’om Kanan.

¹³ Man udul dhanu dho gioro giyero ni nyithindho pa Benyamin ma gini i cana Rimon, man giyero kwiocwiny igi.

¹⁴ E Benyamin udwogo i nindo maeca; man gimio igi nyir ma giboth ma kwo ku kind mon m’i Yabec-gilead: ento fodi giromogi ngo.

¹⁵ Man dhanu giloko ewinygi pi Benyamin, kum Yehova ketho abala i suru mir Israel.

¹⁶ E judongo mir udul gilund giwacu kumae, Wabitimo nenedi ma wanwang’ ko mon ni ju m’udong’, kum junyotho mon kud i Benyamini?

¹⁷ E giwacu kumae, Maku aba ubed nuti be ni ju m’uboth pa Benyamin, kara suru kud ukabre woko kud i Israel.

¹⁸ Ento wacopo mio mon ma kind nyigwa ngo igi; kum nwang’u nyithindho mir Israel gikwong’o, giwacu kumae, Kwong’ ubed wi ng’atu m’umio dhaku ni Benyamin.

¹⁹ Man giwacu kumae, Nen agba pa Yehova nuti i Cilo ku ba rundi ku ba rundi, ma en e yor ariwa ma malu ni Beth-el, yo nyangu mi gengi m’uai Beth-el uidho Cekem, man yor ariwa ma piny ni Lebona.

²⁰ Man ging’olo ni nyithindho pa Benyamin, giwacu kumae, Wucidh wupond i podho mir ulok:

²¹ man wunen, man, nen, tek nyir m’i Cilo wok woko nimielo miel, e wuwok woko kud i podho mir ulok, man kubeng’wu kubeng’wu ng’atuman umak dhaku pare i kind nyir m’i Cilo, man wudok i ng’om pa Benyamin.

²² Man ebibedo, ka weggi kadi uturneggi gibino kud adote i bang’wa, nia wabiwacu igi kumae, Wumigi iwa ku berocwiny; kum wagamu mon ungo ni dhanu kubang’gi kubang’gi i lwiny, kadok amia de wumiogi ngo igi; tek kumeno ngo kuno di wubedo ma lembe ni i wiwu kawono.

²³ Man nyithindho pa Benyamin gitimo kumeca, man gigamu igi mon, calku wel migi, i kind ju m’umielo miel, ma gicidho kugi: e gicidho gidok bang’ aba migi, man gigomo adhura, e gibedo i igi.

²⁴ Man nyithindho mir Israel giai keca i nindo maeca, ku ba dhanu nzu ng’atuman ba suru pare man ba wat pare, man giai ku keca ku ba dhanu nzu ng’atuman bang’ aba pare.

²⁵ I nindo maeca ubimo mbe i Israel: ku ba dhanu nzu ng’atuman timo gin m’ubedo ber i wang’e gire.