Jupoklembe 19 - The Holy Bible In Alur (Lur) Revised Orthography

Jalawi ku Dhaku m’araga Pare

¹ Man etimbre i ceng’ maeca, kinde m’ubimo mbe i Israel, nia Jalawi moko bedo ni umondo yor i wang’ ng’om gudi pa Efraim, m’egamu ire dhaku m’araga kud i Beth-lehem-yuda.

² Man dhakune m’araga etimo tarwang’ ejai ko ire, man eweke ecidho ba ot pa won i Beth-lehem-yuda, man ebedo kuca nindo mi dwi ang’wen.

³ E cware ai, man elubo toke, kara enyebe, ekele kendo, nwang’u jatic pare ni kude, ku kana ario: man etere i ot pa won; man ka won nyaku nene, anyong’a nege kum girombo kude.

⁴ Man jalkwaru mire, ma won nyaku, ucere; e ebedo kude ceng’ adek: kum kumeno gicamu man gimadhu, man givuto keca.

⁵ Man etimbre i ceng’ mir ang’wende, nia giai pir kugweno, man eai malu kara ecidhi: man won nyaku wacu ni jal wode kumae, Mi tego ni adundeni ku cemo moko, man yo ku ng’eye wubicidho mu.

⁶ Kum kumeno gibedo piny, man gicamu gimadhu de, gin ario karacelo: man won nyaku wacu ni ng’atuca kumae, Akwei, dong’ ebed ber iri ya ibed diewor soro, man wek anyong’a neg adundeni.

⁷ Man ng’atuca ai malu kara ecidhi; ento jalkwaru mire cung’e, man evuto keca kendo.

⁸ Man eai malu pir kugweno i ceng’ mir abije kara ecidhi; man won nyaku wacu kumae, Akwei, mi tego ni adundeni, man ibed cil ma ceng’ upodho ko; e gicamu, gin ario.

⁹ Man ka ng’atuca giai malu kara gicidhi, en, ku dhaku pare m’araga, man jatic pare, jalkwaru mire, ma won nyaku, wacu ire kumae, Nen, kawono ceng’ uvoc, akwei ibed ku diewor soro: nen, ceng’ umaku mwony, vut keni, kara anyong’a neg adundeni; man urwone Wucidh i yo mu pir kugweno, kara idok thu.

¹⁰ Ento ng’atuca yio ngo ebed ku diewor maeno, ento eai malu ecidho, manewok kum Yebus (ma en e Yerusalem): man kana ario ni kude m’ubedo ayika mi woth; dhaku pare m’araga bende ni karacelo kude.

¹¹ E kinde ma giwok ceng’ni Yebus, ceng’ uvoc; e jatic uwacu ni jadit pare kumae, Akwei, bin, wek warob i adhura maeni mi Juyebusi, wavut i ie.

¹² E jadit pare wacu ire kumae, Wabirobo ngo i adhura pa jawirok, ma en e mi nyithindho mir Israel ungo; ento wabikadhu lokaca i Gibeya.

¹³ Man ewacu ni jatic pare kumae, Bin wacor ceng’ni ka maeni moko m’i kindgi; man wabivuto i Gibeya, kadi i Rama.

¹⁴ Kum kumeno gikadhu gicidho acidha; man ceng’ upodho i wigi nwang’u gini ceng’ni Gibeya, ma adhura pa Benyamin.

¹⁵ Man girobo keca kara gimond givut i Gibeya: man emondo, e ebedo piny i gengi mir adhurane; kum ng’atu moko mbe m’ugamugi ya givut i ot pare.

¹⁶ Man, nen, ng’atu m’uti uai i tic pare m’i podho uthieno: nwang’u ng’atuca en e dhanu m’i ng’om gudi pa Efraim man ebedo ni umondo i Gibeya: ento dhanu ma keca gi Jubenyamini.

¹⁷ Man eting’o wang’e, e eneno jawoth i gengi mir adhurane; man ng’atu m’uti wacu kumae, Icidho kani? man iai kani?

¹⁸ Man ewacu ire kumae, Wabekadhu akadha ma waai ko i Beth-lehem-Yuda wabecidho yo ku ma bor m’i ng’om gudi pa Efraim; aai kuca man acidho Beth-lehem-Yuda: man kawono abecidho ba ot pa Yehova; man ng’atu moko mbe m’ugama i ot pare.

¹⁹ Karacelo ku maeni lum ku cemo nuti kudwa ni kana mwa; man kwen ku pigulok bende nuti ira, man ni bong’ peri, man ni jalawobi ma ni karacelo ku jutic peri: gin moko mbe ma cande nuti.

²⁰ Man dhanu m’uti wacu kumae, Kwiocwiny ubed i beng’i; ento wek gin m’urem iri ceke ubed i wia: ento kud ivut i gengi.

²¹ Kum kumeno ekele i ot pare, man emio cemo ni kana; man gilwoko tiendgi, man gicamu gimadhu de.

²² Man ka gibenyayu mutoro i adundegi, nen, dhanu mir adhurane, ma gi dhanu moko ma rac, gitieko ot kingili, ma gidwong’o ko dhugola; man giyero ni won ot, ma ng’atu m’utine kumae, Wodh ng’atu m’ubino i ot peri woko, kara wang’eye.

²³ Man ng’atu maeno, ma won ot, ewok woko i bang’gi, man ewacu igi kumae, Ungo, juwada, akwayuwu, kud wutim gin ma rac ma kumeni; kum ng’atu maeni mondo i ot para, kud wutim kasegu maeni.

²⁴ Nen, nyara ni keni en e nyaku ma sumba, man dhaku pa ng’atuno m’araga abiwodhogi woko kawono, wujwiggi, man wutim kugi gin ma wuneno ber i weng’wu: ento kud wutim kasegu ma kumeni kum ng’atu maeni.

²⁵ Ento dhanu maeni giwinjo ire ngo: kum kumeno ng’atuca maku dhaku m’araga pare, man ekele woko i bang’gi; man ging’eye, gitime rac diewor soro cil kugweno: man ka piny uru, giweke ecidhi.

²⁶ E dhakune lund ubino ka mombwa thumo, man epodho piny i dhugola pa ng’atuca ka ma rwoth pare ni i ie, cil ma piny ulero ko.

²⁷ E rwoth pare ai malu kugweno, man eyabu dhugola mi ot, e ewok woko kara ecidh i yo pare; man, nen, dhaku m’araga pare podho piny i dhugola mi ot, ku cinge wi the dhugola.

²⁸ Man ewacu ire kumae, Ai malu, wacidhu; ento ng’atu moko mbe m’uloko lembe: elund eting’e malu wi kana; e ng’atuca ai malu, man ecidho i kakare.

²⁹ Man kan ebino i ot pare, egamu pala, man emaku dhaku pare m’araga, man etong’o ie, ku ba cogone, wath apar wi ario, man eore ku ba kieu ceke mir Israel ngung’.

³⁰ Man etimbre, nia dhanu ceke m’uneno maeni giwacu kumae, Wagi gin ma kumeni fodutimbre ngo kadok anena de ugambre i ceng’ ma nyithindho mir Israel giidho ie kud i ng’om Misiri cil tin: wupid pire, wupor lembe, man wuyer.