Jupoklembe 17 - The Holy Bible In Alur (Lur) Revised Orthography

Mungu m’araga pa Mika

¹ Man ng’atu moko nuti m’i ng’om gudi pa Efraim, ma nyinge Mika.

² Man eyero ni min kumae, sente mi mola ma tar dak apar wi acel ma juyaku kud i beng’i, m’ikwong’o pire, man iyere bende i itha, nen, mola ma tarne eni i bang’a; agame an. Man min uwacu kumae, Mugisa pa Yehova ukwany woda.

³ Man edwoko sente ma tar dak apar wi acel ba min; man min uwacu kumae, Andha athiero mola ma tarne ni Yehova, uai kud i cinga ni woda kara eng’ik ayi gin m’acwia man ethiedh ayi gin m’atwaga: ka kumeno kawono abidwoke i beng’i.

⁴ E kan edwoko sente ba min, min ugamu sente mi mola ma tarne dak ario, man emiogi ba jabodho, m’etimo kudo ayi gin m’acwia m’ang’ika kud ayi gin m’acwia m’atwaga: man eni i ot pa Mika.

⁵ Man ng’atu ma Mikane bedo ku ot mi mungu, man etimo ugoke, man mungu m’acwia, man ethiero wode acel, m’edoko jalam pare.

⁶ I ceng’ maeca ubimo moko mbe i Israel; ku ba dhanu ceke ng’atuman timo gin m’ubedo atira i wang’e gire.

⁷ Man jalawobi moko nuti m’uai Beth-lehem-yuda, mi wat pa Yuda, ma en e Jalawi; e ebedo kuca ni umondo.

⁸ Man ng’atuno ai kud i adhura, kud i Beth-lehem-yuda, kara ecidh ebed ni umondo i ka ma tek ebinwang’u; man ebino i ng’om gudi pa Efraim ba ot pa Mika, kan ebewotho.

⁹ E Mika wacu ire kumae, Iai kani? Man ewacu ire kumae, An a Jalawi m’i Beth-lehem-yuda, man acidho nibedo ni umondo i ka ma tek abinwang’u ci.

¹⁰ Man Mika wacu ire kumae, Wabed wakudi, man ibed ira ni wego man ni jalam, man abimio iri sente mi mola ma tar apar ku ba rundi ku ba rundi, man kendi, ku cemo peri. Kum kumeno Jalawi mondo.

¹¹ E Jalawi yio nibedo ku ng’atuno; man jalawobine bedo ire calu ng’atu acel ma kind wote.

¹² Man Mika thiero Jalawi, e jalawobine doko jalam pare, man ebedo i ot pa Mika.

¹³ Mika lund uwacu kumae, Kawono ang’eyo nia Mungu bitima ber, kum abedo ku Jalawi ni jalam para.