Jukolosai 3 - The Holy Bible In Alur (Lur) Revised Orthography

¹ Ka kumeno tek juting’owu karacelo ku Kristu, wuyeny gin ma ni malu, ka ma Kristu ni i ie, m’ejany ko yo ku cing’ Mungu ma yor acwic.

² Wuketh pidoiwu kum gin ma malu, kum gin ma wi ng’om ungo.

³ Kum wutho, man kwo mu bedo apana karacelo ku Kristu i Mungu.

⁴ Ka Kristu, ma kwo mwa, binyuthre, e wun bende wubilund nyuthru wukugi i dwong’.

Bedo Mwa ma Con ku Bedo Mwa ma Nyen

⁵ Ka kumeno wuneg wathkumwu ma gini i ng’om: tarwang’, sasa, awanya ma rac, ayiri, ku ketho cwiny hai kum piny, ma en e rwo ma ni gin m’acwia;

⁶ kum gin maeni kwinyo pa Mungu wok wi wot juco:

⁷ ma wun bende yang’ wuwotho i ie, kinde ma fodi wubedo i gin maeni;

⁸ ento kawono wun bende dong’ wucorgi ceke cen: ng’ecwiny, ku kwinyo, kud akece, ku cayucac, ku lemblewic ma ai kud i dhogwu:

⁹ kud wucwai ndra ma nia ng’atuman uewai ni wadi man ni wadi: kum wudaru wanyu ng’atu ma con cen ku tic pare de,

¹⁰ man wuronyo ng’atu ma nyen, m’ubecikudoko nyen ku ng’eyong’ec calu ayi ng’atu m’ucwie:

¹¹ ma kadok Jayunani kadi Jayahudi, kadi yaa, kadok yaango de, kadi dhanu ma sai, kadok Jakuthi, kadi ng’eca, kadi paker de ceke gicopo bedo i ie ngo; ento Kristu re en e gin ceke, man i gin ceke.

¹² Ka kumeno wurony, calu dhanu ma Mungu goyo wigi, ma leng’ man jumer de, adunde mi ngisi, ku bedo ber ku dhanu, ku ming’o, ku molcwiny, ku mwonyo lembe hai;

¹³ ma wuoi ko lembe ma kum juwedu ma ng’atuman uoi lembe ma kum wadi man kum wadi, ma wuwek ko lembe ma kum juwedu ma ng’atuman uwek lembe ma kum wadi man kum wadi, tek ng’atu moko lembe ni i ie kum ng’atu moko: cil calu Rwoth uweko lembe mu, e wun bende wutim kumeno:

¹⁴ man ma sagu gin maeni ceke wurony mer, ma en e twic mi doko cu ma ndhu.

¹⁵ Man wek kwiocwiny pa Kristu bim wi adundewu, ni maeni bende julwong’owu i kum acel: man wubed ma wufoyo foc.

¹⁶ Wek lembe pa Kristu sagre i iwu; i rieko ceke ma wubeponjru man wubejukru ku lembwer man wer ku wer mi tipo, ma wubewero ku bero i adundewu ni Mungu.

¹⁷ Man gin ceke ma tek wutimo, i lembe kadi i tic, tim ceke i nying Rwoth Yesu, ma wufoi ko Mungu ma Wego ni kume.

Gin ma Watim i Woth ma Nyen

¹⁸ Mon, wubed wor ni cogwu, calu m’umaku piny i Rwoth.

¹⁹ Wu cogmon de, wumar mondwu, man kud wukecgi.

²⁰ Nyithindho, wuwor junyodo mu i gin ceke, kum maeni nyayu mutoro i Rwoth.

²¹ Wego, kud wunyai ng’ecwiny i nyithindho mu, kara kud wukab cwinygi.

²² Jumiru, wuwinj dwand judongo m’i wiwu ma ku kum i gin ceke; ku tic ma ku wang’ ungo, calu ma dhanu maru, ento kud adunde acel, mi lworo Rwoth:

²³ gin ceke ma tek wutimo, wutim ku cwinywu ceke, calu ni Rwoth, ni dhanu de ngo;

²⁴ ma wung’eyo ko nia wubigamu sukulia mi camupacu ba Rwoth: wutimo ni Rwoth Kristu.

²⁵ Kum ng’atu m’utimo rac ebinwang’u kendo en nini m’etimo rac: man dhanu tung’ tung’ ungo.