Jugalatia 3 - The Holy Bible In Alur (Lur) Revised Orthography

¹ E Jugalatia ma wun adhura, ng’a m’urambuwu, ma juketho Yesu Kristu ma juguro kele i weng’wu?

² Maeni kende m’ayenyo ang’ei i beng’wu, Wujolo Tipo ni kum tic mi ciki kadi ni kum winjo mi yioyici?

³ Wun wun adhura kumeno ngi? wun ma wutheko lembe ni kum Tipo, meno be kawono wudoko ndhu cu ni kum kumi?

⁴ Wusendru ku giki dupa kumeni ngi mananu? tek en e mananu andha.

⁵ Ka kumeno ng’atu m’umio iwu Tipo, etimo musana de i kindwu, etimo ku tic mi ciki, kadi ku winjo mi yioyici?

⁶ Cil calu Ibrahim uyio Mungu, man jukwane ire ni bedopwe.

⁷ Dong’ wung’ei kumeno nia ju ma gi mi yioyic, gin e ma gi wot Ibrahim.

⁸ Man lembagora pa Mungu, m’ular uneno nia Mungu bigonyo lembe ma wi Thekdhanumange ku yioyic, elar eyero lembanyong’a ma juboth ko ni Ibrahim, ewacu kumae, Thek ceke bibedo jumugisa ni kumi.

⁹ Ka kumeno ju ma gi weg yioyic gidoko jumugisa gikud Ibrahimgi ma ng’atu mandha.

¹⁰ Kum dhanu ceke ma gi weg tic mi cik gini the kwong’: kum egore kumae, Kwong’ ni wi dhanu ceke ma gikubedo ngo ku gin ceke m’ugore i kitabu mi cik, ma gitim kogi de.

¹¹ Nie ebedo ngbeng’, ya ng’atu moko mbe ma lembe m’i wie gonjre i wang’ Mungu ku tic mi cik: kum weg bedopwe gibikwo ni kum yioyic;

¹² man cik en e mi yioyic ungo; ento, Ng’atu m’utimogi ebikwo ni kumgi.

¹³ Kristu waruwa kud i kwong’ mi cik, en e m’edong’ ecopo dhu kwong’ kakawa; kum egore kumae, Kwong’ ni i wi dhanu kubang’gi kubang’gi ma julierogikoryen:

¹⁴ kara mugisa pa Ibrahim umak Thekdhanumange ni kum Kristu Yesu: kara wajol lembang’ola mi Tipo ni kum yioyic.

Cik ku Lembang’ola

¹⁵ Umego, awacu calu ma dhanu wacu: Kadok en e lembariba mi dhanu kende, ento ka judaru ketho ecungo, ng’atu moko mbe ma thire, kadi ma mede de.

¹⁶ Nie lembang’ola pa Mungu jung’olo ni Ibrahim, man ni nyakware. Ewacu ngo kumae, Man ni nyikwaye, calu ya gi dupa; ento calu ma acel, Man ni nyakweri, ma en e Kristu.

¹⁷ Kawono awacu maeni: Lembariba ma Mungu yang’ ular uketho ecungo, e cik, m’ubino rundi dak ang’wen ku pier adek yo ng’eye, uketho edoko mananu ngo, ma nia ebin ethir lembang’ola.

¹⁸ Kum tek camupacu en e mi ciki, nwang’u en e mi lembang’ola ngo kendo: ento Mungu mie ni Ibrahim ku lembang’ola.

¹⁹ Cik ulund ubedo girang’o? Emedre ni kum dubo, cil maram nyakware biwok ko ma lembang’ola yere i kume; man ekethre ni kum malaika ku cing’ jarib.

²⁰ Nie jarib en e jarib pa ng’atu acel ungo; ento Mungu en e acel.

Tic mi Cik

²¹ Ka kumeno cik ujai kum lembang’ola pa Mungu? Awene: kum tek cik umire ma copo ketho kwo, meca bedopwe copo bino ni kum cik andha.

²² Ento lembagora pa Mungu ciko ba gin ceke the dubo, kara lembang’ola mi yioyic i Yesu Kristu umire ni ju m’uyio.

²³ Ento ma fodi yioyic kuwok ungo, juketho wabedo akura the cik, juciko bang’wa cil maram yioyic maeni binyuthre ko macen.

²⁴ Kum kumeno cik ubedo ni japonji mwa m’ukelowa ba Kristu, kara lembe m’i wiwa gonjre ku yioyic.

²⁵ Ento kawono ma yioyic uwok, wabedo the tiend japonji kendo ngo.

²⁶ Kum wun ceke wu wot Mungu, ni kum yioyic, i Kristu Yesu.

²⁷ Kum wun ceke ma jumio baputisi iwu i Kristu wuronyo Kristu.

²⁸ Jayahudi kadi Jayunani de mbe, jamiru kadi ng’atu ma jamiru ngo de mbe, nico kadi nyaku de mbe; kum kewu ceke wu ng’atu acel i Kristu Yesu.

²⁹ Man tek wu pa Kristu, meca wu nyikwai Ibrahim, wu jucampacu calku lembang’ola.