Jufilipi 3 - The Holy Bible In Alur (Lur) Revised Orthography

¹ Aha a, umego, anyong’a negwu i Rwoth. Goro iwu ma calku ma kwong’a, eola ngo, ento e ber iwu.

² Wubed ku weng’wu kum gwogi, wubed ku weng’wu kum jutic ma rac, wubed ku weng’wu kum ju ma thumo kum:

³ kum wan wa weg yaa, ma warwo ku Tipo pa Mungu, e walula i Kristu Yesu, man wageno mwa kum ungo:

⁴ nwang’u an nini e m’acopo geno cil i kum: tek ng’atu mange ie wacu ya egen kum, nwang’u an e m’asagu:

⁵ jutimo yaa i kuma i ceng’ mir aborane, ma a nyakwar Israel, mi suru pa Benyamin, Jaebrania mi Juebrania; pi lembe mi cik, a Jafarisayo;

⁶ pir ava tic ke, anyayu ragedo kum kanisa; pi bedopwe ma ni i cik ke, junwang’a ma lembe mbe i wia.

⁷ Ento giki ma naka gi kuloka ira, maeni akwanugi ni gin m’uoi mananu kum Kristu.

⁸ Eyo andha, man akwanu gin ceke ni gin m’uoi mananu kum bero mi ng’eyong’ec pa Kristu Yesu ma Rwoth para: gin ceke oi mananu ira pire, man akwanugi ni usabu kende, kara anwang’ Kristu,

⁹ man junwang’a i ie, m’abedo ku bedopwe para an ungo, cil maeno ma mi cik, ento maeno ma en e mi yioyic pa Kristu re, bedopwe m’uai ba Mungu ni kum yioyic:

¹⁰ kara ang’eye, ku tego mi cer m’ecer ko, ku ripocwiny mi sendri pare, m’abedo ko ni ayi tho pare;

¹¹ tek acopo tundo kum cer ma kind ju m’utho ku yo moko.

Acwala Nitundo Kakara

¹² Calu m’adaru nwang’u ngo, kadi judaru dwoka ndhu cu de ngo: ento abecikucwala, tek kuno nyo acopo maku maeca ma Kristu Yesu bende maka ni kume.

¹³ Umego, fodi akwandra gira ngo ya amaku: endre gin acel abetimo, ma wia wil kum gin ma ni i ng’eya, m’abecwala rut kum gin ma ni i wang’a de,

¹⁴ abecwala kara atund kakara kum sukulia mi lwong’o ma malu pa Mungu ni kum Kristu Yesu.

¹⁵ Ka kumeno, dong’ wan ma wang’wa teng’ni kum lembe, wabed ku pidoic ma kumeno: man ke tek wubedo ku pidoic ma tung’ i gin moko, e Mungu binyutho maeni bende iwu:

¹⁶ mae kende, i maeni ma wadaru wok i ie, dong’ wawothu ku lembe ma calacel.

¹⁷ Umego, wukwany bang’a karacelo, man wunen ju ma giwotho kumeni cil calu wan ma wajupori weng’wu.

¹⁸ Kum dupa giwotho, m’adaru yero pigi iwu wang’ udul, kawono de ayero iwu cil ku ywak, nia gi judegi mi yen m’athara pa Kristu:

¹⁹ ma kajik migi en e nyoth, usauigi e ma mungu migi, man kulula migi ni i lewic migi, ma giketho migi pidoigi kum gin m’i ng’om.

²⁰ Kum thuwa ni i polo; wabekuro Jalar bende m’ebiai kuca, en e Rwoth Yesu Kristu:

²¹ m’ebiloko kumwa mi lewic udok nyen, kara edok pami kume mi dwong’ pare, calku tego m’ecopo bimo ko wi gin ceke i bang’e gire.