Juefeso 3 - The Holy Bible In Alur (Lur) Revised Orthography

¹ Kum lembe nini an a Paolo, ma jakol pa Kristu Yesu pi wun ma wu Thekdhanumange,

² tek ebedo kumeno ya wuwinjo pi tic mi pokopok mi bero maeni pa Mungu m’umire ira iwu;

³ maram juketho ang’eyo ko giramung’a ni kum nyuthonyuth calu alar agoro ku lembe ma nyanok,

⁴ ku maeni, ka wusomo, wucopo ng’eyo ng’eyong’ec para i giramung’a pa Kristu;

⁵ ma kum dhanum’utuk mange juketho eng’eire ngo ni wot dhanu, calu ma kawono enyuthre ni jukwenda pare ma leng’ man jubila i Tipo;

⁶ ya, Thekdhanumange gi juwagi jucampacu, man gi juwagi wathkum mi kum acel, man juwagi jugam kum lembang’ola i Kristu Yesu ni kum lembanyong’a ma juboth ko,

⁷ ma judwoka jatimne, calku giramia mi bero maeno pa Mungu m’umire ira calku tim m’etimo mi tego pare.

⁸ Bero maeni jumio ira, an nini m’a nok ma sagu jumaleng’ ceke, ya ayer pi lonyo pa Kristu ma yenjre ngo ni Thekdhanumange;

⁹ ya aketh dhanu ceke de ginen karamb tic mi pokopok mi giramung’a m’ugamu pandre por yang’ con i Mungu m’ucwio gin ceke;

¹⁰ kara kwond rieko pa Mungu ma dupa ung’eire kawono ni ker man tego i ka mi polo ni kum kanisa,

¹¹ calku yeny ma ie yenyo ma nja i Kristu Yesu Rwoth mwa:

¹² ma wabedo ku tegocwiny i ie, ku mondo ma wamondo ko i bang’e, ku genogen, ni kum yioyic mwa ma wayie ko.

¹³ Kum kumeno akwayu y a cwinywu kud udieng’ kum masendi m’asendra ko piwu, ma en e dwong’ mu.

Ng’eyo mer pa Kristu

¹⁴ Kum lembe nini arum wi conga ni Wego,

¹⁵ ma julwong’o ire nying wat ceke kubang’gi kubang’gi mi polo ku ma wi ng’om bende,

¹⁶ kara emi iwu, calku lonyo mi dwong’ pare, ya tego medre iwu ni kum Tipo pare i ng’atu m’i iwu;

¹⁷ kara Kristu bed i adundewu ni kum yioyic; kara wun, ma ulegwu daru mondo unyang’ de i mer,

¹⁸ wubed ku tego karacelo ku jumaleng’ ceke ma wung’ei ko karamb lacne ku kaborne man kadongone ku kathuthne,

¹⁹ man kung’eyo mer pa Kristu ma sagu ang’eya, kara jupong’wu ni pong’ pa Mungu ceke.

²⁰ Nie ni ng’atu m’ecopo timo dit apila ma sagu gin ceke ma wapenjo kadi ma wapido pire, calku tego m’ubetimbre i iwa,

²¹ dong’ dwong’ ma i kanisa ku ma i Kristu Yesu ubed ire cil ku dhanum’utuk ceke rondo ku rondo de. Amen.