Juefeso 2 - The Holy Bible In Alur (Lur) Revised Orthography

¹ E wun eketho wukwo, ma nwang’u wun avu ni kum kier mu ku dubo mu,

² ma naka wuwotho i ie calku kura mi ng’om maeni, calku jadit mi tego mi lietho, mi tipo ma kawono ubetimo i wot juco;

³ ma wan ceke bende naka wabedo i kindgi i awanya ma rac mi kumwa, ma watimo ava mi kum ku mi pidoic, man ku kura wa nyithindho mi kwinyo, cil calu dong’ dhanu:

⁴ ento Mungu, m’usagre ku kisa, ni kum mer pare ma dit m’emaru kowa,

⁵ cil ma fodi wan avu ni kum kier mwa, eketho wakwo karacelo ku Kristu (wuboth ni kum bero),

⁶ man eketho wacer wakugi, man eketho wajany karacelo wakugi i ka mi polo, i Kristu Yesu:

⁷ kara i rundi ma bibino enyuth lonyo ma apila mi berone i bedober ma yor i bang’wa i Kristu Yesu:

⁸ kum wuboth ku bero ni kum yioyic; man maeno ai i beng’wu giwu ngo, en e giramia pa Mungu;

⁹ en e mi tic ungo, kara ng’atu moko kud ulule.

¹⁰ Kum wan wa bodho pare, ma jucwiowa i Kristu Yesu pi tic ma ber, ma Mungu lar uyiko kara wawoth i igi.

Judoko Acel i Kristu

¹¹ Kum kumeno dong’ wupoi, nia naka wun, ma wu Thekdhanumange i kum, ma wulwongru Yaango ni maeno ma julwong’o Yaa, i kum, ma jutimo ku cing’:

¹² ya nwang’u i nindo maeca wukoc ku Kristu, ma judwoko wu tung’ kud udul pa Israel, ku welo de ni lembariba mi lembang’ola, ma genogen umbe kudu, Mungu de mbe kudu, i ng’om.

¹³ Ento kawono i Kristu Yesu wun ma naka wuni bor judwoko wu ceng’ni i rimo pa Kristu.

¹⁴ Kum en e kwiocwiny mwa, m’edwoko ario doko ni acel, man emoro gang’ m’i diere mir apoka woko,

¹⁵ ma nwang’u ekabu adegi i kume, ndhu cik mi lembang’ola ma ni i lembapoka; kara ecwi ng’atu acel ma nyen i ie gire kud ario, m’etimo ko kwiocwiny;

¹⁶ man kara epot kindgi ni Mungu gin ario i kum acel ni kum yen m’athara, nwang’u edaru nego adegine kude:

¹⁷ man ebino ekelo kwiocwiny iwu ma nwang’u wuni bor ngbir, man kwiocwiny ni ju ma gini ceng’ni:

¹⁸ kum ni kume wan ario wa nwang’u mondo mwa ma wamondo ko ba Wego i Tipo acel.

¹⁹ Kum kumeno wun wu welo ku juwoth de kendo ngo, endre wu jung’om karacelo ku jumaleng’ man mi juot pa Mungu,

²⁰ ma wugombru wi kathere mi jukwenda ku jubila, Yesu Kristu en e m’e kidi ma dwong’ mi gui;

²¹ ma giragoma ceke kubang’gi kubang’gi ni i ie, m’umoko karacelo cu, m’ebedongo ni hekalu ma leng’ i Rwoth;

²² ma wun bende wugombru karacelo i ie ni kabedo pa Mungu i Tipo.