Juebrania 5 - The Holy Bible In Alur (Lur) Revised Orthography

¹ Kuni ku ba jalam ma dit, ma jugamu i kind dhanu, jukethogi pi dhanu i gin ma pa Mungu, kara emi giramia ku lam de pi dubo:

² m’ecopo oyo lembe mi ju ma cobo ku ju ma kier, kum en gire bende eni i ng’ic;

³ kum kumeno calu ewodho lam pi dhanu ca, ekoewodh pire gire bende kumeno de, pi dubo.

⁴ Man ng’atu moko mbe m’ugamu yung maeni ire gire, ento kan elwongre ni kum Mungu, cil calu Harun.

⁵ Kumeno Kristu bende yungre gire ngo ya jukethe ni jalam ma dit, ento ng’atu m’uyero ire kumae, In i Woda; Tin anyoli:

⁶ calu eyero i kamange bende kumae, In i jalam mi nja Calu wagi pa Melkizedek.

⁷ En ma i ceng’ maeni mi kume, nwang’u ewodho rwo ni Mungu ku kwayukwac ma ku ywak ma tek ku piwang’ ni ng’atu ma copo lare ni tho, m’ewinjre de ni kum lworo pare ma ayi Mungu ni i kume,

⁸ kadok en e Wod, ento egamu ng’eyo woro ni kum gin m’esendre kudo;

⁹ en ma judaru dwoke ndhu cu, edoko jathekboth ma rondo ku rondo ni ju ma giwore ceke;

¹⁰ m’elwongre ku Mungu ni jalam ma dit calu wagi pa Melkizedek.

Ponji ya ku Jubadhri kum Yioyic

¹¹ Wabedo ku lembe dupa ma wayer pire ma tuco there tek, kum wudoko udhing’.

¹² Kum ni kum nindo emaku wubed juponji, ento wuyenyo ya ng’atu moko ponjwu kendo ku ponji ma kwong’a mi lembatheka mi wec pa Mungu; man wudoko ni wagi ju ma can cak negogi, man cam m’alili re ngo.

¹³ Kum ku ba dhanu ceke ma camu cak nwang’u eng’eyo lembe mi bedopwe ngo; kum en e mukere.

¹⁴ Ento cam m’alili en e ni dhanu m’uteng’ni, gi ju ma ni kum timo ma gitimo ng’eyong’ec migi bedo ayika mi ng’io gin ma ber ku gin ma rac.