Juebrania 3 - The Holy Bible In Alur (Lur) Revised Orthography

Yesu Sagu Musa

¹ Kum kumeno, umego ma leng’, ma jurib mi Lwong’o m’i polo, iwu pid pi Jakw’enda man Jalam Madit mi lembatuca mwa, en e Yesu:

² ma en e mandha ni ng’atu m’ukethe, calu yang’ Musa bende bedo i ot pa Mungu ceke.

³ Kum jukwane ya eromo dwong’ ma sagu Musa, calu jagomot bedo ku yung ma sagu yung mi ode.

⁴ Kum ku ba udi ceke m’agoma dhanu gomo en: ento ng’atu m’ugomo gin ceke en e Mungu.

⁵ Man andha Musa bedo mandha i ot pa Mungu ceke va jatic, mi lembatuca mi gin maeno ma biyere macen;

⁶ ento Kristu re calu wod, wi ot pa Mungu; ma ode en e wan nini, tek wamaku tegocwiny mwa ki man kulula mi genogen mwa ku tego cil i kajikne.

Yom pi Dhanu pa Mungu

⁷ Kum kumeno, cil calu Tipo Maleng’ uwacu kumae, Tin tek wubiwinjo dwande,

⁸ Kud wudwok adundewu nwang’, calu m’i ceng’ camuco, Calu m’i ceng’ muloic m’i yamba.

⁹ Ka ma wegwu gimulo ia i ie ku ponj ma giponja ko, Man gineno tic para rundi pier ang’wen,

¹⁰ Kum kumeno lembe ton i ia kum dhanum’utuk maeni, Man awacu kumae, Gidubo thiri thiri ku yo i adundegi: Ento ging’eyo yo para ngo;

¹¹ Calu akwong’o i kwinyo para kumae, Gibimondo i yom para ngo.

¹² Wubed ku weng’wu, umego, kara adunde ma rac ma yioyic umbe i ie kud ubed i ng’atu moko m’i kindwu, i kier ma jukier ko woko kum Mungu ma kwo:

¹³ ento wujukru ceng’ ku ceng’, cil i nindo ma julwong’o Tin; kara ng’atu moko m’i kindwu cwinye kud udok nwang’ kud abombi mi dubo:

¹⁴ kum wan wadoko jugam waku Kristugi, tek wamaku thek ma genogen mwa thekre ko ki cil i kajikne:

¹⁵ kinde ma lembe waere kumae, Tin tek wubiwinjo dwande, Kud wudwok adundewu nwang’, calu m’i ceng’ camuco.

¹⁶ Kum ng’a, m’ucamu co ma nwang’u gidaru winjo? eyo, dhanu ceke ma giai kud i Misiri ni kum Musa ngo?

¹⁷ Man lembe ton i ie i kum ng’a rundi pier ang’weni? en e kum ju m’udubo, ma kumgi podho i yamba ngo?

¹⁸ Man ekwong’o ni ng’a ya gibimondo ngo i yom pare, en e ni ju ma gicamu co ngo?

¹⁹ E waneno nia gicopo mondo ngo kum yioyic m’umbe.