Isaya 9 - The Holy Bible In Alur (Lur) Revised Orthography

Nyol man Bim pa Jaditmawijo mi Kwiocwiny

¹ Ento yimpiny bibedo umbe ku ng’atu ma naka ni i ndiba. I nindo ma kwong’a ekelo ng’om Zebulun ku ng’om Naftali i cac; ento i nindo ma cen eyunge, ku yor i nam, loka Yordan, Galilaya mi thek.

² Dhanu m’uwotho i mudho gineno der ma dit: gi ju ma gibedo i ng’om mi tipo mi tho, der urieny i wigi.

³ Imedo thek, inyayu mutoro migi: anyong’a negogi i weng’i calkud anyong’a mi rmvoka, calu anyong’a nego dhanu kinde ma gipoko ayeki.

⁴ Kum ituro mberembere mi ter pare, man jamjeng’ mi goke, ma uluth pa jasende, calu i nindo mi Midian.

⁵ Kum jamtho ceke pa won jamtho i yakni, man kendi ma jujung’o i rimo, bibedo mir awang’a, ni yen mi mac.

⁶ Kum nyathin unyole iwa, man nyathin ma nico mire iwa; e bim bibedo wi goke: man jubilwong’o nyinge Wang’uic, Japorlembe, Mungu ma Jatego, Wego mi Nja, Jaditmawijo mi Kwiocwiny.

⁷ Kajik mi nyai mi bim pare man mi kwiocwiny bibedo mbe, wi komker pa Daudi, man wi ker pare, kara uketh ecungi, man kara ujenge ku pokolembe man ku bedopwe ugambre kawono cil nja. Ngiri pa Yehova mir udul bitimo maeni.

Ng’ecwiny pa Yehova kum Israel

⁸ Rwoth uoro lembe ba Yakobo, man epodho wi Israel.

⁹ Man dhanu ceke gibing’eyo, cil Efraim ku ng’atu m’ubedo i Samaria, m’uwacu ku kuhaya man ku cwinygi ma tek kumae,

¹⁰ Biriki podho, ento wabigomo ku kidi m’apaya; jung’olo yen m’udinyo piny, ento wabiketho musonge kakagi.

¹¹ Ka kumeno Yehova bidodo jusend pa Rezin malu i kume, man ebithubo judegi pare,

¹² Jucami yor i wang’, man Jufilisti yor i ng’ec; e gibicamu Israel ku dhok m’ang’ama. Kadok maeni ceke timbre ng’ecwiny pare lokre woko ngo, ento cinge rieire asu.

¹³ Ento fodi dhanu lokre ngo ba ng’atu m’ugoyogi, kadi Yehova mir udul de giyenyo ngo.

¹⁴ Ka kumeno Yehova bithumo wie ku yib woko ku bang’ Israel, jang’ thith kud usi, i ceng’ acel.

¹⁵ Jadit ku won yung, en e wie; man jabila m’uponjo ku ndra, en e yib.

¹⁶ Kum ju m’utelo wi dhanu maeni giketho gikier; man ju ma gitelo wigi junyothogi.

¹⁷ Ka kumeno anyong’a binego Rwoth ungo kum awobi migi, kadok ngisi de binege ngo kum tic migi ku mon ma coggi tho; kum kubang’gi ceke ng’atuman en e ng’atu m’ucido man jatim rac, man ku ba dhok ceke weco lem ma kite mbe. Kadok maeni ceke timbre de ng’ecwiny pare lokre woko ngo, ento cinge rieire asu.

¹⁸ Kum dubo wang’u calu mac; ewang’u ucok kud ukudho; eyo, ecwinjre i kind susu mi luli, e giidho malu i mbegi mi yiro.

¹⁹ Ng’om uwang’ kot ni kum kwinyo pa Yehova mir udul; man dhanu bedo calu jambmac: ng’atu moko mbe ma kisa nege kum wadi.

²⁰ Man ng’atu moko bimayu i cing’ ma yor acwic, man kec binege; e ebicamu i cing’ ma yor acam, man gibiyeng’ ungo: ku ba dhanu ceke ng’atuman bicamu ring’kum bote gire: Manase bicamu Efraim; Efraim ke,

²¹ Manase; e gin ario gibibedo kum Yuda. Kadok maeni ceke timbre ng’ecwiny pare lokre woko ngo, ento cinge rieire asu.