Isaya 8 - The Holy Bible In Alur (Lur) Revised Orthography

Nying’ Wod Jabila

¹ Man Yehova wacu ira kumae, Gam iri ban ma dit, man ikieu i wie ku! kalamu mi pi mi dhanu kumae, Ni Maher-calal-hac-baz;

² man abigamu ira jumulembe mandha kara gikieu, en e Uria ma jalam, ku Zekaria ma wod Yeberekia.

³ E acidho ba dhaku ma jabila; e egamu ie, man enyolo nyathin ma nico. E Yehova lund uwacu ira ku! mae, Lwong’ nyinge Maher-calal-hac-baz.

⁴ Kum ma fodi nyathinne bibedo ku ng’e, yong’ec mi ywak kumae ngo, Vwa, man, Ma, e lonyo mi Dameski kud ayeki mi Samaria jubiyaku i wang’ ubimo mir Ascur.

⁵ E Yehova yero ira kendo, ewacu kumae,

⁶ Kum calu dhanu maeni gikwero pi mi Ciloa ma mol lwe lwe, man anyong’a negogi kum Rezin ku wod Remalia;

⁷ ka kumeno kawono, nen, Rwoth bikelo pi mi Kulo, ma tek man dupa, en e ubimo mir Ascur ku dwong’ pare ceke i wigi: man ebiidho malu wi kamol mi pi ceke, e ebicore wi ng’et kulone ceke;

⁸ man ebicore i Yuda; ebimwonye man ebikadhu kud i ie; ebitundo cil kum ng’ut; e riec mi bombe bipong’o kalac mi ng’om peri, E Imanuel.

⁹ Wuyakni, E kodhidhanu, man wutur nziki nziki; e wucik ithwu, wun ceke ma wuni i ng’om ma ngbir: wutwiru giwu, man wutur nziki nizki; wutwiru giwu, man wutur nziki nziki.

¹⁰ Wupor lembe karacelo, e jubidwoke mananu; wuyer lembe, e ebicungo ngo: kum Mungu ni karacelo kudwa.

Wek Yehova Ubed ni Lworo Peri

¹¹ Kum Yehova yero kumeni ira ku cing’ ma tek, man eponja ya kud awoth i yo mi dhanu maeni, ewacu kumae,

¹² Kud wuwac kumae, Rop, kum gin ceke ma dhanu maeni biwacu pire kumae, Rop; kadi kud wulwor lworo migi, kadi bebe de kud umakwu pire.

¹³ Yehova mir udul, wubidwoke leng’ en; man wuwek ebed lworo mu, man wuwek ebed bebe mu.

¹⁴ Man ebibedo ni kamaleng’; ento ni kidi mi redhojo man ni kidi mi kier ni udi mir Israel ario, ni ngbak man ni uwic ni ju m’ubedo i Yerusalem.

¹⁵ Man dupa bikier i wie, e gibipodho, man gibitur, e jubimakugi, man jubiyakugi.

¹⁶ Twi lembatuca, mwon ayi kum cik kind julubna.

¹⁷ E abikuro Yehova, m’upanu wang’e ni ot pa Yakobo, e abikie.

¹⁸ Nen, an ku nyithindho ma Yehova mio ira wan wa mi giranyutha ku musana i Israel m’uai ba Yehova mir udul, m’ubedo wi got Sayuni.

¹⁹ Man kinde ma gibiwacu iwu kumae, Wuyeny ba ju ma weg tipo man bang’ ajoga, ma kok man ma weco mung’ mung’: maku dhanu yeny ba Mungu migi ngo? maku giyeny pi ju ma kwo ba ju m’utho?

²⁰ Ba cik man ba lembatuca! tek giweco ngo calku lembe maeni, andha rupiny umbe igi.

²¹ E gibikadhu kud i ie, ma can unegogi hai kec de negogi; man ebitimbre nia, kinde ma kec ubinegogi, gibiywagri gigi, man gibikwong’o kwong’ kud ubimo migi man ku Mungu migi, e gibiloko wang’gi malu:

²² e gibineno yo ba ng’om, man, nen, lem ma tek ku mudho yimpiny mi ndiba; man jubiriemogi cen i mudho ma bii.