Isaya 7 - The Holy Bible In Alur (Lur) Revised Orthography

Juk ma Kwong’ane pa Isaya ni Ahaz

¹ Man etimbre i nindo pa Ahaz ma wod Yotham, ma wod Uzia, m’ubimo mi Yuda, nia Rezin m’ubimo mir Cami, man Peka ma wod Remalia, m’ubimo mir Israel, giidho ba Yerusalem kara gitim ali i kume, ento gicopo make ngo.

² E juyero maeni ni ot pa Daudi, juwacu kumae, Cami uribo lembe ku Efraim. E adundene miel, man adunde dhanu pare, calu yen m’i luli yengre ku yamu.

³ Yehova lund uwacu ni Isaya kumae, Cidh kawono kara wuromb kud Ahaz, in, ku Ceyar-yacub ma wodi, i kajik mi soro mi pi mi kut ma yo malu, i yo ma dit mi podho pa jalwokpiny;

⁴ man iwac ire kumae, Bed ku weng’i, man ibed yo; lworo kud unegi, kadok cwinyi de kud uvoci, kum yib ario maeni mi dhumac ma dunyo yiro, kum ng’ecwiny ma lake tek pa Rezin man Cami, man pa wod Remalia.

⁵ Kum Cami, kud Efraim, man wod Remalia, gikeco lembe ma rac i kumi giwacu kumae,

⁶ Wek waidhu kum Yuda, man wasende, man wek watim giratura i ie iwa, man waketh ubimo i diere, en e wod Tabel;

⁷ Rwoth Yehova wacu kumae, Ebicungo ngo, kadi ebitimbre de ngo.

⁸ Kum wi Cami en e Dameski, man wi Dameski en e Rezin; man Efraim bitur nziki nziki ma fodi rundi pier abusiel wi abic kutundo kakare ngo, ketho nia ebibedo dhanu ngo:

⁹ man wi Efraim en e Samaria, man wi Samaria en e wod Remalia. Tek wubiyio ngo, wubicungo ngo andha.

Lembayera pa Isaya pi Imanuel

¹⁰ E Yehova yero kendo ni Ahaz, ewacu kumae,

¹¹ Penj giranyutha ba Yehova Mungu peri; penje kadi i kathuth, kadi i kadongo ma malu.

¹² Ento Ahaz uwacu kumae, Abipenjo ngo, kadi abimulo i Yehova de ngo.

¹³ Man ewacu kumae, Wuwinj kawono, E ot pa Daudi: En e gin ma nok iwu ya wuol dhanu, ma nia wuol Mungu para bende?

¹⁴ Ka kumeno Rwoth en ebimio giranyutha iwu: nen, nyaku ma ng’won bigamu ie, man ebinyolo nyathin ma nico, e jubilwong’o nyinge Imanuel.

¹⁵ Ebicamu mo dhiang’ ku kic, kinde m’eng’eyo kwero gjn ma rac, ku foyo gin ma ber.

¹⁶ Kum ma fodi nyathinne bing’eyo kwero gin ma rac, ku foyo gin ma ber, jubiweko ng’om mir ubimo ario m’idagu.

¹⁷ Yehova bikelo i wii, man i wi dhanu peri, man wi ot pa wuru, nindo ma fod’ubino ngo, ugambre i ceng’ ma Efraim uai ie ha Yuda, en e ubimo mir Ascur.

¹⁸ Man ebitimbre i ceng’ maeca, nia! Yehova bilwong’o umio ma ni i ng’et kulo mi Misiri ma wi tung’ ku lwio, man ku mege kic ma ni i ng’om Ascur.

¹⁹ E gibibino, man gibigonjo kagi ceke i poga ma, kende, man i kind cana m’ukak, man wi arara ceke mir ukudho, man wi kakwac ceke.

²⁰ I ceng’ maeca Rwoth bilielo wie ku yir mi tielo ku riedi ma jumio sukulia pire I yo loka Kulo, en e kud ubimo mir Ascur, man ebidaru yir mi tik bende.

²¹ Man ebitimbre i nindo maeca, nia dhanu bigwoko rwaya ma kwo, ku rombe ario;

²² man ebitimbre, nia kum dit mi cak ma gibimio ebicamu mo dhiang’; kum dhanu kubang’gi kubang’gi m’udong’ i die ng’om gibicamu mo dhiang’ ku kic.

²³ Man ebitimbre i nindo maeca, nia i ka ceke kubang’e kubang’e, ka ma yendulok rubanga ni i ie ma romo mola ma tar rubanga, ebibedo mir ucok kud ukudho.

²⁴ Dhanu biwotho kuca kud atum i man athero, kum ng’om ceke bibedo ucok! kud ukudho.

²⁵ Man ungulu gudi ma jufuro ku kwer ibitundo kuca ngo ni kum lworo mir ucok kud ukudho; kum ebibedo mi tero dhiang’, man mi nyon mi; rombe.