Isaya 65 - The Holy Bible In Alur (Lur) Revised Orthography

Pokolembe wi Jucamco

¹ Jupenja ku ba ju m’uyenya ngo; anwangra ku ju m’uyenya ngo: awacu kumae, Nena, nena, ni thek m’ulwongre ku nyinga ngo.

² Athang’u cinga ceng’ du ni dhanu ma juco, m’uwotho i yo ma ber ungo, tok pidoic migi ma dhe;

³ dhanu m’unyayu ng’ecwiny i wang’a thiri thiri ma gilamu lam i pothi, ma giwang’u udok ma ng’wice ng’ar de wi birild;

⁴ m’ubedo kind liel, man m’ugonjo i ka ma ling’; m’ucamu ring’ kul, man cwe mi ginmajudagu ni i agulu migi;

⁵ m’uwacu kumae, Cung kendi, kud icor ceng’ni an, kum a leng’ ma sagu in. Joni gi yiro i uma, mac ma wang’ ceng’ du.

⁶ Nen, ebedo agora i wang’a kumae: Abibedo ling’ ungo, ento abiculo, eyo, abiculo i korgi,

⁷ kier mu giwu, man kier mi kwaruwu karacelo, Yehova wacu, ma wuwang’u udok ma ng’wice ng’ar wi gudi, ma wucida wi ungulu gudi de: ka kumeno abilar poro tic migi i korgi.

⁸ Yehova wacu kumae, Calu pigulok ma nyasa nwangre i withe, man ng’atu moko wacu kumae, Kud inyothe, kum mugisa ni i ie: abitimo kumeca kum jutic para, kara kud anyothgi ceke.

⁹ Man abiwodho kodhi kud i Yakobo, man jacam gudi para ni aba kud i Yuda; e ng’atu m’afoyo bimake ni aba, man jutic para bibedo keca.

¹⁰ Man Caron bibedo kakwae mir udul rombe, poga mir Akor de ni ka ma udul lim vuto i ie, ni dhanu para ma giyenya.

¹¹ Ento wun ma wuweko Yehova, ma wiwu wil pi got para ma leng’, ma wuyiko mesa ni mierolembe, man ma wupong’o pigulok m’ajeba ni mungu m’araga;

¹² abikethowu ni palamularu, man kewu ceke wubigung’ piny ba nek; kum kinde m’alwong’o, wuloko lembe ngo; man kinde m’aweco, wuwinjo ngo; ento wutimo gin m’ubedo rac i wang’a, man wufoyo gin m’anyong’a nega i ie ngo.

¹³ Ka kumeno Rwoth Yehova wacu kumae, Nen, jutic para bicamu, ento kec binego wu; nen, jutic para bimadhu, ento rieu binegowu; nen, anyong’a binego jutic para, ento jubinyayu lewic i wiwu;

¹⁴ nen, jutic para biwero wer ni anyong’a mir adunde, ento wubiywak ni can mir adunde, man wubigoyo nduru kum ang’abacwiny.

¹⁵ E wubiweko nyingwu ni kwong’ ba ju m’afoyo; man Rwoth Yehova binegi; man ebilwong’o jutic pare ku nying’ mange:

¹⁶ ketho nia ng’atu m’umio mugisa ire gire i ng’om bimio mugisa ire gire ni kum Mungu mi lemandha; man ng’atu m’ukwong’o kwong’ i ng’om bikwong’o kwong’ ni kum Mungu mi lemandha; kum wijo wil kum can ma kwong’a, man kum gibedo apana ni wang’a.

Polo nia Nyen ku Ng’om ma Nyen

¹⁷ Kum, nen, acwio polo ma nyen ku ng’om ma nyen; e jubipoi pi gin ma kwong’a ngo, kadi ebiwok i pidoic de ngo.

¹⁸ Ento mutoro kud anyong’a negwu thiri thiri i gin m’acwio; kum, nen, acwio Yerusalem ni anyong’a, man dhanu pare ni mutoro.

¹⁹ Man anyong’a binega ni kum Yerusalem, man mutoro ni kum dhanu para; man jubiwinjo dwal mi ywak man dwal mi goyo nduru kendo ngo i ie.

²⁰ Mukere bibedo mbe kendo ma nindo pare nok, kadi dhanu m’uti de bibedo mbe ma fodi nindo pare kuromo ngo; kum nyathin bitho nwang’u rundi pare doko dak, man jadubo ma rundi pare dak kwong’ bibedo i wie.

²¹ E gibigomo udi, man gibibedo i igi; man gibipidho podho mir ulok, man gibicamu nyinge.

²² Gibigomo ngo, ma nia ng’atu mange bed i ie en; gibipidho ngo, ma nia ng’atu mange cam en; kum calu nindo mi yen ubedo e nindo mi dhanu para kumeno, man anyong’a binego ju m’afoyo hai kum tic m’i cing’gi.

²³ Gibimuli ku tic mananu ngo, kadi gibinyol ungo mi ruvwa; kum gi kodhi mi ju ma Yehova mio mugisa i wigi, man nyikwaigi karacelo kugi.

²⁴ Man ebitimbre nia, ma fodi gilwong’o ngo, abiloko lembe; man kinde ma fodi gibeweco, abiwinjo.

²⁵ Urudi ku nyathi rombo bicamu karacelo, man umvor bicamu soka calu koni dhiang’; e utur bibedo cemo mi thwol. Gibitimo rac ungo kadi nyotho de ngo wi got ma leng’ para ceke, Yehova wacu.