Isaya 63 - The Holy Bible In Alur (Lur) Revised Orthography

Ceng’ mi Culokwor pa Yehova

¹ Maeni ng’a m’uai i Edom, ku kendi ma jukworo m’uai Bozra? maeni m’edwong’ i kendi pare, m’ubewotho i dit mi tego pare? An m’aweco ku bedopwe, m’a jarukara mi bodho.

² Pirang’o i kwar i kendi peri, man kendi peri calu ng’atu m’unyono pany mir uloki?

³ Anyono pany mi pigulok akenda; man kind kodhidhanu moko mbe kuda; eyo, anyonogi i ng’ecwiny para, man anyonogi i kwinyo para; man rimo mi kwo migi kire wi kendi para, man anyotho kendi para ceke.

⁴ Kum ceng’ mi culokwor ni i adundena, man rundi mi jupara ma juwaru wok.

⁵ E aneno, man ng’atu moko mbe mi kony; e ia wang’ kum ng’atu moko mbe mi jeng: ka kumeno bota gira kelo both ira; man kwinyo para, ujenga.

⁶ E anyono kodhidhanu i ng’ecwiny para, man amerogi ku kwinyo para, man akonjo rimo mi kwo migi woko wi ng’om.

Bero pa Yehova ba Israel

⁷ Abiweco pi mer mi bero pa Yehova ku pak pa Yehova, calku gin ceke ma Yehova mio iwa, man bero ma dit yo ba ot mir Israel, m’emio igi calku kisa pare, man calkud udul mer mi bero pare.

⁸ Kum ewacu kumae, Andha, gi dhanu para, nyithindho ma gitimo ku ndra ngo: kum kumeno en e Jalar migi.

⁹ I masendi migi ceke esendre, man malaika mi wang’e bodhogi: ewarugi ni kum mer pare man kum ngisi pare; man eting’ogi, eyeyogi de i nindo ma con ceke.

¹⁰ Ento gijai, man ginyayu can i Tipo pare ma leng’: ka kumeno elokre ni jadegi migi, man en gire ekiedo i kumgi.

¹¹ Elund epoi kum nindo ma con, pi Musa ku dhanu pare, ewacu kumae, Ng’atu m’uwodhogi woko kud i nam karacelo ku jukwac mir udul rombe pare ni kani? ng’atu m’uketho Tipo pare ma leng’ i kindgi ni kani?

¹² m’uketho bote mi dwong’ ucidho ku cing’ Musa ma yor acwici? m’upoko pi i wang’gi, kara etim ire nying’ mi nja?

¹³ m’utelo wigi kud i ka ma thuth, calu riuni i langa, ketho nia gikier ungo?

¹⁴ Calu lim m’uloro piny i poga, Tipo pa Yehova ketho giyom kumeca: itelo wi dhanu peri kumeca, kara itim iri nying’ mi dwong’.

Kwac pi Kisa Ku Kony

¹⁵ Nen piny kud i polo, man inen kud i kabedo mi leng’ peri man mi dwong’ peri: ngiri peri ku tic peri ma tek ni kani? yeny ma cwinyi yenyo ku ngisi peri giceri ira.

¹⁶ Kum in i Wegwa, kadok Ibrahim ung’eyowa ngo, man Israel uyiowa ngo: in, E Yehova, in i Wegwa, Jawar mwa m’ugambre con en e nyingi.

¹⁷ E Yehova, nedi iketho wakier kud i yo peri, man idwoko adunde mwa nwang’ ni lworo peri? Dwog ni kum jutic peri, ma suru mir aba peri.

¹⁸ Dhanu peri ma leng’ gibedo kude nindo ma nyanok kende: jusend mwa ginyono kamaleng’ peri.

¹⁹ Wadoko calu ju ma fodi k’ibimo wigi ngo, calu ju ma gilwongri ku nyingi ngo.