Isaya 62 - The Holy Bible In Alur (Lur) Revised Orthography

¹ Abiling’ ungo ni kum Sayuni, man abiyom ungo ni kum Yerusalem, ma fodi bedopwe pare ku dhenjre woko ngo calu der, man both pare calu thala m’uliel.

² Man thek bineno bedopwe peri, man ju m’ubimo ceke bineno dwong’ peri; man jubilwong’i ku nying’ ma nyen, ma Yehova bicaku ku dhoge.

³ Ibibedo jamkermiwic mi leng’ bende i cing’ Yehova, man giratwia m’i wie mi ker i cing’ Mungu peri.

⁴ Jubilwong’i Udhuru kendo ngo; kadok ng’om peri de jubilwong’o Uvuru kendo ngo: ento jubilwong’i Hefziba, man ng’om peri Beyula; kum anyong’a nego Yehova i kumi, man ng’om peri bigambre.

⁵ Kum calu jalawobi gamu mugole, e woti bigemi kumeca; man calu anyong’a nego won ambadha kum mugole, e anyong’a binego Mungu peri i kumi kumeca.

⁶ Aketho jukur wi gang’kidi peri, E Yerusalem; gibibedo ling’ ungo ku dieceng’ kadi ku diewor: wun ma wu weg poi pa Yehova, kud wuyom,

⁷ man kud wumi ire yom, ma fok’eketho ecungo ngo, man ma fok’edwoko Yerusalem ni pak ungo i ng’om.

⁸ Yehova kwong’o ku cinge ma yor acwic, man ku bot mi tego pare kumae, Andha abimio cam peri ngo ni cemo ni judegini; man juwirok bimadhu pigulok peri ma nyasa ngo, m’imuli ku tic pire:

⁹ ento ju m’upone bicame, man gibipaku Yehova; man ju m’ucoke gibimadhe i lelagang’ mi kamaleng’ para.

¹⁰ Wukadhi, wukadh ku dhugang’; wuyik yo mi dhanu; wudhur, wudhur gengi ma malu; wuwodh kidi; wuting’ abera malu mi kodhidhanu.

¹¹ Nen, Yehova yero ni kajik mi ng’om kumae, Wuwac ni Nyasayuni kumae, Nen, both peri bino; nen, sukulia pare ni kude, man sukulia pare ni i wang’e.

¹² Man gibilwong’ogi kumae, Dhanu ma leng’, man, Ju ma juwaru pa Yehova: e jubilwong’i kumae, Ng’atu ma juyenyo, man, Adhura ma juweko ngo.