Isaya 6 - The Holy Bible In Alur (Lur) Revised Orthography

Ginmawokiwang’ man Lwong’o pa Isaya

¹ I rundi ma Uzia m’ubimo tho, aneno Rwoth m’ujany wi komker, malu malu man m’utingre; e dhu kendi pare pong’o hekalu.

² Juserafi cungo malu i wie: kubang’gi kubang’gi bombgi abusiel abusiel; eumo wang’e ku bombe ario, eumo tiende ku bombe ario de, man eringo ku bombe ario.

³ Man acel ulwong’o ba wadi, man ewacu kumae, Yehova mir udul leng’, leng’, leng’: ng’om ngung’ upong’ ku dwong’ pare.

⁴ E the riu mi dhugola yengre kum dwand ng’atu m’ulwong’o, e ot upong’ ku yiro.

⁵ Alund awacu kumae, Can i wia! kum athum; kum an a dhanu mi dendhok m’ucido, man abedo i kind dhanu mi dendhok m’ucido: kum wang’a neno Ubimo, Yehova mir udul.

⁶ Serafi acel ulund uringo i bang’a ku bombe, m’ebedo ku cukmac i cinge, m’egamu ku makasi ku wi pemblam:

⁷ man emulo ko dhoga, e ewacu kumae, Nen, maeni mulo dendhogi; e kier peri kabre woko, man juweko dubo peri.

⁸ E awinjo dwand Rwoth, m’uwacu kumae, Abioro ng’a, man ng’a ma bicidho iwa? Alund awacu kumae, Anuti eni; ora.

⁹ Man ewacu kumae, Cidhi, man iyer ni dhanu maeni kumae, Wuwinj andha, ento kud wung’ei; wunen andha, ento kud wunen.

¹⁰ Dwok adunde dhanu maeni mio, man dwok ithgi pek, man mi wang’gi; gimaru neno ku wang’gi, man gimaru winjo ku ithgi, man gimaru ng’eyo ku cwinygi, man gimaru lokri kendo, man gimaru cangu.

¹¹ Alund awacu kumae, Rwoth, rokani? E eloko lembe kumae, Maram adhura bibedo ko ni uvuru ma ng’atu moko mbe i ie, man udi ma dhanu mbe i ie, man maram ng’om bidoko ko ni uvuru ma gwei,

¹² man maram Yehova tero ko dhanu bor cen, man ka ma juweko bedo dupa i kind ng’om.

¹³ Man tek fodi apaje ni i ie, en bende jubiwang’e: calu yen ma nok, man calu bongu, ma dunde dong’, kinde ma juredhogi piny; e kumeca kodhi ma leng’ en e dunde.