Isaya 57 - The Holy Bible In Alur (Lur) Revised Orthography

¹ Weg bedopwe rwinyo, e ng’atu moko mbe ma paru pire; man jukabu jukisa woko, man ng’atu moko mbe ma paru nia jukabu weg bedopwe ni gin ma rac ma bibino.

² Emondo i kwiocwiny; giyom i kavuto migi, kubang’gi kubang’gi ng’atu m’uwotho i lembatira pare.

³ Ento wucor ceng’ni keni, wu wot dhaku ma ajoga, wu kodhi ng’atu ma dubre swa ku won asara.

⁴ Wung’oe kum ng’a? wung’amu dhogwu, man wuwodho lebwu kum ng’a? wu nyithindho mi gondri ngo, wu kodhi mi ndra ngo,

⁵ wun ma wucego kumwu kind mungu m’acwia, the yen m’uluk kubang’e kubang’e; m’unego nyithindho i poga, the can a m’ukaki?

⁶ Makapiny peri en e kind kidi ma foth mi poga; gin, gi gagi peri; ikonjo lam m’akonja igi, ithiero girathiera. Abijukra kum gin maeni?

⁷ Iketho kavuto peri wi got ma wiu m’utingre de; iidho kuca bende kara ilam lam.

⁸ Man iketho jampoi peri i ng’ei dhugola ku mbegi: kum iyebri giri ni ng’atu mange ma an ungo, man iidho malu; idwoko kavuto peri lac, man itimo lembariba kugi: imaru kavuto migi ka m’inene i ie.

⁹ Man icidho bang’ ubimo ku mo, e imedo girang’wia peri, man ioro judhogi bor, man icidri giri cil i liel.

¹⁰ Iol ku yo peri ma bor; ento iwacu ngo kumae, En e mananu: inwang’u girameda mi tego peri; ka kumeno ivoc ungo.

¹¹ Man lworo ku bebe negi kum ng’a, ma nia icwai ndra, man ipoi pira ngo, kadi can de nego cwinyi ngo? abedo ling’ hai ungo, man ilwora ngo?

¹² Abiyero pi bedopwe peri; man pi tic peri, gibikelo kuloka iri ngo.

¹³ Kinde m’iywak, wek ju m’icoko gibodhi; ento yamu biting’ogi, yuyo biterogi ceke cen: ento ng’atu m’upondo i ia bimwonyo ng’om, man ebigamu got para ma leng’ ni aba.

Kony ku Cang pa Mungu

¹⁴ Man ebiwacu kumae, Wubol malu, wubol malu, wuyik yo, wukab gin ma redho jo kud i yo mi dhanu para.

¹⁵ Kum Ng’atu ma malu ma jabedo mi nja ma nyinge Leng’, uwacu kumae: Abedo i ka ma malu ma leng’ de, karacelo ku ng’atu ma cwinye lokre ma cwinye mol bende, kara adwok tipo ng’atu ma mol, man kara adwok cwiny ng’atu m’ulokre.

¹⁶ Kum abi-ii mi nja ngo, kadok kwinyo de binega thiri thiri ngo; kum tipo maru voc i wang’a, ku ng’eyong’ec m’atimo.

¹⁷ Kum kwinyo nega kum kier mi ketho cwiny hai kum piny pare, e agoye; apanu wang’a man kwinyo nega; man ecikucidho ku corocen i yo mir adundene.

¹⁸ Aneno yo pare, man abicange: abitelo wie bende, man abidwoko jamjuk ire man ni juywak pare.

¹⁹ Acwio nying’ dendhok: Kwiocwiny, kwiocwiny, ni ng’atu ma ni bor man ni ng’atu ma ni ceng’ni, Yehova wacu; e abicange.

²⁰ Ento judubo gi calu nam m’ukoto; kum ecopo yom ungo, man pige wodho susu ku cilo woko.

²¹ Mungu para wacu kumae, Kwiocwiny umbe ni judubo.