Isaya 52 - The Holy Bible In Alur (Lur) Revised Orthography

Mungu Bigonyo Sayuni kud i Ng’eca

¹ Ceu, ceu, rony tegoni, E Sayuni; rony kendi peri ma ber, E Yerusalem: adhura ma leng’; kum ugambre kawono ju ma yaa mbe kugi man m’ucido bimondo ii kendo ngo.

² Yengri giri ku i utur; ai, jany wi komker peri, E Yerusalem; gonjri giri kud i twic m’i ng’uti, E Nyasayuni ma ng’eca.

³ Kum Yehova wacu kumae, Jung’iewowu mananu; man jubiwaruwu m’umbe sente.

⁴ Kum Rwoth Yehova wacu kumae, Dhanu para loro piny ku kwong’a i Misiri nimondo ni umondo kuca: man Jaascuri usendogi ma lembe mbe.

⁵ Ka kumeno kawono, atimo ang’o keni, Yehova wacu, kum jukabu dhanu para cen mananu? ju m’ubimo wigi gigoyo nduru, Yehova wacu, man jucido nyinga thiri thiri ceng’ du.

⁶ Ka kumeno dhanu para bing’eyo nyinga: ka kumeno gibing’eyo i ceng’ maeca nia an a ng’atu m’uweco; nen, en e an.

⁷ Tiend ng’atu m’ukelo rwonglembe ma ber wi gudi ber mire ma, m’urieyo kwiocwiny, m’ukelo rwonglembe ma ber mi gin ma ber m’urieyo pi both, m’uwacu ni Sayuni kumae, Mungu peri camu ker mire!

⁸ Dwand jukur peri mire! giting’o dwal, giwero wer karacelo; kum gibineno wang’ ku wang’, kinde ma Yehova dwogo i Sayuni.

⁹ Wumoj wer mi mutoro, wuwer karacelo, wu kar uvuru mi Yerusalem; kum Yehova juko dhanu pare, ewaru Yerusalem.

¹⁰ Yehova wanyu bote ma leng’ i wang’ thek ceke; man kajik mi ng’om ngung’ uneno both pa Mungu mwa.

¹¹ Wuai, wuai, wuai ku kuno, kud wumul gin m’ucido; wuai kud i kinde; wudwokru giwu leng’, wu ju m’uyeyo agulu pa Yehova.

¹² Kum wubiwok woko ku ng’wec ungo, kadok aringa de wubicidho ngo: kum Yehova bicidho i weng’wu; man Mungu mir Israel bibedo ni jamgwok i ng’eiwu.

Sendri pa Jatic pa Yehova

¹³ Nen, jatic para bitimo ku rieko, jubidode man jubiting’e malu, man ebibedo malu hai.

¹⁴ Calu i dhanu dupa wang’ lii i kumi (junyotho wang’e ma sagu dhanu mange ceke, man kite ma sagu wot dhanu),

¹⁵ e ebipoyo thek dupa kumeca; ju m’ubimo bimio dhoggi i kume: kum gibineno gin ma fodi jukuyero igi ngo: man gin ma giwinjo ngo gibing’eyo.