Isaya 51 - The Holy Bible In Alur (Lur) Revised Orthography

Lemjuk ni Sayuni

¹ Wuwinja, wu ju m’ulubo bedopwe, wu ju ma wuyenyo Yehova: wunen ba cana ma jupayuwu kud i ie, man ba vur mi odng’om ma juwodhowu kud i ie.

² Wunen bang’ Ibrahim ma kwaruwu, man ba Sara m’unyolowu; kum kinde ma en e acel kende alwong’e, man amio mugisa ire, e adwoke dupa.

³ Kum Yehova juko Sayuni; ejuko kar uvuru pare ceke, man edwoko langa pare calu Aden, man ng’omngele pare calu podho pa Yehova; mutoro kud anyong’a binwangre i ie, man foyofoc, ku dwal mi werower.

⁴ Wuwinja, E dhanu para; man wucik ithwu ira, E thek para: kum cik biai kud i bang’a, man abiketho bedopwe para ni der ni kodhidhanu.

⁵ Bedopwe para ni ceng’ni, both para wok woko, man bota bipoko lembe mi kodhidhanu; cula bikura, e gibigeno bota.

⁶ Wung’ai weng’wu malu i polo, man wunen wi ng’om ma piny; kum polo birwinyo woko calu yiro, man ng’om biti calu kendi; e ju m’ubedo i ie bitho kumeca: ento both para bibedo mi nja, man jubinyotho bedopwe para ngo.

⁷ Wuwinja, wun ma wung’eyo bedopwe, wu dhanu ma cik para ni i adundewu; kud wulwor cac mi dhanu, kadi cwinywu kud ung’abre kum cac migi.

⁸ Kum abirbir bicamugi calu kendi, man ukoko bicamugi calu yuk rombe; ento bedopwe para bibedo mi nja, man both para ni dhanum’utuk ceke.

⁹ Ceu, ceu, rony tego, E bot Yehova; ceu, calu i nindo ma con, dhanum’utuk mi nindo ma con. En e in ungo m’itong’o Rahab nziki nziki, m’idhuyo ng’ec de?

¹⁰ En e in ungo m’idwono nam, pi mi nam ma dit; m’idwoko die nam ni yo ni ju ma juwaru ukadh i wie?

¹¹ Man ju ma juwaru pa Yehova gibidwogo, man gibibino ku wer i Sayuni; man anyong’a mi nja bibedo i wigi: gibinwang’u mutoro kud anyong’a; e can ku gamucwiny biringo.

¹² An, en c an, an a ng’atu in’ajukowu: in i ng’a, ma lworo nege kum dhanu ma bitho, man kum wod dhanu ma jubidwoko calu lum:

¹³ man wii wil kum Yehova ma Jacwicni, m’erieyo polo, man m’eketho the ng’om; ma lworo negi ceng’ du thiri thiri kum kwinyo pa jasend, kinde m’eyiko piny mi nyotho nyothi? e kwinyo pa jasend ni kani?

¹⁴ Jubigonyo ng’eca ma judaku pio; e ebitho ebiloro piny i vur de ngo, kadok kwen pare de bijwik ungo.

¹⁵ Kum an a Yehova Mungu peri, m’utugo nam, ketho nia mukurane woi: nyinga Yehova mir udul.

¹⁶ Man aketho lembe para i dhogi, aumi de i tipopiny m’i cinga, kara apidh polo, man kara aketh the ng’om, man awac ni Sayuni kumae, In i dhanu para.

¹⁷ Ceu, ceu, cungi, E Yerusalem, m’imadhu kikombe mi kwinyo pa Yehova kud i cinge; imadhu tabu mi kikombe mi mielkum, man idare.

¹⁸ Ng’atu moko mbe m’utelo wie i kind wot ceke m’etungo; kadi ng’atu moko de mbe m’umaku cinge i kind wot ceke m’etungo.

¹⁹ Gin ario maeni podho i wii; ng’a ma biywegi? uvuru ku nyoth, man ndru ku palamularu; abijuki nenedi?

²⁰ Woti givoc, givuto i wi gengi ceke, calu nyajwaya i voi; gipong’ ku kwinyo pa Yehova, juk pa Mungu peri.

²¹ Ka kumeno kawono winj maeni, in ma jusendi, man m’imer amera, ento ku pigulok ungo:

²² Rwoth peri ma Yehova wacu kumae, man Mungu peri m’ucungo kum lembe mi dhanu pare, Nen, akabu kikombe mi mielkum kud i cingi, en e tabu mi kikombe mi kwinyo para; ibimadhe kendo ki ngo:

²³ man ebikethe i cing’ ju m’usendi, m’uwacu ni ng’eyong’ec peri kumae, Gung’ piny, kara wakadhi; e iketho ng’ei calu ng’om, man calu gengi, ni ju m’ukadhu.