Isaya 45 - The Holy Bible In Alur (Lur) Revised Orthography

Lembang’ola ni Kuro ya Etim

¹ Yehova wacu kumae ni ng’atu ma juwiro pare, ni Kuro, m’amaku cinge ma yor acwic, kara anyon thek i wang’e, man abigonyo pier ju m’ubimo: kara ayab dhugola i wang’e, e jubiciko dhugang’ ungo:

² abicidho i weng’i, man abipoto ka ma tek; abituro dhugola mi mola nziki nziki, man abithumo utwindi mi nyunyu pu;

³ man abimio iri piny m’akana mi mudho, ku lonyo m’aponda mi ka ma kende, kara ing’ei nia en e an, Yehova, m’alwong’i ku nyingi, cil Mungu mir Israel.

⁴ Ni kum Yakobo ma jatic para, man Israel m’afoyo, alwong’i ku nyingi: acaku nyingi mi pak, kadok fodi ing’eya ngo.

⁵ An a Yehova, man ng’atu moko mange mbe; Mungu moko mbe m’umeda. Abitwio pieri, kadok fodi ing’eya ngo;

⁶ kara ging’ei ugambre i wokceng’, man ugambre yo reto, nia ng’atu moko mbe m’umeda: an a Yehova, man ng’atu moko mange mbe.

⁷ Atimo der, man acwio mudho; atimo kwiocwiny, man aketho lem ma rac; an a Yehova, m’utimo gin maeni ceke.

Yehova ma Jacwic

⁸ Wucwi, wu polo, ku malu, man wek polo konj bedopwe piny: wek ng’om uyabi, kara eceg both, man wek eketh bedopwe loth karacelo; an a Yehova, acwio maeni.

⁹ Can wi ng’atu m’upiemo piem ku Jacwicne mire! dekle i kind dekle m’i ng’om mire! Ulobo biwacu ni ng’atu m’ung’ine kumae, Itimo ang’o? kadi tic peri kumae, Cinge mbe?

¹⁰ Can wi ng’atu m’uwacu ni wego kumae, Inyolo ang’o? kadi ni dhaku kumae, le peri en e ang’o?

¹¹ Yehova, Ng’atu Maleng’ mir Israel, man Jacwicne wacu kumae: Penja pi gin ma bibino; pi wota, man pi tic m’i cinga, wung’ol ira.

¹² Atimo ng’om, man acwio dhanu i wie: an, en e cinga, m’uluko polo; man ang’olo lembe ni udul migi ceke.

¹³ Ating’e malu i bedopwe, man abitiro yo pare ceke: ebigomo adhura para, man ebigonyo ju ma judakugi para, pi wel piny kadi sukulia de ngo, Yehova mir udul uwacu.

¹⁴ Yehova wacu kumae, Tic mi muli mi Misiri, man kuloka mir Ethiopia, ku dhanu mi Seba, dhanu ma boco, gibikadhu i beng’i, e gibibedo peri: gibilubo ng’ei; gibibino atwia ku nyoro; man gibipodho piny i beng’i, gibikwayu kwac i beng’i, gibiwacu kumae, Andha Mungu ni kudi; man ng’atu moko mbe, Mungu moko mbe.

¹⁵ Andha in i Mungu m’ipondo giri, E Mungu mir Israel ma Jalar.

¹⁶ Lewic bimakugi, eyo, cwinygi bing’abre, kagi ceke; gibimondo i lewic karacelo ma gi jutim mungu m’araga.

¹⁷ Ento Israel biboth ni kum Yehova ku both mi nja: lewic bimakuwu ngo kadi cwinywu de bing’abre ngo mi nja.

¹⁸ Kum Yehova m’ucwio polo, Mungu m’ung’ino ng’om m’utime de, m’uketho ecungo m’ucwie de ni uvuru ngo, m’ung’ine kara jubed i ie, uwacu kumae: An a Yehova; man ng’atu mange mbe.

¹⁹ Ayero mung’ mung’ ungo, i ka mi ng’om mi mudho; awacu ngo kumae ni kodhi Yakobo, Wuyenya mananu: an, Yehova, ayero bedopwe, ayero gin m’atira.

Mungu m’araga mi Babeli, man Yehova

²⁰ Wucokru giwu man wubin; wucor ceng’ni karacelo, wun ma wuboth i kind thek: ng’eyong’ec migi mbe gi ju ma giyeyo yen mir ayi gin m’acwia migi m’ang’ika, ma girwo de ni mungu ma copo bodho ngo.

²¹ Wuyer, man wuwodhe woko; eyo, wek gipor lembe karacelo: ng’a m’unyutho maeni ugambre i nindo ma coni? ng’a m’uyero maeni ugambre coni? an ungo, Yehova? man Mungu mange mbe m’umeda, Mungu ma pwe man Jalar; ng’atu moko mbe m’umeda.

²² Wunen bang’a, man wubothi, wu tung’ ng’om ceke; kum an a Mungu, man ng’atu mange mbe.

²³ Akwongra kuda gira, lembe ai kud i dhoga i bedopwe, man ebidwogo ngo, nia cong ceke kubang’e kubang’e birum ira, leb ceke kubang’e kubang’e bikwong’o kwong’.

²⁴ Juwacu pira kumae nia i Yehova kende abedo ku bedopwe man tego; cil i bang’e dhanu bibino; man dhanu ceke m’udage jubiketho lewic umakgi.

²⁵ Jubigonyo lembe ma wi kodhi Israel ceke ni kum Yehova, man gibiyungri.