Isaya 44 - The Holy Bible In Alur (Lur) Revised Orthography

Yehova m’E Mungu E Kende

¹ Ento kawono winji, E Yakobo ma jatic para, man Israel, m’agoyo wie:

² Yehova m’ucwii, m’ung’ini kud i ic, ma bikonyi, uwacu kumae: Lworo kud unegi, E Yakobo ma jatic para; man in, yecurun, m’agoyo wii.

³ Kum abikonjo pi wi ng’atu ma rieu nege, man kulo wi ng’om m’uthwo; abikonjo Tipona wi kodhini, man mugisa para wi nyikwei:

⁴ e gibidongo kind lum, calu mbegu dhu kulo.

⁵ Acel biwacu kumae, An a pa Yehova; man mange bilwongre ku nying’ Yakobo; man mange bigoro wi cinge kumae, Ni Yehova, man ebilwongre ku nying’ Israel.

⁶ Yehova, m’Ubimo mir Israel, man Jawar pare, Yehova mir udul, uwacu kumae: An a ma kwong’a, man kajik; man Mungu moko mbe m’umeda.

⁷ Man ng’a, ma calu an, ma bilwong’o, man biyere de, man bikethe kakare pira, ugambre m’aketho dhanu ma coni? man gin ma bibino, man ma bitimbre, wek giyer.

⁸ Lworo kud unegwu, bebe de kud utimwu: ayero iri ugambre con ungo, man anyuthe? man wun wu jumulembe para. Mungu moko nuti m’umeda? eyo, Cana moko mbe; ang’eyo moko ngo.

Lemkasegu mi Rwo ni mungu m’araga

⁹ Ju ma timo ayi gin m’acwia m’ang’ika kagi ceke gi gin ma ie nanu; e gin ma nyayu mutoro i igi kulokane bibedo mbe; man jumulembe migi ma dhe neno ngo, kadi ng’eyo ngo: kara lewic uneggi.

¹⁰ Ng’a m’utimo mungu, kadi m’utwagu ayi gin m’acwia ma kulokane mbe?

¹¹ Nen, jubinyayu lewic wi juwagi ceke; man jutic, gi mi dhanu: wek jucokgi ceke karacelo, wek gicungi; lworo binegogi, jubinyayu lewic i wigi karacelo.

¹² Jathiedh thiedho lei, man etimo ku cukmac, eng’ine ku nyondro de, man etime ku bote ma tek: eyo, kec unege, man tego pare jik; emadhu pi ngo, e evoc.

¹³ Jabodho mi bau rieyo thol; ekiewe ku kalamu; eng’ine ku jamng’in, man epore ku jampor, man eng’ine calu ayi dhanu, calku bero dhanu, mi bedo i ot.

¹⁴ Eng’olo ire musonge, man egamu sipre ma ithe thindho ku bongu, man edwoko yen acel tek i kind yen mi luli ire gire: epidho sipre, e koth lodhe.

¹⁵ Ebilund bedo ni dhanu mi wang’u; man egamu kume moko, e emure gire; eyo, ecwinye, man etedo ko kwen: eyo, etimo mungu, man erwo ire; etime ni ayi gin m’acwia m’ang’ika, man epodho piny ire.

¹⁶ Ewang’u ng’ete i mac; ecamu ring’o ku ng’ete; evulo ring’o m’avula, e cwinye kwio; eyo, emure gire, e ewacu kumae, Aha, kuma mor, aneno mac.

¹⁷ Man donge m’udong’ etimo ni mungu, en e ayi gin m’acwia pare m’ang’ika; epodho piny ire e erwo, man egoyo lam ire, ewacu de kumae, Bodha; kum in i mungu para.

¹⁸ Ging’eyo ngo, kadok lembe de gipido ngo: kum emio wang’gi, kara ku ginen; kud adundegi de, kara ku ging’ei.

¹⁹ E ng’atu moko mbe m’upoi, kadi ng’eyothelembe de mbe ma giwac ko kumae, A wang’u ng’ete i mac; eyo, atedo kwen de wi cukmaje; avulo ring’o man acame: man abitimo donge m’udong’ ni ginmajudagu? abipodho piny ni dund yeni?

²⁰ Ecamu vuru; adunde ma jubombo loke cen; e ecopo bodho ng’eyong’ec pare ngo, kadi wacu kumae, Ndra ni i cinga ma yor acwic ungo?

Yehova Jawar mi Israel

²¹ Wupoi kum gin maeni, E Yakobo, kud Israel; kum in i jatic para: acwii; in i jatic para: E Israel, wia biwil piri ngo.

²² Araco gondri peri woko, calu afuru ma ndhu, man dubo peri, calu afuru: dwog i bang’a; kum aweri.

²³ Wuwer, E polo, kum Yehova timo maeni; wukoki, wu ng’et ng’om ma yo piny; wu moj wer, wu gudi, E luli, man yen kubang’e kubang’e ma ni i ie: kum Yehova waru Yakobo, man ebinwang’u dwong’ ire gire ni kum Israel.

²⁴ Yehova, ma Jawarni, man ng’atu m’ung’ini kud i ic, ewacu kumae: An a Yehova, m’atimo gin ceke; m’arieyo polo a kenda; m’amoyo ng’om kpe (ng’a ma ni kuda?);

²⁵ m’athiro giranyutha mi jundra, m’anyayu ng’ecwiny de i ajoga; m’aloko jurieko cen, m’adwoko ng’eyong’ec migi de ni lem ma kite mbe;

²⁶ m’adwoko lembe pa jatic pare tek, m’atimo lembapora mi jukwenda para de; m’awacu pi Yerusalem kumae, Jubibedo i ie; man pir adhura mi Yuda kumae, Jubigomogi, man abiting’o kar udhurune;

²⁷ m’awacu ni pi ma thuth kumae, Dwon, man abidwono kulo peri ma dit;

²⁸ m’abiwacu pi Kuro kumae, En e jakwac para, man ebitimo gin ceke m’amaru, m’ebiwacu cil pi Yerusalem kumae, Jubigome; man pir hekalu kumae, Jubiketho theri.