Isaya 42 - The Holy Bible In Alur (Lur) Revised Orthography

Jamiru pa Yehova

¹ Nen, jatic para, m’ajengo; ng’atu m’afoya para, ma anyong’a nego cwinya i kume: aketho Tipo para i wie; ebikelo pokolembe ba Thekdhanumange.

² Ebikok ungo, kadi ebiting’o dwande de ngo, kadi ebiketho dwande winjre i gengi de ngo.

³ Usi m’unyoc ebituro ngo, bonguthala m’udunyo yiro ebinego ngo: ebiwodho pokolembe i lemandha.

⁴ Ebijik ungo, kadi cwinye de biai ungo, maram ebiketho ko pokolembe i ng’om; man cula bikuro cik pare.

⁵ Mungu Yehova, ng’atu m’ucwio polo, m’urieyogi de kpee uwacu kumeni; ng’atu m’upedho ng’om kpee ku gin m’uai i ie; ng’atu m’umio yuyo ni dhanu m’i wie, man tipo ni ju m’uwotho i wie:

⁶ an a, Yehova, alwong’i i bedopwe, man abimaku cingi, e abigwoki, man abimii ni lembariba mi dhanu, ni der mi Thekdhanumange;

⁷ mi yabu wang’ abinga, mi wodho jukol woko kud i odkol, man ju m’ubedo i mudho kud i odkol.

⁸ An a Yehova, maeni nyinga; man dwong’ para abimio ni ng’atu mange ngo, kadok pak para de abimio ngo ni ayi gin m’acwia m’ang’ika.

⁹ Nen, gin ma kwong’a timbre kakare, man ayero pi gin ma nyen; ma fodi gikuwok ungo ayero pigi iwu.

Foc pi Aloci ma Dit pa Yehova

¹⁰ Wuwer wer ma nyen ni Yehova, man pak pare ugambre i tung’ ng’om; wun ma wuloro piny ba nam, ku gin ceke ma ni i ie, cula, ku ju m’ubedo i ie de.

¹¹ Wek langa kud adhurane giting’ dwandgi malu, ku pacu ma Kedar ubedo i ie; wek ju m’ubedo i Sela giwer, wek gikok ku wi gudi.

¹² Wek gimi dwong’ ni Yehova, man giyer pak pare i cula.

¹³ Yehova biwok woko calu jarukara; ebithubo ngiri pare calu won ali: ebiywak, eyo, ebikok ma tek; ebitimo ku kero kum judegi pare.

¹⁴ Abedo ling’ nindo dupa; abedo ling’, man acera gira: kawono abiywak calu dhaku ma moc ugoye; abigamu cwinya man abiyuyo karacelo.

¹⁵ Abinyotho gudi kud ungulu gudi, man abitalu uboko migi ceke; man abidwoko kulo ni cula, man abidwono kut.

¹⁶ Man abikelo abinga kud i yo ma ging’eyo ngo; abipeyogi i yo ma ging’eyo ngo; abidwoko mudho ni der i wang’gi, man abitiro ka m’ugondre. Abitimo gin maeni, man abikunogi ngo.

¹⁷ Jubilokogi cen, jubinyayu lewic dit i wigi, gi ju ma gigeno ayi gin m’acwia m’ang’ika, ma giwacu ni ayi gin m’acwia m’atwaga kumae, Wun wu mungu mwa.

Israel Ukwero Niworo Ponji pa Mungu

¹⁸ Wuwinji, wun udhing’; man wunen, wun abinga, kara wunen.

¹⁹ Ng’a m’abinga, ma k’e jatic para ngo? kadi m’udhing’, calu jakwenda para m’aoro? ng’a m’abinga ma calu ng’atu ma wabedo ku kwiocwiny wakude, man abinga calu jatic pa Yehova?

²⁰ Ineno gin dupa, ento iketho cwinyi i kume ngo; ithe bedo ayaba, ento ewinjo ngo.

²¹ Enyayu mutoro i Yehova, ni kum bedopwe pare, ya eyungo cik, man edwoke mi yung.

²² Ento maeni en e dhanu ma jumayu juyaku de; kagi ceke jumakugi i uwic i vur, man jupanugi i odkol: e gi mir amaci, man ng’atu moko mbe m’abodho; mir ayeki, man ng’atu moko mbe m’uwacu kumae, Dwoki.

²³ Ng’a m’i kindwu ma biciko ithe ewinj ko maeni? ma biciko ithe man ma biwinjo mi nindo ma bibino?

²⁴ Ng’a m’umio Yakobo mir ayeki, man Israel ni weg ayeki? Yehova timo en ungo? en e ng’atu ma wadubo ire, man ng’atu ma gikwero wotho i yo pare, kadok cik pare de giworo ngo.

²⁵ Ka kumeno ekonjo lak ng’ecwiny pare i kume, man tego mir ali; man ecwinye gbur ku mac, ento eng’eyo ngo; man ewang’e, ento eketho cwinye i kume ngo.