Isaya 39 - The Holy Bible In Alur (Lur) Revised Orthography

Hezekia Jolo Jukwenda M’uai Babeli

¹ I nindo maeca Merodak-baladan ma wod Baladan, m’ubimo mi Babeli oro waraga man giramia ni Hezekia; kum ewinjo nia naka kume lith, man nia kume kei.

² E anyong’a nego Hezekia ni kumgi, man enyutho igi ot mi piny pare ma pire tek, mola ma tar, ku mola ma kwar, man yath ma jwa jwa, ku mo ma pire tek, man ot ceke mi jamtho pare, ku gin ceke ma junwang’u i piny m’akana pare: gin moko mbe i ot pare, kadi iker pare ceke, ma Hezekia kunyutho igi ngo.

³ Isaya ma jabila lund ubino bang’ ubimo ma Hezekia, man ewacu ire kumae, dhanu maeni wacu ang’o? man giai kani ma gibino ko i beng’i? E Hezekia wacu kumae, Giai i ng’om ma bor gibino i bang’a, cu i Babeli.

⁴ Elund ewacu kumae, Gineno ang’o i ot peri? E Hezekia loko lembe kumae, Gineno gin ceke ma ni i ot para: gin moko mbe i kind piny m’akana para ma k’anyutho igi ngo.

⁵ Isaya lund uwacu ni Hezekia kumae, Winj lembe pa Yehova mir udul:

⁶ Nen, nindo bebino, ma gin ceke ma gini i ot peri, ku gin ma kwaru ketho malu i kakanpiny cil tin, jubitero i Babeli: gin moko mbe ma bidong’, Yehova wacu.

⁷ Man kind woti ma biai i ii, m’ibinyolo gibitero cen; e gibibedo jumugumba i odker mir ubimo mi Babeli.

⁸ Hezekia lund uwacu ni Isaya kumae, Lembe pa Yehova m’iyero e ber. Man ke ewacu kumae, Kum kwiocwiny ku lemandha bibedo nuti i nindo para.