Isaya 38 - The Holy Bible In Alur (Lur) Revised Orthography

Kum Hezekia Lith

¹ I nindo maeca kum Hezekia make mi tho. Man Isaya ma jabila ma wod Amoz ubino i bang’e, man ewacu ire kumae, Yehova wacu kumae, Yik ot peri; kum ibitho, ibibedo kwo ngo.

² E Hezekia lund uloko wang’e yo kum kor ot, e erwo ni Yehova,

³ man ewacu kumae, Kawono poi, E Yehova, akwei, maram awotho ko i weng’i ku lemandha man kud adunde ma ndhu cu, man atimo gin m’ubedo ber i weng’i. Man Hezekia ywak mi can.

⁴ E lembe pa Yehova lund ubino bang’ Isaya, m’uwacu kumae,

⁵ Cidhi, man iwac ni Hezekia kumae, Yehova, Mungu pa Daudi ma kwaru, uwacu kumae, Awinjo rwo peri, aneno piweng’i: nen, abimedo rundi apar wi abic kum nindo peri.

⁶ Man abibodho in kud adhura maeni kud i cing ubimo mir Ascur; e abigwoko adhura maeni.

⁷ Man maeni bibedo ni giranyutha m’uai ba Yehova iri, nia Yehova bitimo gin maeni m’eyero:

⁸ nen, abidwoko tipopiny mi wel kendo, m’uloro piny i jampor mi ceng’ pa Ahaz, udok cen wel apar. Ka kumeno ceng’ udok cen wel apar i wel m’eloro ko piny.

⁹ Lembagora pa Hezekia m’ubimo mi Yuda, nwang’u kume lith, man eboth ni tho pare.

¹⁰ Awacu kumae, I nindo para mi dieceng’ abimondo i dhugang’ mi liel: Jukabu dong’ rundi para kud i bang’a.

¹¹ Awacu kumae, Abineno Yehova ngo, en e Yehova i ng’om mi ju ma kwo: Abineno dhanu kendo ngo karacelo ku ju m’ubedo i ng’om.

¹² Judaku kabedo para, man jutere cen kud i bang’a calu hema pa jakwac: Adolo kwo para calu jacwibongu; ebikaba woko ku ba jamcwic: Ugambre dieceng’ cil diewor ibijiga.

¹³ Akwio cwinya gira cil kugweno; calu umvor, eturo cogona kumeca: Ugambre i dieceng’ cil diewor ibijiga:

¹⁴ Calu ajwinyjwiny calu ung’wolu, e akok kumeca; Acur acura calu akuru; wang’a tal ku neno malu: E Yehova, jusenda, bed jadhulembe para.

¹⁵ Abiwacu ang’o? eweco i bang’a, man en gire etime: Abicidho yo i rundi para ceke kum ulecu mi ng’eyong’ec para.

¹⁶ E Rwoth, dhanu kwo ni kum gin maeni; Man kwo mi tipona ni i ie ceke: Kum kumeno canga, man iketha kwo.

¹⁷ Nen, en e pi kwiocwiny para ma nia abedo kud ulecu ma dit: Ento ibodho ng’eyong’ec para kud i vur mi nyoth ni kum mer; Kum ibayu dubo para ceke yor i ng’ei.

¹⁸ Kum liel copo peki ngo, tho copo yungi ngo: Ju m’uloro piny i vur gicopo geno lemandha peri ngo.

¹⁹ Ng’atu ma kwo, ng’atu ma kwo ebipeki, calu atimo tin: Wego biketho lemandha peri ng’eire ni nyithindho.

²⁰ Yehova bedo ayika mi bodha: Ka kumeno wabiwero wer para ku jambwer ma juthondhe I nindo ceke mi kwo mwa i ot pa Yehova.

²¹ Nwang’u Isaya wacu kumae, Wek gigam kwen m’ang’ina mir ubolo, man gimwone ni jamcang wi vur, e ebicangu.

²² Nwang’u Hezekia bende wacu kumae, Giranyutha ang’o ma nia abiidho ba ot pa Yehova?