Isaya 37 - The Holy Bible In Alur (Lur) Revised Orthography

Yuda Both kud i Cing’ Senakerib

¹ Man etimbre, kinde m’ubimo ma Hezekia winjo maeni, nia eyeco kendi pare, man eumbre ku gonia, e emondo i ot pa Yehova.

² Man eoro Eliakim, ma ni wi juudi, man Cebna ma jagorcik, ku judongo mi julam, ma gibedo auma ku gonia, bang’ Isaya ma jabila ma wod Amoz.

³ E giwacu ire kumae, Hezekia wacu kumae, Ceng’ maeni en e ceng’ mi can, man mi juk, man mi lembacidi; kum nyithindho giwok kum nyol, man tego mbe mi nyol.

⁴ Kuno nyo Yehova Mungu peri biwinjo lembe pa Rabcake, m’ubimo mir Ascur ma rwoth pare oro kara ecai ko Mungu ma kwo, man ebijuko lembe ma Yehova Mungu peri winjo: kum kumeno ting’ rwo peri malu pi dong’dhanu m’udong’.

⁵ Kum kumeno jutic p’ubimo ma Hezekia gibino bang’ Isaya.

⁶ E Isaya wacu igi kumae, Wuwac kumae ni rwoth mu, Yehova wacu kumae, Lworo kud unegi kum lembe m’iwinjo, ma jutic p’ubimo mir Ascur ucida ko.

⁷ Nen, abiketho tipo i ie, man ebiwinjo rwonglembe, e ebidok i ng’om pare ma dhe; man abiketho epodho ku palamularu i ng’om pare ma dhe.

⁸ Kum kumeno Rabcake dok, man enwang’u ubimo mir Ascur ubekiedo kum Libna; kum ewinjo nia eai i Lakic.

⁹ Man ewinjo pi Tirhaka m’ubimo mir Ethiopia kumae, Ewok woko kara ekied i kumi. E kinde m’ewinjo maeni, eoro jukwenda ba Hezekia, ewacu kumae,

¹⁰ Wuwac kumae ni Hezekia m’ubimo mi Yuda, Kud iyi Mungu peri m’igeno bombi, m’ewac kumae, Jubimio Yerusalem ungo i cing ubimo mir Ascur.

¹¹ Nen, iwinjo gin m’ubimo mir Ascur utimo kum ng’om ceke, ku nyothogi kot: e in ibibothi?

¹² Mungu mi thek gibodhogi, ma kwaru nyotho, en e Gozan, ku Haran, man Rezef, ku nyithindho mir Aden ma gini i Telasari?

¹³ Ubimo mi Hamath ni kani, man ubimo mir Arpad, kud ubimo mir adhura mi Sefarvaim, man mi Hena, man mi Iva?

¹⁴ E Hezekia jolo waraga kud i cing’ jukwenda, man esome; e Hezekia idho malu ba ot pa Yehova, man epedhe i wang’ Yehova.

¹⁵ E Hezekia rwo ni Yehova, ewacu kumae,

¹⁶ E Yehova mir udul, Mungu mir Israel, m’ujany malu wi kerubi, in i Mungu, i kendi, mi thek ceke m’i ng’om; icwio polo ku ng’om.

¹⁷ Cik ithi, E Yehova, man iwinji; yab weng’i, E Yehova, man inen; man iwinj lembe ceke pa Senakerib, m’eoro kwenda ya ecai ko Mungu ma kwo.

¹⁸ Andha, Yehova, ju m’ubimo mir Ascur ginyotho ng’om ceke, man ng’om migi,

¹⁹ man gibayu mungu migi i mac: kum gi mungu ngo, ento gi tic mi cing’ dhanu, yen ku kidi; ka kumeno ginyothogi.

²⁰ Ka kumeno kawono, E Yehova Mungu mwa, larwa ni cinge, kara thek ceke m’i ng’om ung’ei nia in i Yehova, ndhu in i kendi.

²¹ Isaya ma wod Amoz ulund uoro kwenda ba Hezekia, ewacu kumae, Yehova, Mungu mir Israel, uwacu kumae, Kum irwo i bang’a kum Senakerib m’ubimo mir Ascur,

²² maeni lembe ma Yehova yero pire: Nyasayuni ma ng’won ucei man eng’ieri hai; Nyayerusalem uyengo wie i kumi.

²³ Icayu man icido ng’a? man iting’o dwendi ing’ayu weng’i de malu kum ng’a? en e kum Ng’atu Maleng’ mir Israel.

²⁴ Ku jutic peri icayu Rwoth, man iwacu kumae, Ai dho malu wi usimbru gudi kud udul magali para, ba ng’et Lebanon ma yor i ie; man abing’olo musongene ma boco piny ku yendsipre ma jufoyo; man abimondo wi bithne ma wi tung’, en e luli mi podhone ma cek hai;

²⁵ atong’o man amadhu pi, man abidwono kulo ceke mi Misiri ku die tienda.

²⁶ Iwinjo ngo maram atime ko con, man acwie ugambre i nindo ma coni kawono aketho etimbre kakare, kara ebed peri ya inyoth adhura ma tek udok ni udhuru.

²⁷ Ka kumeno ju m’ubedo i igi tego migi nok, igi wang’ lii man cwinygi ng’abre; gibedo calu lum m’i thim, man calu uboko ma numu, calu lum ma wi udi, man calu podho mi cam ma fodi dongo ngo.

²⁸ Ento ang’eyo bedopiny peri, ku wok woko peri, ku mondo peri, man kwinyo peri mi kuma.

²⁹ Kum kwinyo peri m’i kuma, man kum tingri peri idho malu i itha, ka kumeno abiketho gol para i umi, man jamtwiny para i dendhogi, man abiloki cen i yo m’ibino i ie.

³⁰ Man maeni bibedo giranyutha iri: wubicamu i rundi maeni gin m’utwi kende, man i rundi mir arionde wubicamu kanga mi rundi ma kwong’a; man i rundi mir adege wucoi, man wukai, man wupidh podho mir ulok, e wucam nyinge.

³¹ Man donge m’udong’ m’uboth mi ot pa Yuda biguro ulaggi piny kendo, e gibicego nying’gi ku malu.

³² Kum dong’dhanu biwok woko kud i Yerusalem, man ju ma giboth kud i Sayuni. Ngiri pa Yehova mir udul bitimo maeni.

³³ Ka kumeno Yehova wacu kumae pir ubimo mir Ascur, Ebibino bang’ adhura maeni ngo, kadi ebikilo athero de ngo kuca, kadok i wang’e de ebibino ku ban ungo, kadi ebidhuro ng’om i kume de ngo.

³⁴ Ku yo m’ebino i ie, ebidok ku i maeca, man ebibino bang’ adhura maeni ngo, Yehova wacu.

³⁵ Kum abigwoko adhura maeni kara abodhe pira gira, man pi jatic para ma Daudi.

³⁶ E malaika pa Yehova wok woko, man egoyo dhanu rubanga dak acel ku pier abora wi abic i kagonjo mi Juascuri; man kinde ma dhanu ai pir kugweno, nen, maeni ceke gin avu.

³⁷ Kum kumeno Senakerib m’ubimo mir Ascur uai, e ecidho edok, man ebedo i Nineve.

³⁸ Man etimbre, kinde m’eberwo i ot pa Nisrok ma mungu pare, nia Adramelek ku Carezer ma wote gigoye ku palamularu; e giringo i ng’om Ararat. Man Esarhadon ma wode camu ker kakare.