Isaya 36 - The Holy Bible In Alur (Lur) Revised Orthography

Senakerib Ukelo Lwiny

¹ Nie etimbre i rundi apar wi ang’wende p’ubimo ma Hezekia, nia Senakerib m’ubimo mir Ascur uidho malu kum adhura ceke ma tek mi Yuda, e emakugi.

² Man ubimo mir Ascur uoro Rabcake kud i Lakic uidh i Yerusalem ba Hezekia m’ubimo ku njuru dhanu ma dit. Man ecungo ng’et soro mi pi mi kut ma malu i gengi mi podho pa jalwok bongu.

³ Eliakim ma wod Hilkia, m’ubedo wi juudi, man Cebna ma jagorcik ku Yoa, ma wod Asaf, ma jagorlemkei gilund giwok i bang’e.

⁴ E Rabcake wacu igi kumae, Kawono wuwac ni Hezekia kumae, Ubimo ma dit, m’ubimo mir Ascur, uwacu kumae, Gen maeni ang’o m’igeno?

⁵ Kud i bang’a, lembapora peri ku tego peri mir ali gi lembe mananu kende: kawono igeno ng’a, ma nia ijai ira?

⁶ Nen, igeno uluth mir usi maeni m’unyoc, en e Misiri, ma tek dhanu jengri i kume, ebimondo i cinge, man ebicobe: Farao m’ubimo mi Misiri bedo kumeni ni dhanu ceke m’ugene.

⁷ Ento tek iwacu ira kumae, Wageno Yehova Mungu mwa: maeni en ungo, ma ka ma malu pare ku pemblam pare Hezekia kabu woko, man ewacu ni Yuda ku Yerusalem kumae, Wurwo wang’ pemblam maeni?

⁸ Ka kumeno kawono, akwei, mi mukwatu ni rwoth para m’ubimo mir Ascur, e abimio iri riuni rubanga ario, tek icopo ketho ju m’uidh i wigi bed nuti.

⁹ Ka kumeno icopo loko wang’ jego acel ma gi nok i kind jutic pa rwoth para, man iketh gen peri kum Misiri pi magali man pi riuni?

¹⁰ E kawono aidho malu m’umbe Yehova kum ng’om maeni kara anyothe? Yehova wacu ira kumae, Idh malu kum ng’om maeni, man inyothe.

¹¹ Eliakim ku Cebna man Yoa gdund giwacu ni Rabcake kumae, Wakwei, yer ni juric peri ku dhu Cami: kum wang’eye: man kud iyer iwa ku dhu Juebrania, i ith dhanu ma gini wi gang’kidi.

¹² Ento Rabcake wacu kumae, Rwoth para ora ba rwoth peri, man i beng’i, kara ayer lembe maeni? eora ba dhanu m’ubedo wi gang’kidi ngo, kara gicam weyo migi gigi, man kara gimadh pi migi gigi karacelo wukugi?

¹³ Rabcake lund ucungo, man ekok ku dwande ma tek ku dhu Juebrania, ewacu kumae, Wuwinj lembe p’ubimo ma dit, ubimo mir Ascur.

¹⁴ Ubimo wacu kumae, Kud wuyi Hezekia bombwu; kum ebicopo bodhowu ngo:

¹⁵ kadi kud wuyi Hezekia keth wugen Yehova, m’ewac ko kumae, Yehova bibodhowa andha; jubimio adhura maeni ngo i cing’ ubimo mir Ascur.

¹⁶ Kud wuwinj Hezekia: kum ubimo mir Ascur uwacu kumae, Wumond ira, man wuwok woko i bang’a; man wucam kubeng’wu kubeng’wu ng’atuman kum ulok pare, man kubeng’wu kubeng’wu ng’atuman kum yendubolo pare, man wumadh kubeng’wu kubeng’wu ng’atuman pi mi pi m’atong’a pare ma dhe;

¹⁷ maram abin ko aterwu cen i ng’om ma calu ng’om mu ma dhe, ng’om mi cam ku pigulok ma nyasa, ng’om mi kwen ku podho mir ulok.

¹⁸ Wubed ku weng’wu Hezekia maru piko lembe i iwu, ewac kumae, Yehova bibodhowa. Mungu mi thek moko bodho ng’om pare kud i cing ubimo mir Ascuri?

¹⁹ Mungu mir Hamath kud Arpad gini kani? mungu mi Sefarvaim ni kani? gibodho Samaria kud i cinga?

²⁰ Mungu ma kani ma ni i kind mungu m’i ng’om maeni, m’ubodho ng’om migi kud i cinga, ma nia Yehova bibodho Yerusalem kud i cinga?

²¹ Ento giling’ ti, man giloko ire lembe acel ungo; kum lembang’ola p’ubimo bedo kumae, Kud wulok ire lembe.

²² Eliakim ma wod Hilkia, m’ubedo wi juudi, ku Cebna ma jagorcik, man Yoa, ma wod Asaf, ma jagorlemkei, gilund gibino ba Hezekia ku kendi migi m’ayeca, man giyero ire lembe pa Rabcake.