Isaya 32 - The Holy Bible In Alur (Lur) Revised Orthography

Ubimo ma Pwe

¹ Nen, ubimo bicamu ker ku bedopwe, man judongomawijo bibimo ku pokolembe.

² Man dhanu bibedo calu kapondo ni yamu, kapondo de ni wavuvu, calu kulo mi pi i ka m’uthwo, calu tipo mi cana ma dit i ng’om mi olo.

³ E wang’ ju m’uneno bibedo via via ngo, man ith ju m’uwinjo biwinjo.

⁴ Man cwiny ju ma vur vur bing’eyo ng’eyong’ec, man leb jurugwong’o bibedo ayika mi weco cu.

⁵ Jubilwong’o jakasegu won yung kendo ngo, kadi jubiwacu de ngo nia jamutwi ya jami giramia ma ku berocwiny.

⁶ Kum jakasegu biyero lem ma kite mbe, man cwinye bitimo kier, kara ecikutimo lembacidi, man kara eyer kier kum Yehova, kara eketh ng’eyong’ec mi ju ma kec unegogi bed ma ie nanu, man kara eketh giramadha mi ju ma rieu benegogi ujiki.

⁷ Man jamtic pa jamutwi gi rac: eporo lembapora mi dubo kara enyoth ju ma ol ku lemndra, cil kinde ma jucanpiny ubeyero atira.

⁸ Ento won yung poro gin mi yung; man ebibedo asu i gin mi laccing’.

Cim ni Mon mi Yerusalem

⁹ Wuai malu, wu mon m’ubedo yo, man wuwinj dwanda; wu nyir ma wuparu gin moko ngo, wucik ithwu ba wec para.

¹⁰ Kum yo ng’ei rundi ku ceng’ cwinywu bing’abre, wu mon ma paru lembe ngo; kum mwoka ulok bijik, cokocam bibino ngo.

¹¹ Kumwu miel, wu mon ma wubedo yo; dong’ cwinywu ng’abre, wu ju ma wuparu gin moko ngo; wuwany kendi mu, man wudwokru muneru, wutwi gonia de i pierwu.

¹² Gibigoyo korgi kum pothi ma ber, pir ulok ma cek hai.

¹³ Ucok kud ukudho bitwi i ng’om mi dhanu para; eyo, wi udi ceke mi mutoro i adhura mi mutoro.

¹⁴ Kumjubiweko odker; jubiweko adhura mir udul; ungulu got ku otkur bibedo ni odyedi mi nja, anyong’a ni kana m’i thim, man kakwae mir udul lim;

¹⁵ cil ma jubikonjo ko Tipo m’uai malu i wiwa, man langa udok ni podho ma cek hai, man podho ma cek hai jubiwacu ya luli.

¹⁶ Pokolembe bilund bedo i langa; man bedopwe bibedo i podho ma cek hai.

¹⁷ Tic mi bedopwe de bibedo kwiocwiny; man nying’ bedopwe, en e bedoyo, ku genogen mi nja.

¹⁸ E dhanu para bibedo i kabedo mi kwiocwiny, man i udi ma museme, man i kayom ma ti.

¹⁹ Ento pei bicore wi luli m’urangre; e jubiredho adhura piny kot.

²⁰ Wu jumugisa wu ju ma wucoyo ng’et pi ceke, ma wuoro tiend koni dhiang’ ku mi kana.