Isaya 30 - The Holy Bible In Alur (Lur) Revised Orthography

Lemkasegu mi Geno Misiri

¹ Can i wi nyithindho mi jai, Yehova wacu, m’uporo lembe, ento i bang’a ngo; man m’utimo lembariba, ento ku Tipona ngo, kara gimed dubo kum dubo;

² m’utugo woth kara gilor i Misiri, ma gikupenjo i dhoga ngo; kara gidwokri tek i tego pa Farao, man kara giring gipond i tipopiny mi Misiri!

³ Ka kumeno tego pa Farao bibedo lewic mu, man pondo i tipopiny mi Misiri ang’abacwiny mu.

⁴ Kum judongomawijo migi gini i Zoan, man jukwenda migi giwok i Hanes.

⁵ Lewic binegogi ceke kum dhanu ma copo bedo ni kuloka igi ngo, ma gibedo ni kony kadi kuloka de ngo, ento lewic, man cac bende.

⁶ Ewolembe ma pi yedi ma yor ariwa ma piny. Kud i ng’om mir ang’abacwiny ku ndiba, ma min umvor kud umvor giai i ie, bunyo ku thwol mi mac ma ringo, giyeyo lonyo migi wi nyithi kana, man piny m’akana migi wi kwomb ngamia, ba dhanu ma bimio kuloka igi ngo.

⁷ Kum Misiri konyo mananu, man ma kulokane mbe: ka kumeno alwong’e Rahab m’ubedo ling’.

⁸ Kawono cidhi, gore i wang’gi wi ban, man ikiewe i kitabu, kara ebed mi nindo m’ubino mi nja ku nja.

⁹ Kum en e dhanu mi jai, nyithindho mi cwayu ndra, nyithindho ma biwinjo cik pa Yehova ngo;

¹⁰ ma giwacu ni jueulembe kumae, Kud wunen; man ni jubila kumae, Kud wueu iwa gin m’atira, wuyer iwa gin ma yom, wueu lembabombi,

¹¹ wuai kud i yo, wulokru cen kud i gengi, wuketh Ng’atu Maleng’ mir Israel ujik kud i wang’wa.

¹² Kum kumeno Ng’atu Maleng’ mir Israel uwacu kumae, Kum wucayu lembe maeni, man wugeno rop ku lem ma kite mbe, wujengru i wie de;

¹³ ka kumeno kier maeni bibedo iwu calu ka m’ung’eny m’uyenyo podho, m’ugom i gang’kidi ma wiu, ma rwombrene bino pio i nindo ma nyagwil.

¹⁴ Man ebing’enye calu agulu pa jacwiagulu ng’eny, m’eng’enye nziki nziki m’eweko ngo; ketho nia ebinwang’u dekle ngo i kind kodine m’ecopo gamu ko mac i kendo, kadi m’etwom ko pi kud i kulo m’atong’a.

¹⁵ Kum Rwoth Yehova, Ng’atu Maleng’ mir Israel, uwacu kumae, Wubiboth ni kum dwogo ku yom; tego mu bibedo nuti ni kum bedoyo man genogen. E wuyenyo ngo;

¹⁶ ento wuwacu kumae, Ungo, kum wabiringo ku wi riuni; ka kumeno wubiringo: man, Wabiringo wi jung’wec; ka kumeno ju m’uriemowu bibedo jung’wec.

¹⁷ Rubanga acel biringo ni kum cim pa ng’atu acel; wubiringo ni kum cim mi juabic: cil ma wubedo ko calu mbegi wi usimbru got, man calu abera wi ungulu got.

Lembang’ola pa Mungu pi Mio Bero ni Jupare

¹⁸ E ka kumeno Yehova bikuro, kara ebed ku bero i kumi; e ka kumeno ebidodre, kara kisa nege i kumi: kum Yehova en e Mungu mi pokolembe; mugisa kwany dhanu ceke m’ukure.

¹⁹ Kum dhanu bibedo i Sayuni i Yerusalem; ibiywak kendo ngo; ebinyutho bero iri andha kan iywak i bang’e; kinde m’ebiwinjo, ebiloko iri lembe.

²⁰ Man kadok Rwoth umio iri kwen mi ruvwa ku pi mi masendi, ento juponji peri bibedo apana kendo ngo, ento weng’i bineno juponji peri;

²¹ e ithi biwinjo lembe yor i ng’ei, m’uwacu kumae, Maeni yo, wuwoth i ie; kinde ma wulokru yo ku cing’ ma yor acwic, man kinde ma wulokru yor acam.

²² Man wubicido girauma peri mir ayi gin m’acwia mi mola ma tar m’ang’ika, man giramwona mir ayi gin m’acwia peri mi mola ma kwar m’atwaga; ibibayugi cen calu gin m’ucido; ibiwacu ire kumae, Ai kakeni.

²³ Man ebimio koth ni kodhi peri, m’ibicoyo kudo ng’om; man kwen ni kum nyai m’i ng’om, man ebibedo mio man dupa. I ceng’ maeca lim peri bicamu i kakwae ma lac;

²⁴ koni dhiang’ bende ku kana ma thindho m’ufuro ng’ombe bicamu cemo ma mit, ma juyero ku lupaukwer man ku gute.

²⁵ Man kulo ku kulo mi pi bibedo nuti wi gudi ma wiu kubang’e kubang’e, man wi ungulu gudi ma wiu kubang’e kubang’e, i ceng’ mi nek ma dit, kinde ma odkur upodho.

²⁶ Mange ke der mi dwi bibedo calu der mi ceng’, man der mi ceng’ jubimedo wang’ abiro, calu der mi ceng’ abiro, i ceng’ ma Yehova twio ie wang’ lero mi dhanu pare, man m’ecangu ie goc mi rem migi.

Pokolembe pa Yehova wi Ascur

²⁷ Nen, nying’ Yehova ai ku bor, m’ebewang’ ku ng’ecwiny pare, man i yiro ma pek m’uwinjre malu: dendhoge pong’ ku kwinyo, man lebe calu mac m’ucamu;

²⁸ man yuyo pare calu kulo m’ucoro piny, m’utundo cil kum ng’ut, kara uyek thek ku jambyeko mi nyoth: man jamtwiny ma ketho jukier bibedo i lwokni mi kodhidhanu.

²⁹ Wubibedo ku wer calu mi diewor kinde ma jukwiro agba ma leng’; man mutoro mi cwiny, calu kinde ma ng’atu moko cidho kud ungbalu kara ebin ba got pa Yehova, ba Cana mir Israel.

³⁰ E Yehova biketho dwal pare mi dwong’ winjre, man ebinyutho loro piny mi bote, ku kwinyo mi ng’ecwiny pare, man lebmac mi mac ma wang’u, ku morpiny, man wavuvu, man kidi mi pei.

³¹ Kum ni kum dwand Yehova cwiny Jaascuri bing’abre; ebigoye kud uluth pare.

³² Man ku ba goc ceke mir uluth ma jung’olo, ma Yehova biketho i kume, bibedo karacelo ku badwal mir umbukulumbu kud adungu; man i lwiny karacelo ku wir mi bote ebikiedo kugi.

³³ Kum Kanyoth juyiko con; eyo, juyiko ni ubimo; etime thuth man lac; udhurune en e mac ku yen ma dit; yuyo pa Yehova, calu kulo mi muganga, ubecwinye.