Isaya 3 - The Holy Bible In Alur (Lur) Revised Orthography

Pokolembe pa Yehova wi Yuda man Yerusalem

¹ Kum, nen, Rwoth, Yehova mir udul, ukabu jamjeng’ kud utwindi woko kud i Yerusalem man kud i Yuda, jamjeng’ ceke mi kwen, man utwindi ceke mi pi;

² ng’atu ma jatego, man won ali; japoklembe de, ku jabila, man jaeulembe, ku ng’atu m’uti;

³ man jego mi pier abic, ku ng’atu ma won yung, man japorlembe, ku jabodho ma cu, man ajoga ma riek.

⁴ Man abimio nyithindho ubed ni judongomawijo migi, e mukere bibimo wigi.

⁵ Man jubisendo dhanu, ku ba dhanu ceke ng’atuman wadi bisende, man ku ba dhanu ceke ng’atuman jadhugola pare bisende: nyathin bitimbre ku kuhaya kum jadit, man ng’atu ma sai kum won yung.

⁶ Kinde ma ng’atu moko bimaku umin i ot pa won, m’ebiwacu kumae, Ibedo ku kendi, bed jabim mwa, man wek nyoth maeni bed the cingi;

⁷ i ceng’ maeca ebiting’o dwande malu, ebiwacu kumae, Abibedo jakeikum ungo; kum kwen umbe i ot para kadok kendi de: kud wuketha ni jabim mi dhanu.

⁸ Kum Yerusalem unyothre, man Yuda podho; kum lebgi ku giratima migi en e kum Yehova, kara unyai ng’ecwiny i wang’ dwong’ pare.

⁹ Nen ma gineno ko dhanu tung’ tung’ i wang’gi nyutho lembe i kumgi; man giewo dubo migi calu Sodoma, gipane ngo. Can wi ng’eyong’ec migi! kum gitimo rac i kumgi gigi.

¹⁰ Wuwac pi won bedopwe, nia lembe bibedo ber ire: kum gibicamu nying’ giratima migi.

¹¹ Can wi jadubo! lembe bibedo rac ire; kum gin ma cinge timo bicule ire.

¹² Dhanu para, nyithindho gi jusend migi, man mon ubimo wigi. E dhanu para, ju m’utelo wii giketho ikier, man ginyotho yo mi woth peri.

¹³ Yehova ai kara eii, man ecungo kara epok lembe mi kodhidhanu.

¹⁴ Yehova bimondo i pokolembe ku judongo mi dhanu pare, man judongomawijone: ebiwacu kumae, En e wun ma wucamu podho mir ulok; ayeki mi can ni i udi mu:

¹⁵ the lembang’o m’uketho wunyono dhanu para, man wung’inyo wang’ jucani? Rwoth, Yehova mir udul uwacu.

Pokolembe wi Nyig Sayuni

¹⁶ Mange ke Yehova wacu kumae, Kum nyig Sayuni gi jukuhaya, man giwotho acika ng’utgi, man ku wang’ mi dubo, ma gibewotho ko akira tiendgi, ma giyengo ko ngara ku tiendgi de;

¹⁷ ka kumeno Rwoth bigoyo nyig Sayuni ku gwenyo i die wigi, man Yehova biyabu lewic migi ngbeng’.

¹⁸ I ceng’ maeca Rwoth bikabu bero mi gwang’ migi, man giraruka mi voi, kud ayi dwi;

¹⁹ man nzir, man gwang’, ku bongu ma bor mi wang’;

²⁰ man giratwia mi wie, ku nyoro mi tielo, manthondpiermiruko, kusanduk mi gin ma ng’wice ng’ar, man sibra mi tielo;

²¹ man lagith, ku gwilo;

²² ku kendi mi ceng’ ma dwong’, kud ugoke, man bongu m’abola, man usau;

²³ man kieu mi cing’, ku bongu ma nwang’ ma ber, ku gali, man bongu mi wang’.

²⁴ Man ebitimbre, nia top bibedo ka yath ma jwa jwa ma ber; man uno, ka ruko mi pier; man wie m’uwang’, ka yukwic ma cu; man giratwia mi go nia, ka kanzu; man poyo, ka leng’kum.

²⁵ Dhanu peri bipodho ku palamularu, man jutego peri bipodho i ali.

²⁶ E dhugang’ pare biywak ku goyonduru; e jubidwoke ni uvuru man ebibedo wi ng’om.