Isaya 26 - The Holy Bible In Alur (Lur) Revised Orthography

Wer pi Geno Gwok pa Yehova

¹ I ceng’ maeca jubiwero wer maeni i ng’om mi Yuda: Wabedo kud adhura ma tek; ebiketho both ni gang’kidi ku ot ma tek.

² Wuyab dhugang’, kara thek ma pwe ma gwoko yioyic umondi.

³ Ibigwoko ng’atu ma pidoie moko i kumi i kwiocwiny ma ndhu cu; kum egeni.

⁴ Wugen Yehova mi nja; kum ni kum Yehova, en e Yehova, cana mi nja nuti.

⁵ Kum ejwigo ju m’ubedo malu piny, adhura m’utingre: eredhe piny, eredhe piny kpe i ng’om; ekele cil i utur.

⁶ Tielo binyone piny; en e tielo mi jucan, ku dakutielo mi jucanpiny.

⁷ Yo pa won bedopwe en e atira: in m’ibedo atira itiro yo pa won bedopwe.

⁸ Eyo, i yo mi pokolembe peri, E Yehova, wakuri; ava ng’eyong’ec mwa ni yo ba nyingi, man yo ba poi mi nyingi.

⁹ Ku ng’eyong’ec para ayenyi ku diewor; eyo, ku tipona ma yor i ia abiyenyi kud amora: kum kinde ma lembapoka peri ni i ng’om, ju m’ubedo i ng’om giponjo ng’eyo bedopwe.

¹⁰ Wek junyuth bero ni jadubo, ento ebiponjo ng’eyo bedopwe ngo; ebitimo kier i ng’om m’atira, man ebineno dwong’ pa Yehova ngo.

¹¹ Yehova, cingi tingre malu ento gineno ngo: ento gibineno ngiri peri ma pi dhanu, e lewic bimakugi; eyo, mac bicamu jusend peri.

¹² Yehova, ibing’olo kwiocwiny piwa; kum itimo tic mwa ceke bende iwa.

¹³ E Yehova Mungu mwa, rwodhi mange ma in ungo gibimo wiwa; ento ni kumi kende wabiweco pi nyingi.

¹⁴ Githo, gibibedo kwo ungo; gin avu, gibiai ungo: ka kumeno iliewogi man inyothogi, e iketho poi ceke ma pigi rwinyo.

¹⁵ Imedo thek, E Yehova, imedo thek; juyungi; imedo kieu ceke m’i ng’om.

¹⁶ Yehova, giliewi i can; gikonjo rwo kinde ma ponji peri ni i wigi.

¹⁷ Calu dhaku ma ie nuti, m’ucoro ceng’ni i nindo mi nyol pare, bedo i remokum man ywak i remokum pare; e wabedo i weng’i kumeca, E Yehova.

¹⁸ Wabedo ku ic, wabedo i remokum, wabedo calu wanyolo yamu; watimo both moko i ng’om ungo; kadok dhanu m’ubedo i ng’om de gipodho ngo.

¹⁹ Avu peri bibedo kwo; avu para gibicer. Wuceu man wuwer wer, wu ju m’ubedo i utur; kum thoi peri en e calu thoi mir uboko, e ng’om biwodho avu.

²⁰ Wubin, dhanu para mond i kusika peri, man icik dhugola peri i wii: pond i nindo ma nyagwil, maram ng’ecwiny ukadh ko.

²¹ Kum, nen, Yehova ai kud i kakare kara esend ju m’ubedo i ng’om kum kier migi: ng’om bende biyabu rimo pare, man ebiumo ju ma junego pare kendo ngo.