Isaya 17 - The Holy Bible In Alur (Lur) Revised Orthography

Ewolembe pi Dameski

¹ Ewolembe ma pi Dameski. Nen, a jukabu Dameski kud ubed ni adhura, e ebibedo ni udhuru mir uvuru.

² Juweko adhura mir Aroer; gibibedo mir udul rombe, ma bivuto piny, e ng’atu moko mbe ma binyajm lworo i igi.

³ Man ot ma tek bijik i Efraim, man ker i Dameski, man dong Cami m’udong’; gibibedo calu dwong’ mi nyithindho mir Israel, Yehova mir udul uwacu.

Pokolembe wi Israel

⁴ Man ebitimbre ceng’ maeca, nia dwong’ pa Yakobo bijwik, man mio mi ring’kume bimok.

⁵ Man ebibedo calu kinde ma janyar mwoka coko cam ma wi tiende, man bote nyaru withe; eyo, ebibedo calu kinde ma ng’atu moko beko with cam i poga mi Refaim.

⁶ Ento kunde bidong’ i ie, calu yeng mi yend ulam, nyinge ario kadi adek wi jange ma wi lwithe, ang’wen kadi abic wi jange mi ng’ete ma y o woko mi yen ma cek cu, Yehova, Mungu mir Israel, uwacu.

⁷ I ceng’ maeca dhanu bineno ba Jacwic migi, wang’gi de bineno ba Ng’atu Maleng’ mir Israel.

⁸ E gibineno ba pemblam ungo, ma tic mi cing’gi; kadok maeno ma lwetgi timo en de gibiparu pire ngo, kadok mungu m’araga de, kadok ayi gin m’acwia mi cing’.

⁹ I ceng’ maeca adhura migi ma tek bibedo calu ka ma juweko i luli man wi usimbru gudi, ma juweko i wang’ nyithindho mir Israel; e ebibedo ni uvuru.

¹⁰ Kum wii wil kum Mungu mi both peri, man ii pido ngo pi cana mi tego peri; ka kumeno ipidho girapidha ma ber, man ikethe karacelo ku jange ma tung’.

¹¹ I ceng’ m’ipidhe i ie itwode, man kugweno iketho kodhi peri thiwo; ento mwoka rwinyo woko i ceng’ mi can ku ruvwa m’apila.

¹² A, woi mi kodhidhanu dupa, m’uwoi calu woi mi nam; man cori mi thek, m’ucore calu cori mi pi ma dit mire!

¹³ Thek bicore calu cori mi pi dupa: ento ebijukogi, man gibiringo bor cen, man jubiriemogi calu cung’ mi gudi i wang’ yamu, man calu utur mir atido i wang’ wavuvu.

¹⁴ Uthieno, nen, ndiri; e ma fodi kugweno kuwok ungo gimbe. Maeni makapiny mi ju m’unyothowa, man gagi m’upodho wi ju m’uyakuwa.