Isaya 16 - The Holy Bible In Alur (Lur) Revised Orthography

¹ Wuor nyithi rombe ni jabim m’i ng’om ugambre Sela cil kum langa, ba got pa Nyasayuni.

² Kum ebibedo, calu winyo m’uberingo swa, calu odwinyo ma jung’enyo, nyig Moab bibedo kumeca i kakadhu mir Arnon.

³ Mi lembapora, tim lembapoka ma pwe; tim tipopiny peri calu diewor i kind dieceng’; pan ju ma juriemo; kud icib ng’atu m’upiei.

⁴ Wek jupara ma juriemo bed karacelo kudi; pi Moab, bed girauma ire ni wang’ janyoth. Kum juranju javug, nyoth ujik, jusend ginyothri kud i ng’om.

⁵ E jubiketho komker cungo i mer mi bero; e ng’atu moko bijany i wie i lemandha, i hema pa Daudi, m’ebepoko lembe, m’ebeyenyo lembapoka de, m’ebedo kud amora kum timo bedopwe.

⁶ Wawinjo pi kuhaya mi Moab, nia kuhaya time dit; cil pi tingri pare, ku kuhaya pare, man kwinyo pare;! kulula pare gi mananu.

⁷ Ka kumeno Moab bigoyo nduru pi Moab, ku ba dhanu ceke ng’atuman bigoyo nduru; kum wubiywak pi kwen mi nyingulok mi Kir-hareseth, ma jugoyo kot.

⁸ Kum pothi mi Hecbon unyothre, man ulok mi Sibma; rwodhi mi thek uturo jange ma jufoyo, m’utundo cil kum Yazer, m’uwotho swa i langa; nyithindhe loth mba mba, gikadhu loka nam.

⁹ Ka kumeno abiywak ku ywak mi Yazer pir ulok mi Sibma; abikwoyo piwang’a i kumi, E Hecbon, man Eleale: kum kok mi lwiny upodho wi nyingi mi cwir man wi mwoka peri.

¹⁰ Man jukabu mutoro cen, kud anyong’a kud i podho m’ucego hai; e wer bibedo mbe i podho mir ulok, kadok badwal mi mutoro de: jabic moko mbe ma bibio pigulok i pany; ajigo badwal mir anyong’a mi bic.

¹¹ Kum kumeno adundena ywak calu adungu pi Moab, man cindia pi Kir-heres.

¹² Man ebitimbre, kinde ma Moab uwodhre gire, kinde m’eol gire wi ka ma malu, man ebibino ba kamaleng’ pare nirwo, nia ebisagu ngo.

¹³ Maeni lembe ma Yehova yero pi Moab i nindo m’ukadhu.

¹⁴ Ento kawono Yehova yero, ewacu kumae, Ma fodi rundi adek kuthum ungo, calu rundi pa jagamsukulia, jubikelo dwong’ mi Moab i cac, kud udul pare ma dit ceke; e donge m’udong’ bibedo nok dit man kabang’e bibedo mbe.