Isaya 15 - The Holy Bible In Alur (Lur) Revised Orthography

Ewolembe pi Moab

¹ Ewolembe ma pi Moab. Kum Ar mi Moab unyothre i diewor acel, man judwoke mananu; kum judwoko Kir mi Moab ni uvuru i diewor acel man judwoke mananu.

² Giidho malu i Bayith, man i Dibon, ba ka ma malu, niywak: Moab ugoyo nduru kum Nebo, man kum Medeba; wie m’uwang’ ni i wigi ceke, junyaru tik kubang’e kubang’e ceke.

³ I gengi migi gitwiri gigi ku gonia; wi udi migi, man i ka ma lac migi, ku ba dhanu ku ba dhanu ng’atuman ugoyo nduru, ma gibeywak ko hai.

⁴ Man Hecbon umojo ywak, kud Eleale; dwandgi winjre cil kum Yahaz: ka kumeno weg jamtho mi Moab ukok ma tek; ng’eyong’ec pare miel yor i ie.

⁵ Adundena ywak pi Moab; weg yung pare ringo cil kum Zoar, ba Eglath-celicia: kum giidho malu ku goyo nduru ku kaidho mi Luhith; kum giting’o ywak mi nyoth i yo mi Horonaim.

⁶ Kum pi mi Nimrim binyothre; kum lum uner, arusi thum, gin ma numu moko mbe.

⁷ Ka kumeno piny ma dit ma ginwang’u, ku gin ma gikanu gibiyeyo loka kulo mi mbegu.

⁸ Kum ywak utieko kieu mi Moab gbur; goyondurune cil kum Eglaim, man goyondurune cil kum Ber-elim.

⁹ Kum pi mi Dimon gipong’ ku rimo; kum abikelo mange kendo wi Dimon, umvor wi ju mi Moab m’uboth, man wi dong’ ng’om m’udong’.