Hagai 2 - The Holy Bible In Alur (Lur) Revised Orthography

Dwong’ mi Hekalu ma Nyen

¹ I dwi mir abirone, i ceng’ pier ario wi acende mi dwije, lembe pa Yehova bino ku dhu Hagai ma jabila, m’uwacu kumae,

² Kawono yer ni Zerubabel ma wod Cealtiel, ma jabim mi Yuda, man ni Yocuwa ma wod Yehozadak, ma jalam ma dit, man ni dong’ dhanu, wac kumae,

³ Ng’a m’udong’ i kindwu m’uneno ot maeni i dwong’ pare ma kwong’a? man wunene kawono nenedi? ebedo i weng’wu ngo calu gin moko ngo?

⁴ Ento kawono wubed tek, E Zerubabel, Yehova wacu; man bed tek, E Yocuwa, ma wod Yehozadak, ma jalam ma dit; man wubed tek, wu dhanu ceke mi ng’om, Yehova wacu, man wutim tic: kum wanuti wakudu, Yehova mir udul uwacu,

⁵ calku lembe ma waribo wakudu ka wuai kud i Misiri, man Tipona bedo i kindwu: kud wulwor.

⁶ Kum Yehova mir udul uwacu kumae: Wang’ acel kendo, en e fodi nyanok, e abiyengo polo, ku ng’om, man nam, ku ng’om m’uthwo:

⁷ man abiyengo thek ceke; man gin ma juketho cwiny i kume mi thek ceke bibino; e abipong’o ot maeni ku dwong’ Yehova mir udul uwacu.

⁸ Mola ma tar en e para, mola ma kwar de en e para, Yehova mir udul uwacu.

⁹ Dwong’ ma cen mi ot maeni bisagu ma kwong’a, Yehova mir udul uwacu; man i ka maeni abimio kwiocwiny, Yehova mir udul uwacu.

Cim ni Dhanu kum Bedo Mandha Ngo Migi

¹⁰ I ceng’ pier ario wi ang’wende mi dwi abung’wende, i rundi mir arionde pa Dario, lembe pa Yehova bino ku dhu Hagai ma jabila, m’uwacu kumae,

¹¹ Yehova mir udul uwacu kumae: Kawono penj julam pi cik, wac kumae,

¹² Tek ng’atu moko yeyo ring’kum ma leng’ dhu kendi pare, man tek dhu kendi pare mulo kum kwen, kadi dek, kadi pigulok, kadi mo, kadi cemo moko, ebidoko leng’i? Man julam uloko lembe e giwacu kumae, Ungo.

¹³ Hagai lund uwacu kumae, Tek ng’atu moko m’ucido ni kum avu mulo gin maeni moko, ebicido? E julam giloko lembe giwacu kumae, Ebicido.

¹⁴ Hagai lund uloko lembe man ewacu kumae, Dhanu maeni bedo kumeni, man thek maeni bedo kumeni i wang’a, Yehova wacu; man tic mi cing’gi kubang’e kubang’e bedo kumeni; man gin ma githiero keca ecido.

¹⁵ E kawono, akwayuwu, iwu pid ugambre i ceng’ maeni ku ma kwong’a, ma fodi jukuketho kidi wi kidi wagi ngo i hekalu pa Yehova.

¹⁶ I nindo maeca ceke, ka ng’atu acel ubino bang’ udhuru mi mukero pier ario, en e apar kende; ka ng’atu moko bino ba pany ma bio pigulok kara ewodh pigulok mir agulu pier abic, ebedo pier ario kende.

¹⁷ Agoyowu ku motho man laimo ku pei i tic ceke mi cingwu; ento wulokru i bang’a ngo, Yehova wacu.

¹⁸ Akwayuwu, iwu pidi; ugambre i ceng’ maeni man m’ukadhu, ugambre i ceng’ pier ario wi ang’wende mi dwi abung’wende, ugambre i ceng’ ma juguro ie the hekalu pa Yehova, wupid pire.

¹⁹ Kodhi fodi ni i dero? eyo, ulok, man yendubolo, kud ulemo, man yendulam gicego gin moko ngo; ugambre i ceng’ maeni abimio mugisa iwu.

Lembang’ola pa Yehova ni Zerubabel

²⁰ Man lembe pa Yehova bino wang’ arionde ba Hagai i ceng’ pier ario wi ang’wende mi dwi; m’uwacu kumae,

²¹ Yer ni Zerubabel ma jabim mi Yuda, wac kumae, Abiyengo polo ku ng’om;

²² man abiredho komker mi ker; man abinyotho tego mi ker mi thek; man abiredho magali, ku ju m’uringo i igi; man riuni ku ju m’ubedo i wigi gibipodho piny, ng’atuman ku palamularu pa wadi.

²³ I ceng’ maeca, Yehova mir udul uwacu, abigemi, E Zerubabel, ma jatic para, ma wod Cealtiel, Yehova wacu, man abiketho ibedo calu lagith mir ayi; kum agoyo wii, Yehova mir udul uwacu.