Ezra 6 - The Holy Bible In Alur (Lur) Revised Orthography

¹ Dario m’ubimo lund utimo ng’ol, man juyenyo i ot mi kitabu mi kei, ka ma jukanu ie piny m’akana i Babeli.

² E junwang’u kitabu m’adola i Akmetha, i odker ma ni i ng’etker ma Media, man egore i ie kumeni ni lempoi:

³ I rundi ma kwong’ane pa Kuro m’ubimo, Kuro m’ubimo timo ng’ol kumae: Pi ot pa Mungu i Yerusalem, dong’ ot ugombre, ka ma gimio ie lam, man wek jugom there tek; kadongone bot pier abusiel, kalacne de bot pier abusiel;

⁴ ku wang’e adek mi kidi ma dongo, man wang’e acel mi yen ma nyen: man wek jumi wel piny mi tije kud i ot p’ubimo.

⁵ Man wek agulu mi mola ma kwar ku mi mola ma tar bende mi ot pa Mungu, ma Nebukadnezar uyaku kud i hekalu ma ni i Yerusalem, man ekelo Babeli, judwoki, man jukel kendo i hekalu ma ni i Yerusalem, kubang’e kubang’e man i kakare man i kakare; e ibikethogi i ot pa Mungu.

⁶ Ka kumeno kawono, Tatenai, ma jabim ma loka Kulo, man Cethar-bozenai, man juwedu ma Juafarsaki, ma gini loka Kulo, dong’ wubed cen ku kuca:

⁷ wuwek tic mi ot pa Mungu maeni udong’; wuwek jabim mi Juyahudi man judongo mi Juyahudi gigom ot pa Mungu maeni i kakare.

⁸ Mange ke atimo ng’ol pi gin ma wubitimo ni judongo maeni pi gomo ot pa Mungu maeni: nia kum piny p’ubimo, cil kum ajok ma loka Kulo, wel piny mi tije mire ni dhanu maeni kud amora, kara ku jucergi.

⁹ Man maeno ma cande negogi, gi thwoni dhiang’ m’aradu, ku nyogi rombe, ku nyithi rombe, ni lam m’awang’a ni Mungu m’i polo; nganu bende, ku kadu, ku pigulok, man mo, calku lembe mi julam ma ni i Yerusalem, dong’ emire igi ceng’ ku ceng’ dhara;

¹⁰ kara gimi lam ma ng’wice ng’ar ni Mungu m’i polo, girwo de pi kwo p’ubimo, man mi wote.

¹¹ Atimo cik bende, nia ng’atu ma tek biloko lembe maeni, wek juwodh riu kud i ot pare woko, man wek juting’e malu juliere i wie; man wek ot pare dok ni udhuru weyo pi maeni:

¹² man Mungu m’uketho nyinge bed keca eredh ubimo ceke ku suru ceke ma birieyo cing’gi kara gilok maeno, kara ginyoth ot maeni pa Mungu ma ni i Yerusalem. An a Dario atimo cik; dong’ jutime kud amora ceke.

¹³ Tatenai, ma jabim ma loka Kulo, man Cethar-bozenai, ku juwagi, gilund gitimo kumeno kud amora ceke, kum Dario m’ubimo oro kwenda.

¹⁴ Man judongo mi Juyahudi gigomo man lembe bedo miero igi, ni kum lembaewa pa Hagai ma jabila man Zekaria ma wod Ido. E gigomo gidare de, calku lembang’ola pa Mungu mir Israel, man calku cik pa Kuro, ku Dario, man Artacacta gi ju m’ubimo mir Ajemi.

¹⁵ Man judaru ot maeni i ceng’ mir adege mi dwi Adar, ma ni i rundi mir abusiende mi camuker pa Dario m’ubimo.

¹⁶ Man nyithindho mir Israel, julam man Julawi, ku dong’ nyithindho mi ng’eca, gikwiro thier mi ot maeni pa Mungu ku mutoro.

¹⁷ Man i thier mi ot maeni pa Mungu gimio thwoni dhiang’ dak acel, ku nyogi rombe dak ario, man nyithi rombe dak ang’wen; man gimio nyogi diegi apar wi ario, ni lam mi dubo mir Israel ceke, calku wel suru mir Israel.

¹⁸ Man giketho julam i pok migi, man Julawi i kur migi, pi timotim pa Mungu, ma ni i Yerusalem; calu egore i kitabu pa Musa.

¹⁹ Man nyithindho mi ng’eca gikwiro kadhukuwijo i ceng’ apar wi ang’wende mi dwi ma kwong’ane.

²⁰ Kum julam ku Julawi gidwokri gigi leng’ karacelo; kagi ceke gi leng’: man githumo kadhukuwijo pi nyithindho mi ng’eca ceke, man pi uturneggi ma julam, man pigi gigi.

²¹ Man nyithindho mir Israel m’uai kendo kud i ng’eca, man wagi dhanu ceke m’ukoiri gigi igi ni cilo mi thekdhanu m’i ng’om, kara giyeny Yehova, Mungu mir Israel, gicamu,

²² man gikwiro agba mi kwen ma thobi mbe i ie ceng’ abiro kud anyong’a: kum Yehova nyayu mutoro i igi, man eloko adunde ubimo mir Ascur i bang’gi, kara edwok cing’gi tek i tic mi ot pa Mungu, Mungu mir Israel.