Ester 9 - The Holy Bible In Alur (Lur) Revised Orthography

Juyahudi Unyotho Judegigi

¹ Nie i dwi mir apar wi arionde ma en e dwi Adar, i ceng’ apar wi adege mi dwije, ka lembang’ola p’ubimo ku cik pare dhingo timbre, i ceng’ ma judegi mi Juyahudi gigeno ya gibibedo ku bim i wigi (ento elokre tung’, nia Juyahudi e ma gibedo ku bim wi ju m’udagugi),

² Juyahudi gicoko dhoggi karacelo i adhura migi i ng’etker ceke p’ubimo Ahasuerus, kara giketh cing’gi kum ju m’uyenyo gitimgi rac: e ng’atu moko mbe ma copo goyo kore i nyimgi; kum lworo migi podho wi kodhidhanu ceke.

³ Man judongomawijo ceke mi ng’etker, ku jego, ku jubim, ku ju m’utimo tic p’ubimo gikonyo Juyahudi; kum lworo pa Mordekai podho i wigi.

⁴ Kum Mordekai bedo dwong’ i ot p’ubimo, man pire yik cil i ng’etker ceke; kum ng’atu ma Mordekai doko dit m’usagu asaga.

⁵ Man Juyahudi gigoyo judegi migi ceke ku goc mi palamularu, man ku nek ku nyoth de, man gitimo calu giyenyo kum ju m’udagugi.

⁶ Man i Cucan ma odker Juyahudi ginego ginyotho de dhanu dak abic.

⁷ Man Parcandatha, ku Dalfon, man Aspatha,

⁸ man Poratha, kud Adalia man Aridatha,

⁹ Man Parmacta, kud Arisai, man Aridai, man Vaizatha,

¹⁰ ginego juapar maeni ma gi wot Haman ma wod Hamedatha, ma jadegi mi Juyahudi: ento giketho cing’gi kum ayeki ngo.

¹¹ I ceng’ maeca wel ju ma junego i Cucan ma odker jukelo i wang’ ubimo.

¹² E ubimo wacu ni Ester ma ci ubimo kumae, Juyahudi ginego ginyotho dhanu dak abic i Cucan ma odker, man wot Haman apar; ka kumeno nyo gitimo ang’o i dong’ ng’etker p’ubhno! Ka kumeno penji peri ang’o? man ebimire iri: kadi kwac peri ang’o mange? e ebitimbre iri.

¹³ Ester ulund uwacu kumae, Tek emaku i ubimo, dong’ emire ni Juyahudi ma ni i Cucan ya gitim urwo bende calku cik ma tin, man dong’ julier wot Haman apar wi yen m’agura.

¹⁴ Man ubimo ng’olo ya etimbre kumeca: man cik umire i Cucan; e giliero wot Haman apar.

¹⁵ E Juyahudi ma gini i Cucan gicokri gigi karacelo i ceng’ apar wi ang’wende bende mi dwi Adar, man ginego dhanu dak adek i Cucan; ento giketho cing’gi ngo kum ayeki.

Cemo mi Ceng’ Purim

¹⁶ Man Juyahudi mange ma gini i ng’etker p’ubimo gicokri gigi karacelo, man gicungo pi kwo migi, e ginwang’u yom kum judegi migi, man ginego dhanu rubanga pier abiro wi abic ju m’udagugi; ento giketho cing’gi kum ayeki ngo.

¹⁷ Gin maeni timbre i ceng’ mir apar wi adege mi dwi Adar; man i ceng’ mir apar wi ang’wende mi dwije giyom, man giketho cenge ni ceng’ mi cemo ku mutoro.

¹⁸ Ento Juyahudi ma gini i Cucan gicokri karacelo i ceng’ mir apar wi adege mi dwije, man i ceng’ apar wi ang’wende; man i ceng’ apar wi abije mi dwije giyom, e giketho cenge ni ceng’ mi cemo ku mutoro.

¹⁹ Kum kumeno Juyahudi ma i pacu, m’ubedo i pacu ma gang’kidine mbe, giketho ceng’ apar wi ang’wende mi dwi Adar ni ceng’ mi mutoro ku cemo, man ceng’ ma ber, ku mi oro piny ni wadijo.

²⁰ Man Mordekai goro gin maeni, man eoro waragane ba Juyahudi ceke ma gini i ng’etker ceke p’ubimo ma Ahasuerus, ma ceng’ni ku ma bor,

²¹ kara eng’ol igi nia gikwir ceng’ apar wi ang’wende mi dwi Adar, ku ceng’ apar wi abije mi dwijuno, ku ba rundi ku ba rundi,

²² calu ceng’ ma Juyahudi nwang’u yom i ie kum judegi migi, man dwi ma juloko ie can migi ni mutoro, man ywak migi ni ceng’ ma ber; kara giketh gibed ni ceng’ mi cemo ku mutoro, man mi oro piny ni juwadijo, ku giramia ni jucan.

²³ E Juyahudi gimaku timo calu githeko, man calu Mordekai kiewo igi;

²⁴ kum Haman ma wod Hamedatha, ma Jaagagi, ma jadegi mi Juyahudi ceke, m’uporo lembe kum Juyahudi kara enyothgi, man egoyo Pur, ma en e gagi, kara edargi, man kara enyothgi;

²⁵ ento ka lembene wok i wang’ ubimo, eng’olo ku waraga nia lembapora pare ma rac, m’eporo kum Juyahudi, udok i wie gire, man nia en ku wote juliergi wi yen m’agura.

²⁶ Kum kumeno gilwong’o ceng’ maeni Purim, calku nying, Pur. Ka kumeno kum lembe ceke mi waraga maeni, man kum maeno ma gineno pi lembene, ku gin m’uwok i kumgi,

²⁷ Juyahudi ging’olo cik, man gigamu lembene i korgi, i kor nyikwai g i de, man i kor dhanu ceke ma giribri gigi gikugi, kara lembene kud urwiny, nia gibikwiro ceng’ ario maeni calku gorone, man calku nindone ma jung’olo, ku ba rundi;

²⁸ man kara ceng’ maeni jupoi pire jukwir de kum dhanum’utuk kubang’gi kubang’gi, juudi ceke kubang’gi kubang’gi, man ng’etker ceke kubang’e kubang’e, kud adhura ceke kubang’e kubang’e; man kara ceng’ maeni mi Purim kud urwiny i kind Juyahudi, kadok poi mi ceng’ maeni de kud urwiny ni nyikwaigi.

²⁹ Ester ma ci ubimo, ma nyar Abihail, ku Mordekai ma Jayahudi, gilund gigoro ng’ol ceke kara giketh waraga mir arionde mi Purim ucungi.

³⁰ Man egoro waraga ni Juyahudi ceke, ni ng’etker dak acel ku pier ario wi abiro mi ker pa Ahasuerus, ku lembe mi kwiocwiny man lemandha,

³¹ kara giketh ceng’ maeni mi Purim ucung i nindone ma juketho, calku ma Mordekai ma Jayahudi ku Ester ma ci ubimo ng’olo igi, man calu ging’olo igi gigi man pi nyikwaigi, i lembe mi wekocemo man ywak migi.

³² Man lembang’ola pa Ester uketho lembe maeni mi Purim ucungi; e jugore i kitabu.