Ester 6 - The Holy Bible In Alur (Lur) Revised Orthography

Juketho Haman Uyung Mordekai

¹ I diewor maeca ubimo copo nindo ngo; man eng’olo ya jukel kitabu mi lembagora mi kei, e jusome i wang’ ubimo.

² Man junwang’u egore, nia Mordekai yero pi Bigthana ku Terec, juario ma kind jutic p’ubimo, kind ju ma kuro dhugola, ma giyepyo giketh cing’gi kum ubimo ma Ahasuerus.

³ E ubimo wacu kumae, Yung ku dwong’ ma nedi ma jumio ni Mordekai pi maeni? Jutic p’ubimo ma timo ire gilund giwacu ire kumae, Gin moko mbe ma jutimo ire.

⁴ Man ubimo wacu kumae, Ng’a ma ni i lelagang’i? Nwang’u Haman uwok i lelagang’ ma woko mi ot p’ubimo, kara eyer ni ubimo nia elier Mordekai wi yen m’ubedo ayika ire.

⁵ Man jutic p’ubimo wacu ire kumae, Nen, Haman ucungo i lelagang’. E ubimo wacu kumae, Wek emondi.

⁶ Ka kumeno Haman umondo. Man ubimo wacu ire kumae, Gindang’o ma jubitimo ni ng’atu m’ubimo yenyo eyunge? Nie Haman uwacu yo i adundene kumae, Ng’a m’ubimo yenyo eyunge ma sagu an ngi?

⁷ E Haman uwacu ni ubimo kumae, Ng’atu m’ubimo yenyo eyunge,

⁸ dong’ jukel kendi mi ker ma ubimo kendo, ku riuni ma naka ubimo wotho i wie, ku jamkermiwic ma juketh i wie:

⁹ e dong’ jumi kendi ku riuni i cing’ ng’atu acel m’i kind judongomawijo p’ubimo ma pire yik m’usagu, kara girony ko ng’atu m’ubimo yenyo eyunge, man eketh ewoth ku wi riuni kud i gengi ma dit mir adhura, man gikok i wang’e kumae, Ebitimbre kumeni ni ng’atu m’ubimo yenyo eyunge.

¹⁰ Ubimo lund uwacu ni Haman kumae, Tim pio, man igam kendi ku riuni calu iwacu, e itim cil kumeni kum Mordekai ma Jayahudi, m’ubedo dhugang’ p’ubimo: kud iwek lembe moko m’iwacu dong’.

¹¹ Haman ulund ugamu kendi ku riuni, man eronyo Mordekai, man eketho ewotho kud i gengi ma dit mir adhura, man eyero i wang’e kumae, Jubitimo kumeni ni ng’atu m’ubimo yenyo eyunge.

¹² E Mordekai bino kendo dhugang’ p’ubimo. Ento Haman udok i ot pare pio, ku ywak, ku wie m’ubedo auma.

¹³ Man Haman ugonyo ni Zerec ma cege ku jurimbe de pi gin ceke m’utimbre i kume. Jurieko pare ku Zerec ma cege gilund giwacu ire kumae, Tek Mordekai, m’itheko podho i wang’e, en e mi kodhi mi Juyahudi, ibicope ngo, ento ibipodho i wang’e andha.

¹⁴ Kinde ma gibeweco gikugi, jutic p’ubimo giwok, kara gikel Haman pio ba cemo ma Ester uyiko.