Daniel 8 - The Holy Bible In Alur (Lur) Revised Orthography

Ginmawokiwang’ pa Daniel pi Nyog Rombo ku Nyok Diel

¹ I rundi mir adege mi camuker p’ubimo ma Belcazar ginmawokiwang’ uwok i wang’a, cil i bang’a, an a Daniel, yo ng’ei maeno m’uwok ma kwong’a.

² Man aneno i ginmawokiwang’; nie ebedo kumeno, nia kan aneno, ani i Cucan ma odker, ma ni ng’etker Elam; man aneno i ginmawokiwang’, man ani dhu kulo Ulai.

³ Alund ating’o wang’a malu, man aneno, man, nen, nyog rombo ma tunge ario ucungo nyim kulo: man tunge ario gi boco; ento acel bor ma sagu wagi, man ma bor ma sagu idho ma cen.

⁴ Aneno nyog rombone ubegudo yo reto, man yor ariwa ma malu, ku yor ariwa ma piny; man yedi moko mbe ma copo cungo i wang’e, kadok gin moko de mbe ma copo bodho piny kud i cinge; ento etimo calu ie yenyo, man eyungre gire.

⁵ Man ka ia bepido, nen, nyog die uai yo reto man ebino i wang’ ng’om ceke, man emulo ng’om ungo; man nyok dielne bedo ku tunge ma pire tek i ter nyime.

⁶ Man ebino ba nyog rombo ma tunge ario, m’aneno cungo nyim kulo, man eringo i bang’e ku kwinyo mi tego pare.

⁷ E aneno ecoro ceng’ni nyog rombone, e ng’ecwiny unege i kume, e egudo nyog rombone, man eturo tunge ario; man tego mbe i nyog rombone m’ecung ko i wang’e; ento eredhe i ng’om, man enyone; e moko mbe ma copo bodho nyog rombone kud i cinge.

⁸ E nyog dielne yungre gire apila: man kan edoko tek, tunge ma dit utur; man tunge ang’wen ma pigi tek utwi kakagi yo ba the yamu ang’wen mi polo.

⁹ Man tunge ma nok utwi kud i tunge acel mi kindgi, m’uwobo dit apila, yor ariwa ma piny, man yo nyangu, man yo ba ng’om ma ber hai.

¹⁰ Man edoko dit, cil kum udul m’i polo; man ebolo moko mi kind udul man mi cero i ng’om, man enyonogi.

¹¹ Eyo, eyungre gire cil ni jadit mir udul; man ekabu woko lam m’awang’a pare ma thiri thiri, man juredho ka mi kamaleng’ pare piny.

¹² Man juwodho udul ire karacelo ku lam m’awang’a ma thiri thiri ni kum dubo; man eredho lemandha piny i ng’om e etimo calu ie yenyo man lembe bedo miero ire.

¹³ Alund awinjo ng’atu acel ma leng’ ubeweco; man ng’atu ma leng’ acel mange wacu ni ng’atu maeno m’uweco kumae, Ginmawokiwang’ pi lam m’awang’a ma thiri thiri, ku kier ma timo nyoth, bibedo rokani, ma jumio ko kamaleng’ kud udul ya junyon the tielo?

¹⁴ Man ewacu ira kumae, Cil i nindo mir uthieno ku kugweno rubanga ario ku dak adek; ka jubilund lonyo kamaleng’.

¹⁵ Man etimbre, ka an, cil an a Daniel, aneno ginmawokiwang’, nia ayenyo ang’ei there: man, nen, gin moko cungo i wang’a calu ayi dhanu.

¹⁶ E awinjo dwand dhanu i kind ng’et kulo Ulai, m’ulwong’o, m’uwacu kumae, Gabriel, keth ng’atu maeni ung’ei ginmawokiwang’.

¹⁷ Kum kumeno ecoro ceng’ni ka m’acungo i ie; e kan etundo, lworo maka, man apodho arieba wang’a: ento ewacu ira kumae, Dong’ ing’ei, E wod dhanu; kum ginmawokiwang’ en e mi nindo mi kajikne.

¹⁸ Nie ka wabeweco wakude, nindo ma pek umaka ma wang’a ni yo ba ng’om; ento emulo kuma, man eketho acungo.

¹⁹ Man ewacu kumae, Nen, abiketho ing’ei gin ma biwok i nindo ma cen mi kwinyo; kum en e mi nindo ma juketho mi kajikne.

²⁰ Nyog rombo m’ineno, m’ubedo ku tung ario, gin ubimo mi Medi man Ajemi.

²¹ Man nyog diel ma jarop en e ubimo mi Yunani: man tung ma dit ma ni i ter nyime en e ubimo ma kwong’a.

²² Man pi maeno m’utur, ma ang’wen ucungo kakare, ker ang’wen bicungo kud i thek, ento ku tego pare ngo.

²³ Man i nindo ma cen mi ker migi, kinde ma lembe mi judubo timbre kakare, ubimo m’ubedo ku wang’ mi kwinyo, man m’ung’eyo lembe ma via via, bicungo.

²⁴ Man tego pare bibedo tek, ento ku tego pare gire ngo; man ebinyotho piny ma wang’u ijo, e lembe bibedo miero ire man ebitimo kayeny pare; man ebinyotho jutego ku dhanu ma leng’.

²⁵ Man ni kum lembapida pare ebiketho abombi bed miero i cinge; man ebiyungre gire i adundene, man ebinyotho dupa i bedo migi ma museme: man ebicungo bende kum jaditmawijo mi judongomawijo; ento ebitur ma ku cing’ ungo.

²⁶ Man ginmawokiwang’ mir uthieno ku kugweno ma juyero en e andha: ento cik ginmawokiwang’; kum en e mi ceng’ dupa ma bibino.

²⁷ Man, an a Daniel, cwinya kadhu, man kuma bedo lith ceng’ moko; alund aai malu, man atimo tic p’ubimo: man ia pido kum ginmawokiwang’, ento ng’atu moko mbe m’ung’eyo there.