Daniel 7 - The Holy Bible In Alur (Lur) Revised Orthography

Lek pa Daniel pi Yedi Ang’wen

¹ I rundi ma kwong’ane pa Belcazar m’ubimo mi Babeli Daniel uneno lek ku giranena m’uwok i wie wi kavuto pare: elund egoro lekne man eyero min giki maeni.

² Daniel uyero man ewacu kumae, Aneno i gin m’uwok i wang’a ku diewor, man, nen, yamu ang’wen mi polo ukoto wi nam ma dit.

³ Man yedi ang’wen ma dongo giwok kud i nam, ma gi tung’ tung’ ku wagi.

⁴ Ma kwong’ane calu umvor, man ebedo ku bomb acur: aneno maram bombe luny ko, man juting’e malu kud i ng’om, juketho ecungo wi tiende ario de calu dhanu; man maram jumio ko ire adunde dhanu.

⁵ Man nen, yedi mange, mir arionde, calu wai; man etingre malu wi ng’ete kurucel, man wel ng’et adek ni i dhoge i kind lake: e giwacu ire kumae, Ai malu, cam ring’o dit.

⁶ Yo ng’ei maeni aneno, man, nen, yedi mange, calu ng’u, m’ebedo ku bombe ang’wen mi winyo i ng’eye; yedine bedo ku wie ang’wen bende; man bimobim umire ire.

⁷ Yo ng’ei maeni aneno i ginmawokiwang’ ku diewor, man, nen, yedi mir ang’wende, ma jang’oi ndiri man ma tek, man won tego ma dit; man ebedo ku lake ma dit mi nyunyu; ecamu man eturo nziki nziki, man enyono donge ku tiende: man e tung’ ku yedi ceke m’ular uwok ire; man ebedo ku tunge apar.

⁸ Ia pido pi tunge, man, nen, tunge mange ma nok uidho malu i kindgi, i wang’e tunge adek ma kwong’a jufudho kud ulaggi: man, nen, i tunge maeni wang’e nuti calu wang’ dhanu, man dhoge ubeyero gin ma dit.

⁹ Aneno maram juketho ko komker, man ng’atu m’uti mi ceng’ ujany: kendi pare tar calu pei, man yukwie calu yuk rombe ma leng’; komker pare lebmac m’uliel, ukobrene mac m’uliel.

¹⁰ Kulo mi mac ukadhu uai i wang’e: rubanga mi rubanga gitimo ire, man rubanga apar bang’ rubanga apar gicungo i wang’e: e juketho pokolembe, man juyabu kitabu.

¹¹ Aneno i nindo maeca um dwal mi lembe ma dit ma tunge yero; aneno maram junego ko yedine, man maram junyotho ko kume de, man maram jumie ya juwang’e ku mac.

¹² Man pi dong’ yedi m’udong’, bimobim migi jukabu woko: ento nindo mi bedo migi jumedo mi oro man nindo.

¹³ Aneno i ginmawokiwang’ mi diewor, man, nen, ng’atu acel ubino kind afuru m’i polo calu wod dhanu, man ebino cil ba ng’atu m’uti mi ceng’, man gikele ceng’ni i wang’e.

¹⁴ Man jumio ire bimobim, ku dwong’, man ker, kara kodhidhanu ceke, man thek ceke, ku dhok ceke gitim ire: bimobim pare en e bimobim mi nja, ma bikadhu woko ngo, man ker pare en e ker ma jubinyotho ngo.

¹⁵ An a Daniel, can unega i tipona i kuma, man ginmawokiwang’ mi wia ng’abu cwinya.

¹⁶ Acoro ceng’ni ng’atu acel m’i kind ju m’ucungo ceng’ni, man apenje pi lemandha mi maeni ceke. Ka kumeno eyero ira, man eketho ang’eyo thelembe mi ginduni.

¹⁷ Ewacu kumae, Yedi ma dongo maeni, ma gin ang’wen, gin ubimo ang’wen, ma biai kud i ng’om.

¹⁸ Ento jumaleng’ pa Ng’atu ma Malu Ngbir bijolo ker, man gibibedo wi ker nja, cil mi rondo ku rondo.

¹⁹ Alund ayenyo ang’ei lemandha pi yedi mir ang’wende, ma en e tung’ ku wadi ceke, jang’oi ndiri apila, ma lake nyunyu kwa, man wi lwete mola kwa; ma camu, ma turo nziki nziki, man ma nyono donge ku tiende;

²⁰ man pi tunge apar ma ni i wie, man tunge mange m’uidho malu, ma adek de podho i wang’e, cil tunge maeno m’ubedo ku wang’e, ku dhoge m’uyero gin ma dit, ma nenne dit ma sagu juwagi.

²¹ Aneno, e tung maeno timo ali ku jumaleng’, man esagugi;

²² maram ng’atu m’uti mi ceng’ uwok ko, e lembapoka mire ni jumaleng’ pa Ng’atu ma Malu Ngbir, man nindo wok ma jumaleng’ ucamu ie ker.

²³ Ewacu kumae, Yedi mir ang’wende bibedo ker mir ang’wende wi ng’om ma bibedo tung’ ku ker ceke, man ebicamu ng’om yu, man ebinyone piny, ebiture de nziki nziki.

²⁴ Man pi tunge apar, en e ubimo apar ma biwok i ker maeni: man mange biwok yo ng’eigi; man ebibedo tung’ ku ma kwong’ane, man ebiredho ubimo adek.

²⁵ Man ebiyero lembe kum Ng’atu ma Malu Ngbir; man ebiolo jumaleng’ pa Ng’atu ma Malu Ngbir; man ebipido ya elok nindo ku cik; man jubimiogi i cinge cil nindo ku nindo moko man ng’et nindo.

²⁶ Ento jubiketho pokolembe, man jubikabu bimobim pare woko, kara girwinye ginyothe cil i kajikne.

²⁷ Man ker ku bimobim, ku dwong’ mi ker ma the polo dho, jubimio ni dhanu mi jumaleng’ pa Ng’atu ma Malu Ngbir: ker pare en e ker ma rondo ku rondo, man bimobim ceke gibitimo ire man gibiwore.

²⁸ Maeni kajik mi lembene. An a Daniel, pidoic para ng’abu cwinya dit, man wang’a lokre i ia; ento akanu lembene i adundena.