Daniel 11 - The Holy Bible In Alur (Lur) Revised Orthography

¹ Man pira i rundi ma kwong’ane pa Dario ma Jamedi, acungo kara aketh ecungi man adwoke tek.

Ubimo ma Yor Ariwa ma Yo Malu kud Ubimo ma Yor Ariwa ma Yo Piny

² Man kawono abinyutho iri lemandha. Nen, fodi ubimo adek bicungo i Ajemi; man mir ang’wende bilony ma sagugi ceke: man kan enwang’u tego ni kum lonyo pare, ebithubo dhanu ceke kum ker mi Yunani.

³ Man ubimo ma jatego bicungo, m’ebicamu ker ku bimobim ma dwong’, m’ebitimo de calu ie yenyo.

⁴ E kan ebicungo, ker pare bitur, man ebipokre yo ba yamu ang’wen m’i polo, ento ni nyikwaye ngo, kadi calku bimobim pare m’ecamu ko ker de ngo; kum jubimugo ker pare, cil pi jumange m’umedo maeni.

⁵ Man ubimo ma yor ariwa ma yo piny bibedo jatego, man ng’atu acel ma kind judongomawijo pare; man ebibedo jatego i wie, man ebibedo ku bimobim; bimobim pare de bibedo ni bimobim ma dit.

⁶ Man i kajik rundi moko gibiribri gigi karacelo; man nyar ubimo ma yor ariwa ma yo piny bicidho bang’ ubimo ma yor ariwa ma malu kara gitim lembariba gikude: ento nyakune bibedo ku tego mi bote hai ungo; kadok acunga de ubimone bicungo ngo, kadok bote de; ento nyakune jubiwodhe, ku ju m’ukele de, ku ng’atu m’unyole de, man ng’atu m’udwoke tek i nindo maeca.

⁷ Ento kud i lwith ulage ng’atu acel bicungo i kakare, m’ebibino ba njuru asikari, man ebimondo i ka ma tek mir ali p’ubimo ma yor ariwa ma malu, man ebijai i kumgi, e ebisagu.

⁸ Man mungu migi bende, kud ayi gin m’acwia migi m’atwaga, kud agulu migi ma beco mi mola ma tar ku mi mola ma kwar, ebiyaku ebitero i Misiri; man ebicere rundi moko ni ubimo ma yor ariwa ma yo malu.

⁹ Man ebibino i ker p’ubimo ma yor ariwa ma yo piny, ento ebidok i ng’om pare gire.

¹⁰ Man wote gibitimo ali, man gibicoko udul njuru asikari ma dit, ma bibino, biumo piny, man bikadhu kud i kinde; man gibidok, gibitimo ali de, cil kum ot ma tek pare.

¹¹ E ubimo ma yor ariwa ma piny ng’ecwiny bimake, man ebiwok woko e gibikiedo gikude, en e kud ubimo ma yor ariwa ma malu; man ebiwodho udul ma dit, man udulne bimire i cinge.

¹² Man jubiting’o udulne malu, man adundene bitingre; man ebiredho rubanga apar bang’ apar piny, ento ebiloyo ngo.

¹³ E ubimo ma yor ariwa ma malu bidok, man ebiwodho udul ma dit ma sagu ma kwong’a; man ebibino i kajik mi nindo, en e rundi, ku njuru asikari ma dit man ku lonyo ma dit.

¹⁴ Man i nindo maeca dhanu dupa bicungo kum ubimo ma yor ariwa ma piny; nyithindho mi juco bende ma kind dhanu peri gibitingri gigi kara giketh ginmawokiwang’ ucungi; ento gibipodho.

¹⁵ Ka kumeno ubimo ma yor ariwa ma malu bibino, man ebidhuro ng’om ni thuthu, man ebimaku adhura ma tek: man njuru asikari ma yor ariwa ma piny bicungo ngo, kadok dhanu pare ma jugoyo wigi, kadok tego mi cungo de bibedo mbe.

¹⁶ Ento ng’atu m’ubino i kume bitimo calu ie yenyo gire, e ng’atu moko mbe ma bicungo i wang’e; man ebicungo i ng’om ma ber, man nyoth bibedo i cinge.

¹⁷ Man ebiketho wang’e kara ebin ku tego mi ker pare ceke, man karacelo kude lembe m’ubedo dre; man ebitimogi: man ebimio ire nya mon, kara enyothe; ento ebicungo ngo, kadok pire ebibedo ngo,

¹⁸ Yo ng’ei maeni ebiloko wang’e yo ba songa, man ebimaku dupa: ento jaditmawijo bijigo cac m’ewodho; eyo, mange ke, ebiketho cac pare lokre i wie.

¹⁹ Ebilund loko wang’e yo ba ot ma tek mi ng’om pare gire: ento ebikier man ebipodho, e ebinwangre ngo.

²⁰ Ng’atu acel bilund cungo i kakare ma biketho jajok ajok ukadh kud i dwong’ mi ker; ento ka nindo ma nyanok ukadhu jubinyothe, kadok i ng’ecwiny ungo, kadi i ali de ngo.

²¹ Man ng’atu acel m’uromo ku cac bicungo i kakare, ma gimio yung mi ker ire ngo: ento ebibino i nindo mi kwiocwiny, man ebinwang’u ker ku dhoge ma mit.

²² Man njuru asikari m’usagre jubisagugi kud i wang’e, man gibitur; eyo, jaditmawijo mi lembariba bende.

²³ Man yo ng’ei lembariba ma jutimo kude ebitimo kud abombi; kum ebiidho malu, man ebidoko tek, ku dhanu ma nyanok.

²⁴ I nindo ma museme ebibino cil wi ka ma mio mi ng’etker; man ebitimo gin ma kwaru pare timo ngo, kadi kwaru mi kwaru mire de; ebiketho i kindgi jambavoci, kud ayeki, man lonyo: eyo, ebiporo lembapora pare kum ka ma tek, cil mi nindo.

²⁵ Man ebithubo tego pare ku tegocwinye kum ubimo ma yor ariwa ma piny karacelo ku njuru asikari ma dit; man ubimo ma yor ariwa ma piny bitimo ali ku njuru asikari ma dit apila ma jutego; ento ebicungo ngo; kum gibiporo lembapora i kume.

²⁶ Eyo, ju m’ucamu kum cemo ma mit pare gibinyothe, man njuru asikari pare biumo piny; man dupa bipodho piny ma junego.

²⁷ Man pir ubimo ario maeni, adundegi bibedo mi timo gondri, man gibicwayu ndra dhu mesa acel: ento lembene bibedo miero ngo; kum fodi kajikne bibedo i nindo ma jung’olo.

²⁸ Ebilund dok i ng’om pare ku piny ma dit; man adundene bijai kum lembariba ma leng’; man ebitimo calu ie yenyo, man ebidok i ng’om pare gire.

²⁹ I nindo ma jung’olo ebidwogo, man ebibino yor ariwa ma piny; ento ebibedo i nindo ma cen ungo calu i nindo ma kwong’a.

³⁰ Kum combo mi Kitim bibino i kume; ka kumeno can binege, e ebidwogo, man ng’ecwiny binege kum lembariba ma leng’, man ebitimo calu ie yenyo; e ebidwogo, man ebineno yo ba ju m’uweko lembariba ma leng’.

³¹ Man njuru asikari bicungo i kume, man gibicido kamaleng’, cil ot ma tek, man gibikabu lam m’awang’a ma thiri thiri woko, man gibiketho ginmajudagu ma timo uvuru ucungi.

³² Man ju ma gitimo rac kum lembariba ebiloko pidoigi ku dhok ma mit; ento dhanu m’ung’eyo Mungu migi gibibedo tek, man gibitimo gin ma dit.

³³ Man ju ma riek i kind dhanu gibiponjo dhanu dupa; ento gibipodho ku palamularu man ku lebmac, ku ng’eca man kud ayeki, ceng’ dupa.

³⁴ Nie ka gibipodho, jubikonyogi ku kony ma nyanok; ento dhanu dupa bimoko i kumgi ku dhoggi ma mit.

³⁵ Man jumoko mi kind ju ma riek bipodho, kara judwokgi leng’, man kara julonygi, man judwokgi tar, cil i nindo mi kajikne; kum fodi en e mi nindo ma jung’olo.

³⁶ Man ubimo bitimo calu ie yenyo; man ebiyungre gire, man ebikethre dwong’ wi mungu kubang’gi ceke, man ebiyero lembe ma wang’uic kum Mungu mi mungu; man lembe pare bibedo miero cil ma ng’ecwiny bithum ko; kum maeno m’ukethre ebitimbre.

³⁷ Kadok, mungu pa weggi de ebiparu pigi ngo, kadi yeny mi mon de, kadi mungu moko de ebiparu pire ngo; kum ebidwokre gire dwong’ wi gin ceke.

³⁸ Ento i kakare ebiyungo mungu mi ot ma tek; man mungu ma weggi ng’eyo ngo ebiyungo ku mola ma kwar, man mola ma tar, man ku kidi ma pire tek ku gin ma nyayu mutoro.

³⁹ Man ebitimo kum ot ma tek m’usagu ku kony mi mungu mi juwirok; ng’atu ma tek bituce ebimedo ire dwong’; man ebiketho gibim wi dhanu dupa, man ebipoko ng’om mi welpiny.

⁴⁰ Man i nindo mi kajikne ubimo ma yor ariwa ma piny bipiembre gikude; man ubimo ma yor ariwa ma malu bibino i kume calu vira, ku magali, man ku weg riuni, man ku combo dupa; man ebimondo i ng’om maeno, man ebiumo piny man ebikadhu kud i ie.

⁴¹ Ebimondo bende i ng’om ma ber, man ng’om dupa biredhre; ento jubibodho maeni kud i cinge: Edom, ku Moab, man nyithindho pa Amon ma dongo.

⁴² Ebirieyo cinge bende wi ng’om; e ng’om Misiri biboth ungo.

⁴³ Ento ebibedo ku tego wi piny m’akana mi mola ma kwar man mi mola ma tar, man wi gin ma pire tek ceke mi Misiri; man Julibua ku Juethiopia gibibedo vut dakutielo pare.

⁴⁴ Ento rwonglembe m’uai yo nyangu ku yor ariwa ma malu bing’abu cwinye; man ebiwok ku kwinyo ma dit kara enyoth man ekab dhanu dupa woko.

⁴⁵ Man ebiguro hema mi odker pare i die nam ku got ma leng’ ma ber; ento ebitundo kum kajikne, man ng’atu moko mbe ma bikonye.